jhuuT bolā hai to qaa.em bhī raho us par 'zafar'

aadmī ko sāhab-e-kirdār honā chāhiye

jhuT bola hai to qaem bhi raho us par 'zafar'

aadmi ko sahab-e-kirdar hona chahiye

muskurāte hue miltā huuñ kisī se jo 'zafar'

saaf pahchān liyā jāatā huuñ royā huā maiñ

muskuraate hue milta hun kisi se jo 'zafar'

saf pahchan liya jaata hun roya hua main

ab ke is bazm meñ kuchh apnā pata bhī denā

paañv par paañv jo rakhnā to dabā bhī denā

ab ke is bazm mein kuchh apna pata bhi dena

panw par panw jo rakhna to daba bhi dena

ḳhudā ko maan ki tujh lab ke chūmne ke sivā

koī ilaaj nahīñ aaj kī udāsī kā

KHuda ko man ki tujh lab ke chumne ke siwa

koi ilaj nahin aaj ki udasi ka

TakTakī bāñdh ke maiñ dekh rahā huuñ jis ko

ye bhī ho saktā hai vo sāmne baiThā hī na ho

TakTaki bandh ke main dekh raha hun jis ko

ye bhi ho sakta hai wo samne baiTha hi na ho

ḳhushī milī to ye aalam thā bad-havāsī kā

ki dhyān hī na rahā ġham kī be-libāsī kā

KHushi mili to ye aalam tha bad-hawasi ka

ki dhyan hi na raha gham ki be-libasi ka

badan kā saarā lahū khiñch ke aa gayā ruḳh par

vo ek bosa hameñ de ke surḳh-rū hai bahut

badan ka sara lahu khinch ke aa gaya ruKH par

wo ek bosa hamein de ke surKH-ru hai bahut

mujh se chhuḌvā.e mire saare usuul us ne 'zafar'

kitnā chālāk thā maarā mujhe tanhā kar ke

mujh se chhuDwae mere sare usul us ne 'zafar'

kitna chaalak tha mara mujhe tanha kar ke

us ko aanā thā ki vo mujh ko bulātā thā kahīñ

raat bhar bārish thī us kā raat bhar paiġhām thā

us ko aana tha ki wo mujh ko bulata tha kahin

raat bhar barish thi us ka raat bhar paigham tha

vahāñ maqām to rone kā thā magar ai dost

tire firāq meñ ham ko hañsī bahut aa.ī

wahan maqam to rone ka tha magar ai dost

tere firaq mein hum ko hansi bahut aai

ḳharābī ho rahī hai to faqat mujh meñ hī saarī

mire chāroñ taraf to ḳhuub achchhā ho rahā hai

KHarabi ho rahi hai to faqat mujh mein hi sari

mere chaaron taraf to KHub achchha ho raha hai

chehre se jhaaḌ pichhle baras kī kudūrateñ

dīvār se purānā calender utaar de

chehre se jhaD pichhle baras ki kuduraten

diwar se purana calender utar de

apne hī sāmne dīvār banā baiThā huuñ

hai ye anjām use raste se haTā dene kā

apne hi samne diwar bana baiTha hun

hai ye anjam use raste se haTa dene ka

abhī merī apnī samajh meñ bhī nahīñ aa rahī

maiñ jabhī to baat ko muḳhtasar nahīñ kar rahā

abhi meri apni samajh mein bhi nahin aa rahi

main jabhi to baat ko muKHtasar nahin kar raha

puurī āvāz se ik roz pukārūñ tujh ko

aur phir merī zabāñ par tirā taalā lag jaa.e

puri aawaz se ek roz pukarun tujh ko

aur phir meri zaban par tera tala lag jae

aañkh ke ek ishāre se kiyā gul us ne

jal rahā thā jo diyā itnī havā hote hue

aankh ke ek ishaare se kiya gul us ne

jal raha tha jo diya itni hawa hote hue

is baar milī hai jo natīje meñ burā.ī

kaam aa.ī hai apnī koī achchhā.ī hamāre

is bar mili hai jo natije mein burai

kaam aai hai apni koi achchhai hamare

aaj kal us kī tarah ham bhī haiñ ḳhālī ḳhālī

ek do din use kahiyo ki yahāñ rah jaa.e

aaj kal us ki tarah hum bhi hain KHali KHali

ek do din use kahiyo ki yahan rah jae

dil se bāhar nikal aanā mirī majbūrī hai

maiñ to is shor-e-qayāmat meñ nahīñ rah saktā

dil se bahar nikal aana meri majburi hai

main to is shor-e-qayamat mein nahin rah sakta

rok rakhnā thā abhī aur ye āvāz kā ras

bech lenā thā ye saudā zarā mahñgā kar ke

rok rakhna tha abhi aur ye aawaz ka ras

bech lena tha ye sauda zara mahnga kar ke