وہ کسی کو یاد کر کے مسکرایا تھا ادھر

اور میں نادان یہ سمجھا کہ وہ میرا ہوا

تیری باتوں کو چھپانا نہیں آتا مجھ سے

تو نے خوشبو مرے لہجے میں بسا رکھی ہے

آج پھر نیند کو آنکھوں سے بچھڑتے دیکھا

آج پھر یاد کوئی چوٹ پرانی آئی

نہ جانے کتنے چراغوں کو مل گئی شہرت

اک آفتاب کے بے وقت ڈوب جانے سے

مدتوں بعد پشیماں ہوا دریا ہم سے

مدتوں بعد ہمیں پیاس چھپانی آئی

پھر ترا ذکر کیا باد صبا نے مجھ سے

پھر مرے دل کو دھڑکنے کے بہانے آئے

کسی کو کھو کے پا لیا کسی کو پا کے کھو دیا

نہ انتہا خوشی کی ہے نہ انتہا ملال کی

عظیم لوگ تھے ٹوٹے تو اک وقار کے ساتھ

کسی سے کچھ نہ کہا بس اداس رہنے لگے

جو اس کے ہونٹوں کی جنبش میں قید تھا اشہرؔ

وہ ایک لفظ بنا بوجھ میرے شانوں کا

ٹھہری ٹھہری سی طبیعت میں روانی آئی

آج پھر یاد محبت کی کہانی آئی

سنو سمندر کی شوخ لہرو ہوائیں ٹھہری ہیں تم بھی ٹھہرو

وہ دور ساحل پہ ایک بچہ ابھی گھروندے بنا رہا ہے

ویسے بھی اس سے کوئی ربط نہ رکھا میں نے

یوں بھی دنیا میں کشش تیری بہ نسبت کم تھی

وہی تو مرکزی کردار ہے کہانی کا

اسی پہ ختم ہے تاثیر بے وفائی کی

تیرے کردار کو اتنا تو شرف حاصل ہے

تو نہیں تھا تو کہانی میں حقیقت کم تھی

پیاس دریا کی نگاہوں سے چھپا رکھی ہے

ایک بادل سے بڑی آس لگا رکھی ہے

سوچتا ہوں تری تصویر دکھا دوں اس کو

روشنی نے کبھی سایہ نہیں دیکھا اپنا

سبھی اپنے نظر آتے ہیں بظاہر لیکن

روٹھنے والا ہے کوئی نہ منانے والا

مدتوں بعد میسر ہوا ماں کا آنچل

مدتوں بعد ہمیں نیند سہانی آئی

لے گئیں دور بہت دور ہوائیں جس کو

وہی بادل تھا مری پیاس بجھانے والا

آرزو ہے سورج کو آئنہ دکھانے کی

روشنی کی صحبت میں ایک دن گزارا ہے