shaam ko jis vaqt ḳhālī haath ghar jaatā huuñ maiñ

muskurā dete haiñ bachche aur mar jaatā huuñ maiñ

sham ko jis waqt KHali hath ghar jata hun main

muskura dete hain bachche aur mar jata hun main

kisī din zindagānī meñ karishma kyuuñ nahīñ hotā

maiñ har din jaag to jaatā huuñ zinda kyuuñ nahīñ hotā

kisi din zindagani mein karishma kyun nahin hota

main har din jag to jata hun zinda kyun nahin hota

yahāñ har shaḳhs har pal hādsa hone se Dartā hai

khilaunā hai jo miTTī kā fanā hone se Dartā hai

yahan har shaKHs har pal hadsa hone se Darta hai

khilauna hai jo miTTi ka fana hone se Darta hai

jitnī baTnī thī baT chukī ye zamīñ

ab to bas āsmān baaqī hai

jitni baTni thi baT chuki ye zamin

ab to bas aasman baqi hai

mire dil ke kisī kone meñ ik ma.asūm sā bachcha

baḌoñ kī dekh kar duniyā baḌā hone se Dartā hai

mere dil ke kisi kone mein ek masum sa bachcha

baDon ki dekh kar duniya baDa hone se Darta hai

ye jo zindagī kī kitāb hai ye kitāb bhī kyā kitāb hai

kahīñ ik hasīn sā ḳhvāb hai kahīñ jān-levā azaab hai

ye jo zindagi ki kitab hai ye kitab bhi kya kitab hai

kahin ek hasin sa KHwab hai kahin jaan-lewa azab hai

kyā jaane kis jahāñ meñ milegā hameñ sukūn

nārāz haiñ zamīñ se ḳhafā āsmāñ se ham

kya jaane kis jahan mein milega hamein sukun

naraaz hain zamin se KHafa aasman se hum

dil bhī ik zid pe aḌā hai kisī bachche kī tarah

yā to sab kuchh hī ise chāhiye yā kuchh bhī nahīñ

dil bhi ek zid pe aDa hai kisi bachche ki tarah

ya to sab kuchh hi ise chahiye ya kuchh bhi nahin

kis ne paayā sukūn duniyā meñ

zindagānī kā sāmnā kar ke

kis ne paya sukun duniya mein

zindagani ka samna kar ke

maiñ ne to ba.ad meñ toḌā thā ise

ā.īna mujh pe hañsā thā pahle

main ne to baad mein toDa tha ise

aaina mujh pe hansa tha pahle

dostoñ kā kyā hai vo to yuuñ bhī mil jaate haiñ muft

roz ik sach bol kar dushman kamāne chāhiyeñ

doston ka kya hai wo to yun bhi mil jate hain muft

roz ek sach bol kar dushman kamane chahiyen

kaun paḌhtā hai yahāñ khol ke ab dil kī kitāb

ab to chehre ko hī aḳhbār kiyā jaanā hai

kaun paDhta hai yahan khol ke ab dil ki kitab

ab to chehre ko hi aKHbar kiya jaana hai

kuchh parindoñ ko to bas do chaar daane chāhiyeñ

kuchh ko lekin āsmānoñ ke ḳhazāne chāhiyeñ

kuchh parindon ko to bas do chaar dane chahiyen

kuchh ko lekin aasmanon ke KHazane chahiyen

niiñd ko DhūñD ke laane kī davā.eñ thiiñ bahut

kaam mushkil to koī ḳhvāb hasīñ DhūñDhnā thā

nind ko DhunD ke lane ki dawaen thin bahut

kaam mushkil to koi KHwab hasin DhunDhna tha

milte nahīñ haiñ apnī kahānī meñ ham kahīñ

ġhā.eb hue haiñ jab se tirī dāstāñ se ham

milte nahin hain apni kahani mein hum kahin

ghaeb hue hain jab se teri dastan se hum

bahāna koī to ai zindagī de

ki jiine ke liye majbūr ho jā.ūñ

bahana koi to ai zindagi de

ki jine ke liye majbur ho jaun

safar meñ ab ke ajab tajraba nikal aayā

bhaTak gayā to nayā rāsta nikal aayā

safar mein ab ke ajab tajraba nikal aaya

bhaTak gaya to naya rasta nikal aaya

mirī ik zindagī ke kitne hisse-dār haiñ lekin

kisī kī zindagī meñ merā hissa kyuuñ nahīñ hotā

meri ek zindagi ke kitne hisse-dar hain lekin

kisi ki zindagi mein mera hissa kyun nahin hota

kuchh is tarah guzārā hai zindagī ko ham ne

jaise ki ḳhud pe koī ehsān kar liyā hai

kuchh is tarah guzara hai zindagi ko hum ne

jaise ki KHud pe koi ehsan kar liya hai

bulandī ke liye bas apnī hī nazroñ se girnā thā

hamārī kam-nasībī ham meñ kuchh ġhairat ziyāda thī

bulandi ke liye bas apni hi nazron se girna tha

hamari kam-nasibi hum mein kuchh ghairat ziyaada thi

mayassar muft meñ the āsmāñ ke chāñd taare tak

zamīñ ke har khilaune kī magar qīmat ziyāda thī

mayassar muft mein the aasman ke chand tare tak

zamin ke har khilaune ki magar qimat ziyaada thi

sab log is se pahle ki devtā samajhte

ham ne zarā sā ḳhud ko insān kar liyā hai

sab log is se pahle ki dewta samajhte

hum ne zara sa KHud ko insan kar liya hai

dil bhī bachche kī tarah zid pe aḌā thā apnā

jo jahāñ thā hī nahīñ us ko vahīñ DhūñDhnā thā

dil bhi bachche ki tarah zid pe aDa tha apna

jo jahan tha hi nahin us ko wahin DhunDhna tha

mirī ġhazal meñ kisī bevafā kā zikr na thā

na jaane kaise tirā tazkira nikal aayā

meri ghazal mein kisi bewafa ka zikr na tha

na jaane kaise tera tazkira nikal aaya

ġham bik rahe the mele meñ ḳhushiyoñ ke naam par

māyūs ho ke lauTe haiñ har ik dukāñ se ham

gham bik rahe the mele mein KHushiyon ke nam par

mayus ho ke lauTe hain har ek dukan se hum

kiyā ījād jis ne bhī ḳhudā ko

vo ḳhud ko kaise bahlātā thā pahle

kiya ijad jis ne bhi KHuda ko

wo KHud ko kaise bahlata tha pahle

saath 'ġhālib' ke ga.ī fikr kī gahrā.ī bhī

aur lahja bhī gayā 'mīr-taqī-mīr' ke saath

sath 'ghaalib' ke gai fikr ki gahrai bhi

aur lahja bhi gaya 'mir-taqi-mir' ke sath

aadmī hī ke banā.e hue zindāñ haiñ ye sab

koī paidā nahīñ hotā kisī zanjīr ke saath

aadmi hi ke banae hue zindan hain ye sab

koi paida nahin hota kisi zanjir ke sath

ab to sarāb hī se bujhāne lage haiñ pyaas

lene lage haiñ kaam yaqīñ kā gumāñ se ham

ab to sarab hi se bujhane lage hain pyas

lene lage hain kaam yaqin ka guman se hum

baḌī tasvīr laTkā dī hai apnī

jahāñ chhoTā sā ā.īna thā pahle

baDi taswir laTka di hai apni

jahan chhoTa sa aaina tha pahle

ijāzat kam thī jiine kī magar mohlat ziyāda thī

hamāre paas marne ke liye fursat ziyāda thī

ijazat kam thi jine ki magar mohlat ziyaada thi

hamare pas marne ke liye fursat ziyaada thi

soch lo kal kahīñ aañsū na bahāne paḌ jaa.eñ

ḳhuun kā kyā hai ragoñ meñ vo yūñhī khaultā hai

soch lo kal kahin aansu na bahane paD jaen

KHun ka kya hai ragon mein wo yunhi khaulta hai

haath uThātā hai duāoñ ko falak bhī us dam

jab parinda koī parvāz ko par taultā hai

hath uThata hai duaon ko falak bhi us dam

jab parinda koi parwaz ko par taulta hai

justujū kā ik ajab silsila tā-umr rahā

ḳhud ko khonā thā kahīñ aur kahīñ DhūñDhnā thā

justuju ka ek ajab silsila ta-umr raha

KHud ko khona tha kahin aur kahin DhunDhna tha

yā ḳhudā ab ke ye kis rañg meñ aa.ī hai bahār

zard hī zard hai peḌoñ pe harā kuchh bhī nahīñ

ya KHuda ab ke ye kis rang mein aai hai bahaar

zard hi zard hai peDon pe hara kuchh bhi nahin

mas.ala ye nahīñ ki ishq huā hai ham ko

mas.ala ye hai ki iz.hār kiyā jaanā hai

masala ye nahin ki ishq hua hai hum ko

masala ye hai ki izhaar kiya jaana hai

vo dil se kam zabāñ hī se ziyāda baat kartā thā

jabhī us ke yahāñ gahrā.ī kam vus.at ziyāda thī

wo dil se kam zaban hi se ziyaada baat karta tha

jabhi us ke yahan gahrai kam wusat ziyaada thi

dhoka hai ik fareb hai manzil kā har ḳhayāl

sach pūchhiye to saarā safar vāpsī kā hai

dhoka hai ek fareb hai manzil ka har KHayal

sach puchhiye to sara safar wapsi ka hai

merī āñkheñ ye kahā kartī haiñ aksar mujh se

aap dekhī huī chīzoñ ko bahut dekhte haiñ

meri aankhen ye kaha karti hain aksar mujh se

aap dekhi hui chizon ko bahut dekhte hain