کی تلاش کا نتیجه | موضو - نظم, صفحہ matvaalii

Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

رد کریں ڈاؤن لوڈ شعر

تلاش کے نتائج

تلاش کا نتیجہ "matvaalii"

نظم کے متعلقہ نتیجہ "matvaalii"

نظم

برسات کی متوالی گھنگھور گھٹاؤں میں
کہسار کے دامن کی مستانہ ہواؤں میں
یا چاندنی راتوں کی شفاف فضاؤں میں

اختر شیرانی

نظم

اس رنگ رنگیلی مجلس میں وہ رنڈی ناچنے والی ہو
منہ جس کا چاند کا ٹکڑا ہو اور آنکھ بھی مے کے پیالی ہو
بد مست بڑی متوالی ہو ہر آن بجاتی تالی ہو
مے نوشی ہو بے ہوشی ہو ''بھڑوے'' کی منہ میں گالی ہو

نظیر اکبرآبادی

نظم

جب عہد جوانی کی ٹھنڈی ٹھنڈی برساتیں ہوتی ہیں
متوالی عمریں ہوتی ہیں متوالی راتیں ہوتی ہیں

نشور واحدی

نظم

آسماں پر چھا رہا ہے ابر پاروں کا ہجوم!
نو بہاروں کا ہجوم
آہ یہ رنگین آوارہ نظاروں کا ہجوم
کوہساروں کا ہجوم
بدلیاں ہیں یا کسی کے بھولے بسرے خواب ہیں
بے خود و بیتاب ہیں!
یا ہوا پر تیرتا ہے رود باروں کا ہجوم
آبشاروں کا ہجوم
پھرتی ہیں آوارہ متوالی گھٹائیں اس طرح
اور ہوائیں اس طرح
جھومتا پھرتا ہو جیسے مے گساروں کا ہجوم
بادہ خواروں کا ہجوم
وادیٔ گنگا ہے، برکھا رت ہے، کالی رات ہے
رات ہے برسات ہے
اور فضا میں تیرنے والے نظاروں کا ہجوم
نشہ زاروں کا ہجوم
نیلگوں پریاں افق میں پر ہیں پھیلائے ہوئے
بال بکھرائے ہوئے
یا امنڈ آیا ہے ساون کی بہاروں کا ہجوم
ابر پاروں کا ہجوم
ننھی ننھی بوندیں گرتی ہیں حجاب ابر سے
یا نقاب ابر سے
چھن رہا ہے قطرے بن بن کر ستاروں کا ہجوم
نور پاروں کا ہجوم
یہ گھٹائیں ہیں کہ خوابوں کے سفینے ہیں رواں
بے قرینے ہیں رواں
بادبانوں میں چھپائے چشمہ ساروں کا ہجوم
جوے باروں کا ہجوم
بجلی ہے یا نور کی زنجیر لہرائی ہوئی
پیچ و خم کھائی ہوئی
یا خمیدہ مرمریں پھولوں کے ہاروں کا ہجوم
اور ستاروں کا ہجوم
یہ سماں بجلی کا یہ مہتاب کی سی وادیاں
خواب کی سی وادیاں
نشے میں بھیگا ہوا یہ سبزہ زاروں کا ہجوم
کوہساروں میں خوشی کی بستیاں آباد ہیں
مستیاں آباد ہیں
چار سو بکھرا پڑا ہے سبزہ زاروں کا ہجوم
مرغزاروں کا ہجوم
یوں نظر آتے ہیں کہسار مسوری دور سے
مست سے مخمور سے
جوں سمندر سے جزیروں کی قطاروں کا ہجوم
سبزہ زاروں کا ہجوم
یہ سفر، یہ رات، یہ برسات اور پھر ہم سفر
الامان و الحذر
ایک حسن یاسمیں رنگیں بہاروں کا ہجوم
ماہ پاروں کا ہجوم
یہ سہانے منظر اختر مدتوں یاد آئیں گے
مدتوں تڑپائیں گے
آہ یہ رات، اف یہ مستانہ نظاروں کا ہجوم
یہ بہاروں کا ہجوم

اختر شیرانی

نظم

آئی وہ پنگھٹ کی دیوی، وہ پنگھٹ کی رانی
دنیا ہے متوالی جس کی اور فطرت دیوانی
ماتھے پر سیندوری ٹیکا رنگین و نورانی
سورج ہے آکاش میں جس کی ضو سے پانی پانی
چھم چھم اس کے بچھوے بولیں جیسے گائے پانی
آئی وہ پنگھٹ کی دیوی وہ پنگھٹ کی رانی

ساغر نظامی

نظم

اس سے تو ایک دل نہیں خالی
سب کے جی میں بسی ہے متوالی
ہے یہ فطرت کی گود کی پالی
کامیابی کے پیڑ کی ڈالی

نسیم امروہوی

نظم

ناز کیوں ہو نہ تجھے کرشن دلاری جمنا
تو تو رادھا کی سہیلی بنی پیاری جمنا
رتبہ عالی ہے ترا مرتبہ بھاری جمنا
ہر جگہ فیض اتم رہتا ہے جاری جمنا
ہے یقیں گرم کسی دن بھری محفل ہوگی
راس منڈل کی وہ لیلا لب ساحل ہوگی
مٹ گیا لطف ترا چھن گیا گہنا تیرا
جب کنھیا نہیں بے لطف ہے رہنا تیرا
غم اٹھانا ستم و جور کو سہنا تیرا
پانی ہو ہو کے شب و روز یہ بہنا تیرا
آتش ہجر کچھ اس درجہ لگی ہے تن میں
دل نہ متھرا میں بہلتا ہے نہ بندرابن میں
بات بگڑی نہیں اب بھی ہے وہی بات تری
وہی جاڑا وہی گرمی وہی برسات تری
دن اسی ڈھنگ اسی رنگ کی ہے رات تری
کون کہہ سکتا ہے کچھ بھی نہیں اوقات تری
کرشن صدقے ہیں تو رادھا ہیں فدائی جمنا
ہر طرف خلق میں ہے تیری دہائی جمنا
سادی سادی ہے روش وضع ہے بھولی بھالی
ہے روانی بھی غضب چال بھی ہے متوالی
نیلی موجوں سے پشیماں ہوئیں زلفیں کالی
حسن و آرائش و زینت سے بڑھی خوشحالی
اللہ اللہ رے اس ناز و ادا کی ہستی
تیرے آگے نہیں کچھ آب بقا کی ہستی
پوچھے رادھا سے کوئی قدر حقیقت تیری
کرشن سے جانچے کوئی خوبی عزت تیری
ساری دنیا میں ہے پھیلی ہوئی عظمت تیری
اس کو جنت ملی کی جس نے بھی خدمت تیری
اپنا ہم رتبہ جو پایا تجھے گنگا جی نے
اپنے پہلو میں بٹھایا تجھے گنگا جی نے
باعث ناز ہے بے شبہ ہمالہ کے لئے
سبب فخر و شرف گوکل و متھرا کے لئے
خاص اک نعمت حق وادی و صحرا کے لئے
مختصر یہ ہے بڑی چیز ہے دنیا کے لئے
دل کی سربستہ کلی فرط خوشی سے کھل جائے
اس کو امرت ملے جس کو ترا پانی مل جائے
سچ ہے اسرار حقیقت کا خزانہ تو ہے
حال و مستقبل و ماضی کا زمانہ تو ہے
لطف آگیں طرب آمیز فسانہ تو ہے
سب ہیں بیگانے اگر ہے تو یگانہ تو ہے
صاف آئینے کی صورت ہے صفائی تیری
بندگی کیوں نہ کرے ساری خدائی تیری
نگۂ فضل و ترحم سے اشارا کر دے
جو نہ ہو کام کسی سے وہ خدارا کر دے
رنج و غم درد و قلق دور ہمارا کر دے
پیاری مخلوق میں کچھ اور بھی پیارا کر دے
رہنمائی تری بسملؔ کے لئے سب کچھ ہے
نا خدائی تری بسملؔ کے لئے سب کچھ ہے

بسمل الہ آبادی

نظم

اچھی امی پیاری امی گڑیا ایک بنا دو
ننھی منی پیاری امی گڑیا ایک بنا دو
گورا گورا مکھڑا ہو اور کالی کالی آنکھیں
لمبے لمبے بال سنہری مر مر جیسی باہیں
سکھیاں دیکھیں دیکھ کے بھرتی رہ جائیں بس آہیں
اچھی امی پیاری امی گڑیا ایک بنا دو
ننھی منی پیاری پیاری گڑیا ایک بنا دو
نیلے رنگ کی پہنی ہو نازک سی اس نے ساڑی
ہاتھوں میں ہوں گجرے اس کے کانوں میں ہو بالی
چال چلے وہ موروں جیسی ٹھمک ٹھمک متوالی
اچھی امی پیاری امی گڑیا ایک بنا دو
ننھی منی پیاری امی گڑیا ایک بنا دو
ایسی گڑیا ایک بنا دو جو بولے جو گائے
باجا لے کر چھم چھم چھم چھم مجھ کو ناچ دکھائے
ناچ دکھا کر میرے من کو روز یوں ہی بہلائے
اچھی امی پیاری امی گڑیا ایک بنا دو
ننھی منی پیاری پیاری گڑیا ایک بنا دو
ناز اٹھاؤں گی میں اس کے دیکھوں گی میں نخرے
خوب کروں گی منت اس کی روٹھے گی جب مجھ سے
اور پکا کر دوں گی اس کو میٹھے میٹھے کھانے
اچھی امی پیاری امی گڑیا ایک بنا دو
ننھی منی پیاری امی گڑیا ایک بنا دو
اب نہ کبھی آپا سے میں جھگڑوں گی پیاری امی
اب نہ کبھی میں منے کو پیٹوں گی پیاری امی
آپ کا ہر اک کہنا میں مانوں گی پیاری امی
ننھی منی پیاری گڑیا ایک بنا دو
اچھی امی پیاری امی گڑیا ایک بنا دو

اجمل وجیہ

نظم

ساون کی وہ متوالی راتیں اور راتوں کی تنہائی توبہ
جب کالی گھٹائیں اٹھتی ہیں لیتی ہوئی انگڑائی توبہ
ایسے میں تری یاد آتی ہے
یاد آنے والے یہ تو بتا کیا میں بھی تجھے یاد آتا ہوں

سید محمود حسن قیصر امروہی

نظم

بربط نشو و نما کی ایک متوالی ترنگ
گونجتے اعصاب کھلتا رنگ بجتے انگ انگ
گرم موسم کا نکھار

عبد الحمید عدم

نظم

وہ دیکھ کہ موجیں رقص کناں ہیں سطح زمیں پر گنگا کی
نو وارد آریہ حیرت میں ہیں دیکھ کے شان اس دریا کی
گنگوتری سے آتی ہے چلی اٹھکھیلیاں کرتی دھار اس کی
آزادی ہے تیور سے عیاں متوالی ہے رفتار اس کی

سید وحیدالدین سلیم

نظم

سرور جستجو مغرب کی متوالی ہواؤں کا
سبھی پایا مگر درمان درد بے بسی مشکل
یہ اک آسودگی چہرے پہ یہ ٹھہراؤ آنکھوں میں
یہ اشکوں سے بھری چھاگل یہ بے پردا و خود سر دل
چٹانیں دہر کی آتش کو چھو کر بھی نہیں پگھلیں
نہ جانے کون سے اجزا ہیں اس افتاد میں شامل

شفیق فاطمہ شعریٰ

نظم

چوراہے پر بورڈ لگا ہے
بیٹی بچاؤ بیٹی پڑھاؤ
لیکن ٹھیک اسی کے آگے
چند درندے کھڑے ہوئے ہیں
آتی جاتی ہر تتلی کے پر کو تکتے
رنگ سے خائف
چاہتے ہیں کہ ہر تتلی کے پر کو نوچیں
رنگ اڑا دیں
شاید ان کو علم نہیں کہ
رنگ یہ سارے
ماں اور باپ کی برسوں کی محنت کا ثمرہ
برسوں کی کاوش کا نتیجہ ہوتے ہیں
لیکن یہ احساس ہی کب ہے درندوں کو
کیسے ماں اور باپ نے رنگ چنے ہیں سارے
نقش بنائے
اور علم و دانش کی راہوں پر چھوڑا ہے
اپنی چنچل اور متوالی تتلی کو
پر پھیلانے
تاکہ ان کے رنگ تمام نکھرتے جائیں
پھر بھی اکثر ڈر لگتا ہے
یہ علم و دانش کے رستے
کس درجہ پر خوف و خطر ہیں
ہر لمحہ لٹنے کا ڈر ہے
حالانکہ چوراہے پر ہیں چند محافظ
نظر جمائے
حلف اٹھائے
دھاک بٹھائے
لیکن پھر بھی ڈر لگتا ہے
شام ڈھلے چوراہے کے یہ چند محافظ
میری چنچل تتلی کے یہ کٹے پھٹے پر
اڑے ہوئے رنگ
میرے دروازے کے آگے ڈال نہ جائیں

فاروق نور

نظم

اصلی جاپانی دو نالی
نانا کی بندوق نرالی
کندہ اس کا مٹ میلا سا
روپ ڈراؤنا صورت کالی
نانا جی اس کے رسیا تھے
نانی تھی اس کی متوالی
لیتے تھے اس سے جو نشانہ
جاتا تھا وہ اکثر خالی
چڑیوں کا جینا دوبھر تھا
چھپتی تھیں وہ ڈالی ڈالی
نانا جی اک روز گئے تھے
دیکھنے جب میلہ ویشالی
نانی کو سمجھا کے گئے تھے
کرنی تھی اس کی رکھوالی
ساری رات گزاری باہر
میلے کی تھی شان نرالی
گھر پر رات کو ڈاکو آئے
توڑ کے روشن دان کی جالی
نانی کو پستول دکھا کر
لے بھاگے بندوق کمالی
شور مچاتی پیچھے دوڑیں
وہ تھیں دلیر بڑی دل والی
ہلا سن کر لوگ بھی دوڑے
لے کر بلم اور بھجالی
چور ہوئے تب نو دو گیارہ
چھوڑ گئے بندوق مثالی
نانا کے گھر اسی خوشی میں
اگلے روز منی دیوالی
نانی جی نے اسی خوشی میں
گھر گھر بھیجی کھیر کی تھالی

ذکی احمد

نظم

اے چاندی کی متوالی کرنو پیچیدہ یہاں کی ہیں راہیں
دو ہاتھ کفن ملتا بھی نہیں گھبرا کے جو مرنا بھی چاہیں
پوری اجرت پاتی بھی نہیں شل ہو کے غریبوں کی باہیں
بیواؤں کے آنسو بے قیمت بے کار یتیموں کی آہیں

سلام سندیلوی

نظم

اک سیمیں بدن اک توبہ شکن ہے محو خرام اسٹیشن پر
ماہ تاباں ماہ روشن ماہ کامل ماہ انور
اٹھلاتی ہوئی بل کھاتی ہوئی آنچل پکڑے منہ کو موڑے
کچھ سے بھڑتی کچھ سے کٹتی کچھ دل جوڑے کچھ دل توڑے
مدفون ہزاروں کے ارماں ابھرے ہوئے گورے شانوں میں
مجروح پڑے ہوں گے کتنے ان پردیسی انسانوں میں
کالی متوالی آنکھوں میں پنہاں بے رت کی برساتیں
بے باک نظر کی شوخی میں خوابیدہ گناہوں کی راتیں
فطرت کا سنہرا تحفہ ہے یہ حسن و عشق کے عالم میں
یا تصویروں کی ملکہ ہے رومان کے رنگیں البم میں
وہ رفتہ رفتہ اب میری نظروں سے چھپتی جاتی ہے
اب اسٹیشن کے اس جانب رہ گیروں کو بہکاتی ہے
پروا کے اک جھونکے کی طرح گزری دل کی آبادی سے
کلیوں کو بے مہکائے ہوئے چل دی حسرت کی وادی سے
دریا کی اک موج سیمیں ساحل سے ٹکرا کر چل دی
برسات کے دھندلے بادل میں اک برق سی لہرا کر چل دی
ان چلتے پھرتے سایوں سے الفت کی تمنا کون کرے
جو اپنے بس سے باہر ہوں پھر ان کی پروا کون کرے
لیکن ہاں اتنی خواہش ہے اے کاش جو پوری ہو جائے
اللہ کرے وہ دوشیزہ اک بار ٹہلتی پھر آئے

سلام سندیلوی

نظم

رنگت اس کی کالی کالی
چال بڑی اس کی متوالی

ایوب اختر

نظم

ہر در پہ پہنچ کر رو دینا دکھ پیٹ کا سب سے کہہ جانا
جب سامنے آ جاتا ہے کوئی پھیلا کر ہاتھ کو رہ جانا
فاقوں سے ہے بے ہوشی سی ہر گام پہ چکر آتے ہیں
پیوند بھری کہنہ سی ردا پیوند بھی ادھڑے جاتے ہیں
متوالی رسیلی آنکھوں کے انداز بدلتے رہتے ہیں
کچھ مکھیاں بھن بھن کرتی ہیں کچھ آنسو چلتے رہتے ہیں
منہ پھیر کے آنسو پونچھتی ہے اشکوں میں ابال آ جاتا ہے
رہ رہ کے ملال آ جاتا ہے کچھ دل میں خیال آ جاتا ہے
جب دل کی دھڑکن بڑھتی ہے کچھ اور بھی گھبرا جاتی ہے
پچھتا پچھتا کر مانگتی ہے اور مانگ کے پچھتا جاتی ہے
ہے درد بھری آواز میں اک ترکیب نئی انداز نیا
پھوٹی ہوئی قسمت چھیڑ رہی ہے ٹوٹے دل کا ساز نیا
دیتا ہے اگر کچھ بھیک کوئی لیتے ہوئے کیا شرماتی ہے
غیرت کا تو سر جھک جاتا ہے محتاجی ہاتھ بڑھاتی ہے
بنیاد غرور و کبر وانا کو ٹھوکر سے ڈھا دیتی ہے
تدبیر کی آخر ناکامی تقدیر کو منوا دیتی ہے
کہتی ہے کہ دیکھ اے اہل دول محتاجی کی تصویر ہوں میں
جس خواب کو تو ہے دیکھ رہا اس خواب کی اک تعبیر ہوں میں

سریر کابری

نظم

ایک شجر
پھولوں کی خوشبو
بھینی بھینی
شہد کے پھل
روشن آنکھیں
چڑھی کمانیں
توبہ کی ڈالی
متوالی

سعید الظفر چغتائی

نظم

دل سے جو بات نکلتی ہے اثر رکھتی ہے
پر نہیں طاقت پرواز مگر رکھتی ہے
قدسی الاصل ہے رفعت پہ نظر رکھتی ہے
خاک سے اٹھتی ہے گردوں پہ گزر رکھتی ہے
عشق تھا فتنہ گر و سرکش و چالاک مرا
آسماں چیر گیا نالۂ بیباک مرا
پیر گردوں نے کہا سن کے کہیں ہے کوئی
بولے سیارے سر عرش بریں ہے کوئی
چاند کہتا تھا نہیں اہل زمیں ہے کوئی
کہکشاں کہتی تھی پوشیدہ یہیں ہے کوئی
کچھ جو سمجھا مرے شکوے کو تو رضواں سمجھا
مجھ کو جنت سے نکالا ہوا انساں سمجھا
تھی فرشتوں کو بھی حیرت کہ یہ آواز ہے کیا
عرش والوں پہ بھی کھلتا نہیں یہ راز ہے کیا
تا سر عرش بھی انساں کی تگ و تاز ہے کیا
آ گئی خاک کی چٹکی کو بھی پرواز ہے کیا
غافل آداب سے سکان زمیں کیسے ہیں
شوخ و گستاخ یہ پستی کے مکیں کیسے ہیں
اس قدر شوخ کہ اللہ سے بھی برہم ہے
تھا جو مسجود ملائک یہ وہی آدم ہے
عالم کیف ہے دانائے رموز کم ہے
ہاں مگر عجز کے اسرار سے نامحرم ہے
ناز ہے طاقت گفتار پہ انسانوں کو
بات کرنے کا سلیقہ نہیں نادانوں کو
آئی آواز غم انگیز ہے افسانہ ترا
اشک بیتاب سے لبریز ہے پیمانہ ترا
آسماں گیر ہوا نعرۂ مستانہ ترا
کس قدر شوخ زباں ہے دل دیوانہ ترا
شکر شکوے کو کیا حسن ادا سے تو نے
ہم سخن کر دیا بندوں کو خدا سے تو نے
ہم تو مائل بہ کرم ہیں کوئی سائل ہی نہیں
راہ دکھلائیں کسے رہرو منزل ہی نہیں
تربیت عام تو ہے جوہر قابل ہی نہیں
جس سے تعمیر ہو آدم کی یہ وہ گل ہی نہیں
کوئی قابل ہو تو ہم شان کئی دیتے ہیں
ڈھونڈنے والوں کو دنیا بھی نئی دیتے ہیں
ہاتھ بے زور ہیں الحاد سے دل خوگر ہیں
امتی باعث رسوائی پیغمبر ہیں
بت شکن اٹھ گئے باقی جو رہے بت گر ہیں
تھا براہیم پدر اور پسر آزر ہیں
بادہ آشام نئے بادہ نیا خم بھی نئے
حرم کعبہ نیا بت بھی نئے تم بھی نئے
وہ بھی دن تھے کہ یہی مایۂ رعنائی تھا
نازش موسم گل لالۂ صحرائی تھا
جو مسلمان تھا اللہ کا سودائی تھا
کبھی محبوب تمہارا یہی ہرجائی تھا
کسی یکجائی سے اب عہد غلامی کر لو
ملت احمد مرسل کو مقامی کر لو
کس قدر تم پہ گراں صبح کی بیداری ہے
ہم سے کب پیار ہے ہاں نیند تمہیں پیاری ہے
طبع آزاد پہ قید رمضاں بھاری ہے
تمہیں کہہ دو یہی آئین وفاداری ہے
قوم مذہب سے ہے مذہب جو نہیں تم بھی نہیں
جذب باہم جو نہیں محفل انجم بھی نہیں
جن کو آتا نہیں دنیا میں کوئی فن تم ہو
نہیں جس قوم کو پروائے نشیمن تم ہو
بجلیاں جس میں ہوں آسودہ وہ خرمن تم ہو
بیچ کھاتے ہیں جو اسلاف کے مدفن تم ہو
ہو نکو نام جو قبروں کی تجارت کر کے
کیا نہ بیچوگے جو مل جائیں صنم پتھر کے
صفحۂ دہر سے باطل کو مٹایا کس نے
نوع انساں کو غلامی سے چھڑایا کس نے
میرے کعبے کو جبینوں سے بسایا کس نے
میرے قرآن کو سینوں سے لگایا کس نے
تھے تو آبا وہ تمہارے ہی مگر تم کیا ہو
ہاتھ پر ہاتھ دھرے منتظر فردا ہو
کیا کہا بہر مسلماں ہے فقط وعدۂ حور
شکوہ بے جا بھی کرے کوئی تو لازم ہے شعور
عدل ہے فاطر ہستی کا ازل سے دستور
مسلم آئیں ہوا کافر تو ملے حور و قصور
تم میں حوروں کا کوئی چاہنے والا ہی نہیں
جلوۂ طور تو موجود ہے موسیٰ ہی نہیں
منفعت ایک ہے اس قوم کا نقصان بھی ایک
ایک ہی سب کا نبی دین بھی ایمان بھی ایک
حرم پاک بھی اللہ بھی قرآن بھی ایک
کچھ بڑی بات تھی ہوتے جو مسلمان بھی ایک
فرقہ بندی ہے کہیں اور کہیں ذاتیں ہیں
کیا زمانے میں پنپنے کی یہی باتیں ہیں
کون ہے تارک آئین رسول مختار
مصلحت وقت کی ہے کس کے عمل کا معیار
کس کی آنکھوں میں سمایا ہے شعار اغیار
ہو گئی کس کی نگہ طرز سلف سے بے زار
قلب میں سوز نہیں روح میں احساس نہیں
کچھ بھی پیغام محمد کا تمہیں پاس نہیں
جا کے ہوتے ہیں مساجد میں صف آرا تو غریب
زحمت روزہ جو کرتے ہیں گوارا تو غریب
نام لیتا ہے اگر کوئی ہمارا تو غریب
پردہ رکھتا ہے اگر کوئی تمہارا تو غریب
امرا نشۂ دولت میں ہیں غافل ہم سے
زندہ ہے ملت بیضا غربا کے دم سے
واعظ قوم کی وہ پختہ خیالی نہ رہی
برق طبعی نہ رہی شعلہ مقالی نہ رہی
رہ گئی رسم اذاں روح بلالی نہ رہی
فلسفہ رہ گیا تلقین غزالی نہ رہی
مسجدیں مرثیہ خواں ہیں کہ نمازی نہ رہے
یعنی وہ صاحب اوصاف حجازی نہ رہے
شور ہے ہو گئے دنیا سے مسلماں نابود
ہم یہ کہتے ہیں کہ تھے بھی کہیں مسلم موجود
وضع میں تم ہو نصاریٰ تو تمدن میں ہنود
یہ مسلماں ہیں جنہیں دیکھ کے شرمائیں یہود
یوں تو سید بھی ہو مرزا بھی ہو افغان بھی ہو
تم سبھی کچھ ہو بتاؤ تو مسلمان بھی ہو
دم تقریر تھی مسلم کی صداقت بیباک
عدل اس کا تھا قوی لوث مراعات سے پاک
شجر فطرت مسلم تھا حیا سے نمناک
تھا شجاعت میں وہ اک ہستی فوق الادراک
خود گدازی نم کیفیت صہبایش بود
خالی از خویش شدن صورت مینا یش بود
ہر مسلماں رگ باطل کے لیے نشتر تھا
اس کے آئینۂ ہستی میں عمل جوہر تھا
جو بھروسا تھا اسے قوت بازو پر تھا
ہے تمہیں موت کا ڈر اس کو خدا کا ڈر تھا
باپ کا علم نہ بیٹے کو اگر ازبر ہو
پھر پسر قابل میراث پدر کیونکر ہو
ہر کوئی مست مئے ذوق تن آسانی ہے
تم مسلماں ہو یہ انداز مسلمانی ہے
حیدری فقر ہے نے دولت عثمانی ہے
تم کو اسلاف سے کیا نسبت روحانی ہے
وہ زمانے میں معزز تھے مسلماں ہو کر
اور تم خوار ہوئے تارک قرآں ہو کر
تم ہو آپس میں غضب ناک وہ آپس میں رحیم
تم خطا کار و خطا بیں وہ خطا پوش و کریم
چاہتے سب ہیں کہ ہوں اوج ثریا پہ مقیم
پہلے ویسا کوئی پیدا تو کرے قلب سلیم
تخت فغفور بھی ان کا تھا سریر کے بھی
یوں ہی باتیں ہیں کہ تم میں وہ حمیت ہے بھی
خودکشی شیوہ تمہارا وہ غیور و خوددار
تم اخوت سے گریزاں وہ اخوت پہ نثار
تم ہو گفتار سراپا وہ سراپا کردار
تم ترستے ہو کلی کو وہ گلستاں بکنار
اب تلک یاد ہے قوموں کو حکایت ان کی
نقش ہے صفحۂ ہستی پہ صداقت ان کی
مثل انجم افق قوم پہ روشن بھی ہوئے
بت ہندی کی محبت میں برہمن بھی ہوئے
شوق پرواز میں مہجور نشیمن بھی ہوئے
بے عمل تھے ہی جواں دین سے بدظن بھی ہوئے
ان کو تہذیب نے ہر بند سے آزاد کیا
لا کے کعبے سے صنم خانے میں آباد کیا
قیس زحمت کش تنہائی صحرا نہ رہے
شہر کی کھائے ہوا بادیہ پیما نہ رہے
وہ تو دیوانہ ہے بستی میں رہے یا نہ رہے
یہ ضروری ہے حجاب رخ لیلا نہ رہے
گلۂ جور نہ ہو شکوۂ بیداد نہ ہو
عشق آزاد ہے کیوں حسن بھی آزاد نہ ہو
عہد نو برق ہے آتش زن ہر خرمن ہے
ایمن اس سے کوئی صحرا نہ کوئی گلشن ہے
اس نئی آگ کا اقوام کہن ایندھن ہے
ملت ختم رسل شعلہ بہ پیراہن ہے
آج بھی ہو جو براہیم کا ایماں پیدا
آگ کر سکتی ہے انداز گلستاں پیدا
دیکھ کر رنگ چمن ہو نہ پریشاں مالی
کوکب غنچہ سے شاخیں ہیں چمکنے والی
خس و خاشاک سے ہوتا ہے گلستاں خالی
گل بر انداز ہے خون شہدا کی لالی
رنگ گردوں کا ذرا دیکھ تو عنابی ہے
یہ نکلتے ہوئے سورج کی افق تابی ہے
امتیں گلشن ہستی میں ثمر چیدہ بھی ہیں
اور محروم ثمر بھی ہیں خزاں دیدہ بھی ہیں
سیکڑوں نخل ہیں کاہیدہ بھی بالیدہ بھی ہیں
سیکڑوں بطن چمن میں ابھی پوشیدہ بھی ہیں
نخل اسلام نمونہ ہے برومندی کا
پھل ہے یہ سیکڑوں صدیوں کی چمن بندی کا
پاک ہے گرد وطن سے سر داماں تیرا
تو وہ یوسف ہے کہ ہر مصر ہے کنعاں تیرا
قافلہ ہو نہ سکے گا کبھی ویراں تیرا
غیر یک بانگ درا کچھ نہیں ساماں تیرا
نخل شمع استی و در شعلہ دو ریشۂ تو
عاقبت سوز بود سایۂ اندیشۂ تو
تو نہ مٹ جائے گا ایران کے مٹ جانے سے
نشۂ مے کو تعلق نہیں پیمانے سے
ہے عیاں یورش تاتار کے افسانے سے
پاسباں مل گئے کعبے کو صنم خانے سے
کشتئ حق کا زمانے میں سہارا تو ہے
عصر نو رات ہے دھندلا سا ستارا تو ہے
ہے جو ہنگامہ بپا یورش بلغاری کا
غافلوں کے لیے پیغام ہے بیداری کا
تو سمجھتا ہے یہ ساماں ہے دل آزاری کا
امتحاں ہے ترے ایثار کا خودداری کا
کیوں ہراساں ہے صہیل فرس اعدا سے
نور حق بجھ نہ سکے گا نفس اعدا سے
چشم اقوام سے مخفی ہے حقیقت تیری
ہے ابھی محفل ہستی کو ضرورت تیری
زندہ رکھتی ہے زمانے کو حرارت تیری
کوکب قسمت امکاں ہے خلافت تیری
وقت فرصت ہے کہاں کام ابھی باقی ہے
نور توحید کا اتمام ابھی باقی ہے
مثل بو قید ہے غنچے میں پریشاں ہو جا
رخت بر دوش ہوائے چمنستاں ہو جا
ہے تنک مایہ تو ذرے سے بیاباں ہو جا
نغمۂ موج ہے ہنگامۂ طوفاں ہو جا
قوت عشق سے ہر پست کو بالا کر دے
دہر میں اسم محمد سے اجالا کر دے
ہو نہ یہ پھول تو بلبل کا ترنم بھی نہ ہو
چمن دہر میں کلیوں کا تبسم بھی نہ ہو
یہ نہ ساقی ہو تو پھر مے بھی نہ ہو خم بھی نہ ہو
بزم توحید بھی دنیا میں نہ ہو تم بھی نہ ہو
خیمہ افلاک کا استادہ اسی نام سے ہے
نبض ہستی تپش آمادہ اسی نام سے ہے
دشت میں دامن کہسار میں میدان میں ہے
بحر میں موج کی آغوش میں طوفان میں ہے
چین کے شہر مراقش کے بیابان میں ہے
اور پوشیدہ مسلمان کے ایمان میں ہے
چشم اقوام یہ نظارہ ابد تک دیکھے
رفعت شان رفعنا لک ذکرک دیکھے
مردم چشم زمیں یعنی وہ کالی دنیا
وہ تمہارے شہدا پالنے والی دنیا
گرمی مہر کی پروردہ ہلالی دنیا
عشق والے جسے کہتے ہیں بلالی دنیا
تپش اندوز ہے اس نام سے پارے کی طرح
غوطہ زن نور میں ہے آنکھ کے تارے کی طرح
عقل ہے تیری سپر عشق ہے شمشیر تری
مرے درویش خلافت ہے جہانگیر تری
ما سوا اللہ کے لیے آگ ہے تکبیر تری
تو مسلماں ہو تو تقدیر ہے تدبیر تری
کی محمد سے وفا تو نے تو ہم تیرے ہیں
یہ جہاں چیز ہے کیا لوح و قلم تیرے ہیں

علامہ اقبال

Load More

ریختہ فاؤنڈیشن کی دیگر ویب سائٹس

تلاش

URD

Notification

Rekhta Foundation

Devoted to the preservation & promotion of Urdu

Rekhta Dictionary

A Trilingual Treasure of Urdu Words

Sufinama

Online Treasure of Sufi and Sant Poetry

Hindwi

World of Hindi language and literature

Rekhta Learning

The best way to learn Urdu online

Rekhta Books

Best of Urdu & Hindi Books

Donate

بولیے