عدو پر اشعار

یہی ہے آزمانا تو ستانا کس کو کہتے ہیں

عدو کے ہو لیے جب تم تو میرا امتحاں کیوں ہو

جس زخم کی ہو سکتی ہو تدبیر رفو کی

لکھ دیجیو یا رب اسے قسمت میں عدو کی

عدو کو چھوڑ دو پھر جان بھی مانگو تو حاضر ہے

تم ایسا کر نہیں سکتے تو ایسا ہو نہیں سکتا

میں جس کو اپنی گواہی میں لے کے آیا ہوں

عجب نہیں کہ وہی آدمی عدو کا بھی ہو

گو آپ نے جواب برا ہی دیا ولے

مجھ سے بیاں نہ کیجے عدو کے پیام کو

یاں تک عدو کا پاس ہے ان کو کہ بزم میں

وہ بیٹھتے بھی ہیں تو مرے ہم نشیں سے دور

سہل ہو گرچہ عدو کو مگر اس کا ملنا

اتنا میں خوب سمجھتا ہوں کہ آساں تو نہیں

اول اہل قبیلہ نے پرچم بنایا اسے اور پھر

پیش دشمن بھی تاوان میں صرف میری ردا لے گئے

میں آپ اپنی مخالف تھی اپنی دشمن تھی

مجھے ہی مجھ سے یہ اچھا کیا جدا کر کے

تم تو سن پائے نہ آواز شکست دل بھی

کچھ ہمیں تھے کہ حریف غم دنیا بھی ہوئے