Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "vafaat"

Nazm MATCHES FOR "vafaat"

Nazm

walid ki wafat par

tumhaarii qabr par
mai.n faatiha pa.Dhne nahii.n aayaa
mujhe maaluum thaa
tum mar nahii.n sakte
tumhaarii maut kii sachchii KHabar jis ne u.Daa.ii thii
vo jhuuTaa thaa
vo tum kab the
ko.ii suukhaa hu.aa patta havaa se mil ke TuuTaa thaa
mirii aa.nkhe.n
tumhaare manzaro.n me.n qaid hai.n ab tak
mai.n jo bhii dekhtaa huu.n
sochtaa huu.n
vo vahii hai
jo tumhaarii nek-naamii aur bad-naamii kii duniyaa thii
kahii.n kuchh bhii nahii.n badlaa
tumhaare haath merii u.ngliyo.n me.n saa.ns lete hai.n
mai.n likhne ke liye
jab bhii qalam kaaGaz uThaataa huu.n
tumhe.n baiThaa hu.aa mai.n apnii hii kursii me.n paataa huu.n
badan me.n mere jitnaa bhii lahuu hai
vo tumhaarii
laGzisho.n naakaamiyo.n ke saath bahtaa hai
mirii aavaaz me.n chhup kar
tumhaaraa zehn rahtaa hai
mirii biimaariyo.n me.n tum
mirii laachaariyo.n me.n tum
tumhaarii qabr par jis ne tumhaaraa naam likhaa hai
vo jhuuTaa hai
tumhaarii qabr me.n mai.n dafn huu.n
tum mujh me.n zinda ho
kabhii fursat mile to faatiha pa.Dhne chale aanaa

Nida Fazli
Nazm

nani-aman ki wafat par ek nazm

aaj bachpan ko dafn kar aa.e

Abdul Ahad Saaz
Nazm

muhaqqiq

ye jo ik hazrat chale aate hai.n goristaan se
ye na samjhe.n aap hai.n be-zaar apnii jaan se
aap ko yuu.nhii hai aasaar-e-qadiima se lagaav
jis tarah chuunaa Dalii, katthe ko nisbat paan se
aap ko qabro.n se ulfat ishq viiraane se hai
aap ghabraate hai.n jiite-jaagte insaan se
ko.ii kitnaa hii ba.Daa ho falsafii shaa.er adiib
umr bhar is se rahaa karte hai.n aap anjaan se
haa.n magar jaise hii paa jaataa hai be-chaara vafaat
aap us ko chaahne lagte hai.n jii se jaan se
suu.nghte hai.n der tak marhuum kii KHaak-e-lahad
phir ye farmaate hai.n uTh kar aalimaana shaan se
tuul-o-arz-e-qabr se ye saaf chaltaa hai pataa
gorkan aa.e the atraaf-e-balochistan se
ye thaa ik ruKH saahib-e-tahqiiq kii tasviir kaa
duusraa ruKH bhii bayaa.n kartaa huu.n, suniye dhyaan se
hai.n ba-zom-e-KHud muhaqqiq aap hindostaan ke
aap ne nuqte gine hai.n 'miir' ke diivaan ke
kaaTte hai.n suut ko tahqiiq ke itnaa mahiin
aap ke aage jolaahe maat hai.n iiraan ke
zer-e-tahqiiq aap ke rahte hai.n ye sab mas.ale
kis qadar chuuhe pale the ghar me.n 'momin'-KHaan ke
paa.nch baj kar paa.nch par yaa paa.nch baj kar saat par
'daaG' ne to.Daa thaa dam zaanuu pe munnii-jaan ke
'rind' ne ik bevafaa ke ishq me.n khaa.ii thii jo
vo chhurii ke zaKHm the yaa ghaav the kirpaan ke
dhun hai ye saabit kare.n, dillii thaa 'miltan' kaa vatan
aur 'saudaa' ke chachaa butcher the inglistaan ke
al-Garaz rahtii hai roz o shab yahii bas ek fikr
ko.ii gul-dasta utaare.n taaq se nisyaan ke

Raza Naqvi Vahi
Nazm

ek nazm

kabhii agar tum zamii.n se guzro zamii.n jo ham sab kii saltanat hai
to jis taraf ik kalii ke mohre pe chaa.ndnii apnaa naam KHud hai
vahaa.n zaraa der ke liye apnii umar kii raft-o-buud roko
zamii.n ko lamho.n kii baadshaahat me.n dekhnaa chaaho
is tariiqe se aarzuu.o.n ke saath dekho
ki jis tarah log apne mahbuub ke badan ko
vafaat ke vaqt dekhte hai.n

Jelani Kamran
Nazm

buDhi qismat

gaa.nv me.n maujuud vo buu.Dhaa jo puraanii
jango.n ke qisse sunaa kar
vaqt guzaarne me.n merii madad kartaa thaa
vo bhii vafaat paa chukaa hai

Manzar Latif
Nazm

nau sitambar yaum-e-wafat-e-jigar murad-abaadi

kitnii maGmuum tabii.at thii aaj
dil kii duniyaa me.n qayaamat thii aaj
yaad rah rah ke jigar aate the

Mustafa Rahi
Nazm

premchand ko KHiraj-e-aqidat

vo premchand-munshii-e-be-misl-o-be-badal
thii jis ke dam se bazm-e-adab me.n chahal-pahal
afsaane jis ke sham-e-hidaayat the bar-mahal
naa-vaqt aah ho gayaa vo luqma-e-ajal
is soz-e-jaa.n-gusil se har ik dil kabaab hai
fart-e-tapish hai aatish-e-Gam be-hisaab hai
ilmii shaGaf se us ke nahii.n kaun baa-KHabar
har qalb par fasaane hu.e naqsh kal.hajar
hai bahr-e-ilm terii ravaanii se sar-basar
daamaan-o-jeb-e-urdu-o-hindii hai.n pur-guhar
tarz-e-bayaa.n har ek kaa tuu ne dikhaa diyaa
dhabba har ik kaa apne qalam se miTaa diyaa
bazm-e-adab ko KHvaab me.n bhii ye na thaa KHayaal
unniis sau chhattiis kaa nahs hogaa us ko saal
avval vafaat-e-barq kaa us ko hu.aa malaal
phir chal diyaa jahaan se ye munshii-baa-kamaal
naqsh-e-qaraar sail-e-fanaa se miTaa hai aaj
aivaan-e-nazm-o-nasr me.n maatam bapaa hai aaj
tujh ko premchand ye shaayad nahii.n KHabar
kitnaa vafaat kaa tirii duniyaa pe hai asar
'suufii' jahaa.n me.n Dhuu.nDhtii hai us ko har nazar
ai maahtaab-e-ishq bataa tuu chhupaa kidhar
kyaa shauq saama.ii.n kaa faraamosh ho gayaa
afsaana kahte kahte jo KHud haa.e so gayaa

Rangeshwar Dayal Saxena Sufi
Nazm

katba

ik din yuu.nhii chalte chalte dil kii dha.Dkan ruk jaa.egii
nabz kii jumbish tham jaa.egii
saaraa tamaashaa jin aa.nkho.n se is duniyaa kaa dekhaa hai
vo aa.nkhe.n pathraa jaa.e.ngii
chashme jharne phuul ka.nval ke koh-o-bayaabaa.n dasht-o-daman
husn qad anaa kaa aalam sar chamelii ra.ng-e-chaman
saaGar-e-miinaa aa.nkh kii mastii aariz kaakul zulf ghaTaa
naGma KHushbuu pyaar mohabbat raqs tabassum harf-e-vafaa
sab se rishta TuuTegaa
barf kii suurat jam jaa.egaa har jazba har ik ehsaas
taariikii me.n kho jaa.egii apnii hastii apnii zaat
ik patthar par kanda hogii dhu.ndlii sii taariiKH-e-vafaat
saare shor-sharaabe kaa anjaam faqat KHaamoshii hai
in raushan lamho.n se aage aaKHirii lamha taariikii hai
vo lamha sab kii taak me.n hai bas itnaa hii yaad rakho
logo apnii qabr kaa katba apne apne saath rakho

Naseem Ansari
Nazm

ghar ka wahid mard

baazaar se vaapsii par galii me.n daaKHil hote hii
mujhe KHauf ke saath kuchh ajiib saa ehsaas hu.aa
mere haath par
bahan kii giraft ziyaada hii saKHt ho ga.ii thii
niim-taariik sunsaan galii ke biicho-biich chand naujavaan la.Dke
hamaaraa raasta roke kha.De the
vo achchhe log nahii.n lagte the
jab hii to merii baajii un se KHaufzada lag rahii thii.n
achaanak sab kuchh merii samajh me.n aa gayaa
merii bahan mujhe apne sahaare ke liye
baahar le kar jaatii thii.n
abbaa kii vafaat ke baa'd ghar ke andar mai.n hii to vaahid mard thaa
ye ehsaas hote hii
mai.n ne baajii ke haath se apnaa haath chhu.Daa liyaa
aur un ke haath ko
apnii chhoTii chhoTii u.ngliyo.n me.n mazbuutii se jaka.D kar
ba.De e'timaad ke saath nape tule qadam uThaataa
un aavaara la.Dko.n ke Gol se nikaltaa chalaa gayaa
us lamhe mujhe aisaa mahsuus hu.aa jaise mai.n saat saal ke
kisii kamzor bachche kii bajaa.e
sattaa.iis saal kaa ek tavaanaa mard huu.n

Firoz Natiq Khusro
Nazm

hijrat

amiiq hanafii kii vafaat par
mai.n ne puuchhaa ye kyaa haqiiqat hai
maut bhii ruuh kii hifaazat hai
ha.ns ke us piir ne javaab diyaa
ek bastii se duusrii bastii
terii hijrat hai merii hijrat hai

Zaheer Parvez
Nazm

biwi ki aachanak wafat par

vafaa.o.n ke abhii bandhan nibhaane kii zaruurat thii
mohabbat ke chaman me.n giit gaane kii zaruurat thii
abhii to aarzuu.o.n ke ka.nval khilne the vaarafta
jahaan-e-aab-o-gil me.n muskuraane kii zaruurat thii
abhii to ratjage dil kii umiido.n ke jagaane the
KHushii ke haath se meh.ndii lagaane kii zaruurat thii
abhii to kam-sino.n kii qismato.n ke aa.ina-KHaane
tumhaare haath se dil-kash banaane kii zaruurat thii
abhii to nekiyo.n ke sii.nch kar naKHl-e-tar-o-taaza
abhii sehn-e-sa'aadat me.n lagaane kii zaruurat thii
abhii to zindagii kii manzilo.n me.n kaarvaa.n chalte
abhii to manzilo.n me.n saath jaane kii zaruurat thii
mohabbat ke gulistaa.n me.n vafaa ke bel-buuTo.n ko
nigaaristaan-e-duniyaa me.n sajaane kii zaruurat thii
shab-e-aaKHir to mil ke ham ne thaa ahd-e-vafaa baa.ndhaa
dar-e-aqdas muqaddar aazmaane kii zaruurat thii
achaanak ho ga.ii aabaad tuu shahr-e-KHamoshaa.n me.n
abhii to ziist kaa maskan basaane kii zaruurat thii
mohabbat se bahut guzrii hamaarii zindagii lekin
abhii to zindagii mil kar nibhaane kii zaruurat thii
hamaarii bad-nasiibii hai ki tum ne muu.nd lii.n aa.nkhe.n
nigaaho.n se abhii saaGar pilaane kii zaruurat thii
judaa.ii ne mirii mujh ko anokhii talKHiyaa.n baKHshii.n
mujhe to talKHiyaa.n pahlii bhulaane kii zaruurat thii
dayaar-e-shauq ke zulmat-kado.n me.n ghup a.ndheraa hai
mohabbat kii abhii sham'e.n jalaane kii zaruurat thii
mohabbat saadgii sabr-o-qanaa'at the tire zevar
yahii zevar aqaarib ko dikhaane kii zaruurat thii
na shaukat se ta'alluq thaa na daulat kii tujhe KHvaahish
huzuur-e-'ishq me.n sar ko jhukaane kii zaruurat thii
qayaamat se nahii.n hai kam achaanak yuu.n bichha.D jaanaa
abhii ahvaal-e-KHud-biitii sunaane kii zaruurat thii
banaane the abhii ham ne tamannaa.o.n ke miinaare
rifaaqat ke jaziiro.n ko basaane kii zaruurat thii
KHudaa ke baa'd bando.n me.n yahii hai mudda'aa maqsad
faqat 'aish-e-hazii.n se daad paane kii zaruurat thii

Ain Shujabadi
Nazm

maqam-e-saKHt par nigah

mai.n ne apnii dukh bharii vafaat
apnii zindagii kii aaKHirii taviil raat
bhaarii raat dekh lii

Iqtidar Javed
Nazm

bhali si ek shakl thi

na muddato.n judaa rahe
na saath sub.h-o-shaam ho
na rishta-e-vafaa pe zid
na ye ki izn-e-aam ho

Ahmad Faraz
Nazm

shikwa

kyuu.n ziyaa.n-kaar banuu.n suud-faraamosh rahuu.n
fikr-e-fardaa na karuu.n mahv-e-Gam-e-dosh rahuu.n
naale bulbul ke sunuu.n aur hama-tan gosh rahuu.n
ham-navaa mai.n bhii ko.ii gul huu.n ki KHaamosh rahuu.n
jur.at-aamoz mirii taab-e-suKHan hai mujh ko
shikva allaah se KHaakam-ba-dahan hai mujh ko
hai bajaa sheva-e-tasliim me.n mash.huur hai.n ham
qissa-e-dard sunaate hai.n ki majbuur hai.n ham
saaz KHaamosh hai.n fariyaad se maamuur hai.n ham
naala aataa hai agar lab pe to ma.azuur hai.n ham
ai KHudaa shikva-e-arbaab-e-vafaa bhii sun le
KHuugar-e-hamd se tho.Daa saa gila bhii sun le
thii to maujuud azal se hii tirii zaat-e-qadiim
phuul thaa zeb-e-chaman par na pareshaa.n thii shamiim
shart insaaf hai ai saahib-e-altaaf-e-amiim
buu-e-gul phailtii kis tarah jo hotii na nasiim
ham ko jam.iiyat-e-KHaatir ye pareshaanii thii
varna ummat tire mahbuub kii diivaanii thii
ham se pahle thaa ajab tere jahaa.n kaa manzar
kahii.n masjuud the patthar kahii.n ma.abuud shajar
KHuugar-e-paikar-e-mahsuus thii insaa.n kii nazar
maantaa phir ko.ii an-dekhe KHudaa ko kyuu.nkar
tujh ko ma.aluum hai letaa thaa ko.ii naam tiraa
quvvat-e-baazu-e-muslim ne kiyaa kaam tiraa
bas rahe the yahii.n saljuuq bhii tuuraanii bhii
ahl-e-chii.n chiin me.n iiraan me.n saasaanii bhii
isii maamuure me.n aabaad the yuunaanii bhii
isii duniyaa me.n yahuudii bhii the nasraanii bhii
par tire naam pe talvaar uThaa.ii kis ne
baat jo big.Dii hu.ii thii vo banaa.ii kis ne
the hamii.n ek tire maarka-aaraa.o.n me.n
KHushkiyo.n me.n kabhii la.Dte kabhii dariyaa.o.n me.n
dii.n azaane.n kabhii europe ke kaliisaa.o.n me.n
kabhii africa ke tapte hu.e sahraa.o.n me.n
shaan aa.nkho.n me.n na jachtii thii jahaa.n-daaro.n kii
kalma pa.Dhte the hamii.n chhaa.nv me.n talvaaro.n kii
ham jo jiite the to jango.n kii musiibat ke liye
aur marte the tire naam kii azmat ke liye
thii na kuchh teGzanii apnii hukuumat ke liye
sar-ba-kaf phirte the kyaa dahr me.n daulat ke liye
qaum apnii jo zar-o-maal-e-jahaa.n par martii
but-faroshii ke evaz but-shikanii kyuu.n kartii
Tal na sakte the agar jang me.n a.D jaate the
paa.nv shero.n ke bhii maidaa.n se ukha.D jaate the
tujh se sarkash hu.aa ko.ii to biga.D jaate the
teG kyaa chiiz hai ham top se la.D jaate the
naqsh-e-tauhiid kaa har dil pe biThaayaa ham ne
zer-e-KHanjar bhii ye paiGaam sunaayaa ham ne
tuu hii kah de ki ukhaa.Daa dar-e-KHaibar kis ne
shahr qaisar kaa jo thaa us ko kiyaa sar kis ne
to.De maKHluuq KHudaa-vando.n ke paikar kis ne
kaaT kar rakh diye kuffaar ke lashkar kis ne
kis ne ThanDaa kiyaa aatish-kada-e-iiraa.n ko
kis ne phir zinda kiyaa tazkira-e-yazdaa.n ko
kaun sii qaum faqat terii talabgaar hu.ii
aur tere liye zahmat-kash-e-paikaar hu.ii
kis kii shamshiir jahaa.ngiir jahaa.n-daar hu.ii
kis kii takbiir se duniyaa tirii bedaar hu.ii
kis kii haibat se sanam sahme hu.e rahte the
mu.nh ke bal gir ke huu-allahu-ahad kahte the
aa gayaa ain la.Daa.ii me.n agar vaqt-e-namaaz
qibla-ruu ho ke zamii.n-bos hu.ii qaum-e-hijaaz
ek hii saf me.n kha.De ho ga.e mahmuud o ayaaz
na ko.ii banda rahaa aur na ko.ii banda-navaaz
banda o saahab o mohtaaj o Ganii ek hu.e
terii sarkaar me.n pahu.nche to sabhii ek hu.e
mahfil-e-kaun-o-makaa.n me.n sahar o shaam phire
mai-e-tauhiid ko le kar sifat-e-jaam phire
koh me.n dasht me.n le kar tiraa paiGaam phire
aur ma.aluum hai tujh ko kabhii naakaam phire
dasht to dasht hai.n dariyaa bhii na chho.De ham ne
bahr-e-zulmaat me.n dau.Daa diye gho.De ham ne
safha-e-dahr se baatil ko miTaayaa ham ne
nau-e-insaa.n ko Gulaamii se chhu.Daayaa ham ne
tere ka.abe ko jabiino.n se basaayaa ham ne
tere qur.aan ko siino.n se lagaayaa ham ne
phir bhii ham se ye gila hai ki vafaadaar nahii.n
ham vafaadaar nahii.n tuu bhii to dildaar nahii.n
ummate.n aur bhii hai.n un me.n gunahgaar bhii hai.n
ijz vaale bhii hai.n mast-e-mai-e-pindaar bhii hai.n
un me.n kaahil bhii hai.n Gaafil bhii hai.n hushyaar bhii hai.n
saik.Do.n hai.n ki tire naam se be-zaar bhii hai.n
rahmate.n hai.n tirii aGyaar ke kaashaano.n par
barq girtii hai to bechaare musalmaano.n par
but sanam-KHaano.n me.n kahte hai.n musalmaan ga.e
hai KHushii un ko ki ka.abe ke nigahbaan ga.e
manzil-e-dahr se uu.nTo.n ke hudii-KHvaan ga.e
apnii baGlo.n me.n dabaa.e hu.e qur.aan ga.e
KHanda-zan kufr hai ehsaas tujhe hai ki nahii.n
apnii tauhiid kaa kuchh paas tujhe hai ki nahii.n
ye shikaayat nahii.n hai.n un ke KHazaane maamuur
nahii.n mahfil me.n jinhe.n baat bhii karne kaa shu.uur
qahr to ye hai ki kaafir ko mile.n huur o qusuur
aur bechaare musalmaa.n ko faqat vaada-e-huur
ab vo altaaf nahii.n ham pe inaayaat nahii.n
baat ye kyaa hai ki pahlii sii mudaaraat nahii.n
kyuu.n musalmaano.n me.n hai daulat-e-duniyaa naayaab
terii qudrat to hai vo jis kii na had hai na hisaab
tuu jo chaahe to uThe siina-e-sahraa se habaab
rah-rav-e-dasht ho sailii-zada-e-mauj-e-saraab
taan-e-aGyaar hai rusvaa.ii hai naadaarii hai
kyaa tire naam pe marne kaa evaz KHvaarii hai
banii aGyaar kii ab chaahne vaalii duniyaa
rah ga.ii apne liye ek KHayaalii duniyaa
ham to ruKHsat hu.e auro.n ne sa.nbhaalii duniyaa
phir na kahnaa hu.ii tauhiid se KHaalii duniyaa
ham to jiite hai.n ki duniyaa me.n tiraa naam rahe
kahii.n mumkin hai ki saaqii na rahe jaam rahe
terii mahfil bhii ga.ii chaahne vaale bhii ga.e
shab kii aahe.n bhii ga.ii.n sub.h ke naale bhii ga.e
dil tujhe de bhii ga.e apnaa sila le bhii ga.e
aa ke baiThe bhii na the aur nikaale bhii ga.e
aa.e ushshaaq ga.e vaada-e-fardaa le kar
ab unhe.n Dhuu.nD charaaG-e-ruKH-e-zebaa le kar
dard-e-lailaa bhii vahii qais kaa pahluu bhii vahii
najd ke dasht o jabal me.n ram-e-aahuu bhii vahii
ishq kaa dil bhii vahii husn kaa jaaduu bhii vahii
ummat-e-ahmad-e-mursil bhii vahii tuu bhii vahii
phir ye aazurdagi-e-Gair sabab kyaa ma.anii
apne shaidaa.o.n pe ye chashm-e-Gazab kyaa ma.anii
tujh ko chho.Daa ki rasuul-e-arabii ko chho.Daa
but-garii pesha kiyaa but-shikanii ko chho.Daa
ishq ko ishq kii aashufta-sarii ko chho.Daa
rasm-e-salmaan o uvais-e-qaranii ko chho.Daa
aag takbiir kii siino.n me.n dabii rakhte hai.n
zindagii misl-e-bilaal-e-habashii rakhte hai.n
ishq kii KHair vo pahlii sii adaa bhii na sahii
jaada-paimaali-e-tasliim-o-razaa bhii na sahii
muztarib dil sifat-e-qibla-numaa bhii na sahii
aur paabandi-e-aa.iin-e-vafaa bhii na sahii
kabhii ham se kabhii Gairo.n se shanaasaa.ii hai
baat kahne kii nahii.n tuu bhii to harjaa.ii hai
sar-e-faaraa.n pe kiyaa diin ko kaamil tuu ne
ik ishaare me.n hazaaro.n ke liye dil tuu ne
aatish-andoz kiyaa ishq kaa haasil tuu ne
phuu.nk dii garmi-e-ruKHsaar se mahfil tuu ne
aaj kyuu.n siine hamaare sharer-aabaad nahii.n
ham vahii soKHta-saamaa.n hai.n tujhe yaad nahii.n
vaadii-e-najd me.n vo shor-e-salaasil na rahaa
qais diivaana-e-nazzaara-e-mahmil na rahaa
hausle vo na rahe ham na rahe dil na rahaa
ghar ye uj.Daa hai ki tuu raunaq-e-mahfil na rahaa
ai KHushaa aa.n roz ki aa.ii o ba-sad naaz aa.ii
be-hijaabaana suu-e-mahfil-e-maa baaz aa.ii
baada-kash Gair hai.n gulshan me.n lab-e-juu baiThe
sunte hai.n jaam-ba-kaf naGma-e-kuu-kuu baiThe
daur ha.ngaama-e-gulzaar se yaksuu baiThe
tere diivaane bhii hai.n muntazir-e-huu baiThe
apne parvaano.n ko phir zauq-e-KHud-afrozii de
barq-e-deriina ko farmaan-e-jigar-sozii de
qaum-e-aavaara inaa.n-taab hai phir suu-e-hijaaz
le u.Daa bulbul-e-be-par ko mazaaq-e-parvaaz
muztarib-e-baaG ke har Gunche me.n hai buu-e-niyaaz
tuu zaraa chhe.D to de tishna-e-mizraab hai saaz
naGme betaab hai.n taaro.n se nikalne ke liye
tuur muztar hai usii aag me.n jalne ke liye
mushkile.n ummat-e-marhuum kii aasaa.n kar de
mor-e-be-maaya ko ham-dosh-e-sulaimaa.n kar de
jins-e-naayaab-e-mohabbat ko phir arzaa.n kar de
hind ke dair-nashiino.n ko musalmaa.n kar de
juu-e-KHuu.n mii chakad az hasrat-e-dairiina-e-maa
mii tapad naala ba-nishtar kada-e-siina-e-maa
buu-e-gul le ga.ii bairuun-e-chaman raaz-e-chaman
kyaa qayaamat hai ki KHud phuul hai.n Gammaaz-e-chaman
ahd-e-gul KHatm hu.aa TuuT gayaa saaz-e-chaman
u.D ga.e Daaliyo.n se zamzama-pardaaz-e-chaman
ek bulbul hai ki mahv-e-tarannum ab tak
us ke siine me.n hai naGmo.n kaa talaatum ab tak
qumriyaa.n shaaKH-e-sanobar se gurezaa.n bhii hu.ii.n
pattiyaa.n phuul kii jha.D jha.D ke pareshaa.n bhii hu.ii.n
vo puraanii raushe.n baaG kii viiraa.n bhii hu.ii.n
Daaliyaa.n pairahan-e-barg se uryaa.n bhii hu.ii.n
qaid-e-mausam se tabii.at rahii aazaad us kii
kaash gulshan me.n samajhtaa ko.ii fariyaad us kii
lutf marne me.n hai baaqii na maza jiine me.n
kuchh maza hai to yahii KHuun-e-jigar piine me.n
kitne betaab hai.n jauhar mire aa.iine me.n
kis qadar jalve ta.Dapte hai.n mire siine me.n
is gulistaa.n me.n magar dekhne vaale hii nahii.n
daaG jo siine me.n rakhte ho.n vo laale hii nahii.n
chaak is bulbul-e-tanhaa kii navaa se dil ho.n
jaagne vaale isii baa.ng-e-daraa se dil ho.n
ya.anii phir zinda na.e ahd-e-vafaa se dil ho.n
phir isii baada-e-dairiina ke pyaase dil ho.n
ajamii KHum hai to kyaa mai to hijaazii hai mirii
naGma hindii hai to kyaa lai to hijaazii hai mirii

Allama Iqbal
Nazm

mujhse pahle

mai.n ne maanaa ki vo begaana-e-paimaan-e-vafaa
kho chukaa hai jo kisii aur kii ra.anaa.ii me.n
shaayad ab lauT ke aa.e na tirii mahfil me.n
aur ko.ii dukh na rulaa.e tujhe tanhaa.ii me.n

Ahmad Faraz
Nazm

jawab-e-shikwa

dil se jo baat nikaltii hai asar rakhtii hai
par nahii.n taaqat-e-parvaaz magar rakhtii hai
qudsi-ul-asl hai rif.at pe nazar rakhtii hai
KHaak se uThtii hai garduu.n pe guzar rakhtii hai
ishq thaa fitnagar o sarkash o chaalaak miraa
aasmaa.n chiir gayaa naala-e-bebaak miraa
piir-e-garduu.n ne kahaa sun ke kahii.n hai ko.ii
bole sayyaare sar-e-arsh-e-barii.n hai ko.ii
chaa.nd kahtaa thaa nahii.n ahl-e-zamii.n hai ko.ii
kahkashaa.n kahtii thii poshiida yahii.n hai ko.ii
kuchh jo samjhaa mire shikve ko to rizvaa.n samjhaa
mujh ko jannat se nikaalaa hu.aa insaa.n samjhaa
thii farishto.n ko bhii hairat ki ye aavaaz hai kyaa
arsh vaalo.n pe bhii khultaa nahii.n ye raaz hai kyaa
taa-sar-e-arsh bhii insaa.n kii tag-o-taaz hai kyaa
aa ga.ii KHaak kii chuTkii ko bhii parvaaz hai kyaa
Gaafil aadaab se sukkaan-e-zamii.n kaise hai.n
shoKH o gustaaKH ye pastii ke makii.n kaise hai.n
is qadar shoKH ki allaah se bhii barham hai
thaa jo masjuud-e-malaa.ik ye vahii aadam hai
aalim-e-kaif hai daanaa-e-rumuuz-e-kam hai
haa.n magar ijz ke asraar se naa-mahram hai
naaz hai taaqat-e-guftaar pe insaano.n ko
baat karne kaa saliiqa nahii.n naa-daano.n ko
aa.ii aavaaz Gam-a.ngez hai afsaana tiraa
ashk-e-betaab se labrez hai paimaana tiraa
aasmaa.n-giir hu.aa naara-e-mastaana tiraa
kis qadar shoKH-zabaa.n hai dil-e-diivaana tiraa
shukr shikve ko kiyaa husn-e-adaa se tuu ne
ham-suKHan kar diyaa bando.n ko KHudaa se tuu ne
ham to maa.il-ba-karam hai.n ko.ii saa.il hii nahii.n
raah dikhlaa.e.n kise rah-rav-e-manzil hii nahii.n
tarbiyat aam to hai jauhar-e-qaabil hii nahii.n
jis se ta.amiir ho aadam kii ye vo gil hii nahii.n
ko.ii qaabil ho to ham shaan-e-ka.ii dete hai.n
Dhuu.nDne vaalo.n ko duniyaa bhii na.ii dete hai.n
haath be-zor hai.n ilhaad se dil KHuugar hai.n
ummatii baa.is-e-rusvaa.i-e-paiGambar hai.n
but-shikan uTh ga.e baaqii jo rahe but-gar hai.n
thaa braahiim pidar aur pisar aazar hai.n
baada-aashaam na.e baada nayaa KHum bhii na.e
haram-e-kaaba nayaa but bhii na.e tum bhii na.e
vo bhii din the ki yahii maaya-e-raanaa.ii thaa
naazish-e-mausam-e-gul laala-e-sahraa.ii thaa
jo musalmaan thaa allaah kaa saudaa.ii thaa
kabhii mahbuub tumhaaraa yahii harjaa.ii thaa
kisii yakjaa.ii se ab ahd-e-Gulaamii kar lo
millat-e-ahmad-e-mursil ko maqaamii kar lo
kis qadar tum pe giraa.n sub.h kii bedaarii hai
ham se kab pyaar hai haa.n nii.nd tumhe.n pyaarii hai
tab-e-aazaad pe qaid-e-ramazaa.n bhaarii hai
tumhii.n kah do yahii aa.iin-e-vafaadaarii hai
qaum maz.hab se hai maz.hab jo nahii.n tum bhii nahii.n
jazb-e-baaham jo nahii.n mahfil-e-anjum bhii nahii.n
jin ko aataa nahii.n duniyaa me.n ko.ii fan tum ho
nahii.n jis qaum ko parvaa-e-nasheman tum ho
bijliyaa.n jis me.n ho.n aasuuda vo KHirman tum ho
bech khaate hai.n jo aslaaf ke madfan tum ho
ho niko naam jo qabro.n kii tijaarat kar ke
kyaa na bechoge jo mil jaa.e.n sanam patthar ke
safha-e-dahr se baatil ko miTaayaa kis ne
nau-e-insaa.n ko Gulaamii se chhu.Daayaa kis ne
mere ka.abe ko jabiino.n se basaayaa kis ne
mere qur.aan ko siino.n se lagaayaa kis ne
the to aabaa vo tumhaare hii magar tum kyaa ho
haath par haath dhare muntazir-e-fardaa ho
kyaa kahaa bahr-e-musalmaa.n hai faqat vaada-e-huur
shikva bejaa bhii kare ko.ii to laazim hai shu.uur
adl hai faatir-e-hastii kaa azal se dastuur
muslim aa.ii.n hu.aa kaafir to mile huur o qusuur
tum me.n huuro.n kaa ko.ii chaahne vaalaa hii nahii.n
jalva-e-tuur to maujuud hai muusaa hii nahii.n
manfa.at ek hai is qaum kaa nuqsaan bhii ek
ek hii sab kaa nabii diin bhii iimaan bhii ek
haram-e-paak bhii allaah bhii qur.aan bhii ek
kuchh ba.Dii baat thii hote jo musalmaan bhii ek
firqa-bandii hai kahii.n aur kahii.n zaate.n hai.n
kyaa zamaane me.n panapne kii yahii baate.n hai.n
kaun hai taarik-e-aa.iin-e-rasuul-e-muKHtaar
maslahat vaqt kii hai kis ke amal kaa me.aar
kis kii aa.nkho.n me.n samaayaa hai shi.aar-e-aGyaar
ho ga.ii kis kii nigah tarz-e-salaf se be-zaar
qalb me.n soz nahii.n ruuh me.n ehsaas nahii.n
kuchh bhii paiGaam-e-mohammad kaa tumhe.n paas nahii.n
jaa ke hote hai.n masaajid me.n saf-aaraa to Gariib
zahmat-e-roza jo karte hai.n gavaaraa to Gariib
naam letaa hai agar ko.ii hamaaraa to Gariib
parda rakhtaa hai agar ko.ii tumhaaraa to Gariib
umaraa nashsha-e-daulat me.n hai.n Gaafil ham se
zinda hai millat-e-baizaa Gorabaa ke dam se
vaa.iz-e-qaum kii vo puKHta-KHayaalii na rahii
barq-e-tab.ii na rahii shola-maqaalii na rahii
rah ga.ii rasm-e-azaa.n ruuh-e-bilaalii na rahii
falsafa rah gayaa talqiin-e-Gazaalii na rahii
masjide.n marsiyaa.n-KHvaa.n hai.n ki namaazii na rahe
yaanii vo sahib-e-ausaaf-e-hijaazii na rahe
shor hai ho ga.e duniyaa se musalmaa.n naabuud
ham ye kahte hai.n ki the bhii kahii.n muslim maujuud
vaz.a me.n tum ho nasaaraa to tamaddun me.n hunuud
ye musalmaa.n hai.n jinhe.n dekh ke sharmaa.e.n yahuud
yuu.n to sayyad bhii ho mirzaa bhii ho afGaan bhii ho
tum sabhii kuchh ho bataa.o to musalmaan bhii ho
dam-e-taqriir thii muslim kii sadaaqat bebaak
adl us kaa thaa qavii laus-e-maraa.aat se paak
shajar-e-fitrat-e-muslim thaa hayaa se namnaak
thaa shujaa.at me.n vo ik hasti-e-fauq-ul-idraak
KHud-gudaazii nam-e-kaifiyat-e-sahbaa-yash buud
KHaalii-az-KHesh shudan suurat-e-miinaa-yash buud
har musalmaa.n rag-e-baatil ke liye nashtar thaa
us ke aa.iina-e-hastii me.n amal jauhar thaa
jo bharosaa thaa use quvvat-e-baazuu par thaa
hai tumhe.n maut kaa Dar us ko KHudaa kaa Dar thaa
baap kaa ilm na beTe ko agar azbar ho
phir pisar qaabil-e-miiraas-e-pidar kyuu.nkar ho
har ko.ii mast-e-mai-e-zauq-e-tan-aasaanii hai
tum musalmaa.n ho ye andaaz-e-musalmaanii hai
haidarii faqr hai ne daulat-e-usmaanii hai
tum ko aslaaf se kyaa nisbat-e-ruuhaanii hai
vo zamaane me.n mu.azziz the musalmaa.n ho kar
aur tum KHvaar hu.e taarik-e-qur.aa.n ho kar
tum ho aapas me.n Gazabnaak vo aapas me.n rahiim
tum KHataa-kaar o KHataa-bii.n vo KHataa-posh o kariim
chaahte sab hai.n ki ho.n auj-e-surayyaa pe muqiim
pahle vaisaa ko.ii paidaa to kare qalb-e-saliim
taKHt-e-faGfuur bhii un kaa thaa sariir-e-ka.e bhii
yuu.n hii baate.n hai.n ki tum me.n vo hamiyat hai bhii
KHud-kushii sheva tumhaaraa vo Gayuur o KHuddaar
tum uKHuvvat se gurezaa.n vo uKHuvvat pe nisaar
tum ho guftaar saraapaa vo saraapaa kirdaar
tum taraste ho kalii ko vo gulistaa.n ba-kanaar
ab talak yaad hai qaumo.n ko hikaayat un kii
naqsh hai safha-e-hastii pe sadaaqat un kii
misl-e-anjum ufuq-e-qaum pe raushan bhii hu.e
but-e-hindii kii mohabbat me.n birhman bhii hu.e
shauq-e-parvaaz me.n mahjuur-e-nasheman bhii hu.e
be-amal the hii javaa.n diin se bad-zan bhii hu.e
in ko tahziib ne har band se aazaad kiyaa
laa ke ka.abe se sanam-KHaane me.n aabaad kiyaa
qais zahmat-kash-e-tanhaa.i-e-sahraa na rahe
shahr kii khaa.e havaa baadiya-paimaa na rahe
vo to diivaana hai bastii me.n rahe yaa na rahe
ye zaruurii hai hijaab-e-ruKH-e-lailaa na rahe
gila-e-zaur na ho shikva-e-bedaad na ho
ishq aazaad hai kyuu.n husn bhii aazaad na ho
ahd-e-nau barq hai aatish-zan-e-har-KHirman hai
aiman is se ko.ii sahraa na ko.ii gulshan hai
is na.ii aag kaa aqvaam-e-kuhan ii.ndhan hai
millat-e-KHatm-e-rusul shola-ba-pairaahan hai
aaj bhii ho jo braahiim kaa iimaa.n paidaa
aag kar saktii hai andaaz-e-gulistaa.n paidaa
dekh kar ra.ng-e-chaman ho na pareshaa.n maalii
Kaukab-e-Guncha se shaaKHe.n hai.n chamakne vaalii
KHas o KHaashaak se hotaa hai gulistaa.n KHaalii
Gul-bar-andaaz hai KHuun-e-shohdaa kii laalii
ra.ng garduu.n kaa zaraa dekh to unnaabii hai
ye nikalte hu.e suuraj kii ufuq-taabii hai
ummate.n gulshan-e-hastii me.n samar-chiida bhii hai.n
aur mahruum-e-samar bhii hai.n KHizaa.n-diida bhii hai.n
saik.Do.n naKHl hai.n kaahiida bhii baaliida bhii hai.n
saik.Do.n batn-e-chaman me.n abhii poshiida bhii hai.n
naKHl-e-islaam namuuna hai birau-mandii kaa
phal hai ye saik.Do.n sadiyo.n kii chaman-bandii kaa
paak hai gard-e-vatan se sar-e-daamaa.n teraa
tuu vo yuusuf hai ki har misr hai kan.aa.n teraa
qaafila ho na sakegaa kabhii viiraa.n teraa
Gair yak-baa.ng-e-daraa kuchh nahii.n saamaa.n teraa
naKHl-e-shama astii o dar shola do-resha-e-tuu
aaqibat-soz bavad saaya-e-andesha-e-tuu
tuu na miT jaa.egaa iiraan ke miT jaane se
nashsha-e-mai ko ta'alluq nahii.n paimaane se
hai ayaa.n yurish-e-taataar ke afsaane se
paasbaa.n mil ga.e ka.abe ko sanam-KHaane se
kashti-e-haq kaa zamaane me.n sahaaraa tuu hai
asr-e-nau-raat hai dhundlaa saa sitaaraa tuu hai
hai jo ha.ngaama bapaa yurish-e-bulGaarii kaa
Gaafilo.n ke liye paiGaam hai bedaarii kaa
tuu samajhtaa hai ye saamaa.n hai dil-aazaarii kaa
imtihaa.n hai tire iisaar kaa KHuddaarii kaa
kyuu.n hiraasaa.n hai sahiil-e-faras-e-aadaa se
nuur-e-haq bujh na sakegaa nafas-e-aadaa se
chashm-e-aqvaam se maKHfii hai haqiiqat terii
hai abhii mahfil-e-hastii ko zaruurat terii
zinda rakhtii hai zamaane ko haraarat terii
kaukab-e-qismat-e-imkaa.n hai KHilaafat terii
vaqt-e-fursat hai kahaa.n kaam abhii baaqii hai
nuur-e-tauhiid kaa itmaam abhii baaqii hai
misl-e-buu qaid hai Gunche me.n pareshaa.n ho jaa
raKHt-bar-dosh havaa-e-chamanistaa.n ho jaa
hai tunak-maaya tuu zarre se bayaabaa.n ho jaa
naGma-e-mauj hai ha.ngaama-e-tuufaa.n ho jaa
quvvat-e-ishq se har past ko baalaa kar de
dahr me.n ism-e-mohammad se ujaalaa kar de
ho na ye phuul to bulbul kaa tarannum bhii na ho
chaman-e-dahr me.n kaliyo.n kaa tabassum bhii na ho
ye na saaqii ho to phir mai bhii na ho KHum bhii na ho
bazm-e-tauhiid bhii duniyaa me.n na ho tum bhii na ho
KHema-e-aflaak kaa istaada isii naam se hai
nabz-e-hastii tapish-aamaada isii naam se hai
dasht me.n daaman-e-kohsaar me.n maidaan me.n hai
bahr me.n mauj kii aaGosh me.n tuufaan me.n hai
chiin ke shahr maraaqash ke bayaabaan me.n hai
aur poshiida musalmaan ke iimaan me.n hai
chashm-e-aqvaam ye nazzaara abad tak dekhe
rif.at-e-shaan-e-rafaanaa-lakaa-zikrak dekhe
mardum-e-chashm-e-zamii.n yaanii vo kaalii duniyaa
vo tumhaare shohdaa paalne vaalii duniyaa
garmii-e-mehr kii parvarda hilaalii duniyaa
ishq vaale jise kahte hai.n bilaalii duniyaa
tapish-andoz hai is naam se paare kii tarah
Gota-zan nuur me.n hai aa.nkh ke taare kii tarah
aql hai terii sipar ishq hai shamshiir tirii
mire darvesh KHilaafat hai jahaa.ngiir tirii
maa-sivaa-allaah ke liye aag hai takbiir tirii
tuu musalmaa.n ho to taqdiir hai tadbiir tirii
kii mohammad se vafaa tuu ne to ham tere hai.n
ye jahaa.n chiiz hai kyaa lauh-o-qalam tere hai.n

Allama Iqbal
Nazm

nisar main teri galiyon ke

gar aaj tujh se judaa hai.n to kal baham ho.nge
ye raat bhar kii judaa.ii to ko.ii baat nahii.n
gar aaj auj pe hai taala-e-raqiib to kyaa
ye chaar din kii KHudaa.ii to ko.ii baat nahii.n
jo tujh se ahd-e-vafaa ustuvaar rakhte hai.n
ilaaj-e-gardish-e-lail-o-nahaar rakhte hai.n

Faiz Ahmad Faiz
Nazm

ye mahlon ye taKHton ye tajon ki duniya

ye duniyaa jahaa.n aadmii kuchh nahii.n hai
vafaa kuchh nahii.n dostii kuchh nahii.n hai
jahaa.n pyaar kii qadr hii kuchh nahii.n hai
ye duniyaa agar mil bhii jaa.e to kyaa hai

Sahir Ludhianvi
Nazm

farz karo

farz karo ham ahl-e-vafaa ho.n, farz karo diivaane ho.n
farz karo ye dono.n baate.n jhuuTii ho.n afsaane ho.n

Ibn۔e۔Insha
Nazm

taj-mahal

merii mahbuub pas-e-parda-e-tash.hiir-e-vafaa
tuu ne satvat ke nishaano.n ko to dekhaa hotaa

Sahir Ludhianvi
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now