وقت ہر زخم کا مرہم تو نہیں بن سکتا

درد کچھ ہوتے ہیں تا عمر رلانے والے

بڑا گھاٹے کا سودا ہے صداؔ یہ سانس لینا بھی

بڑھے ہے عمر جیوں جیوں زندگی کم ہوتی جاتی ہے

بجھ گئی شمع کی لو تیرے دوپٹے سے تو کیا

اپنی مسکان سے محفل کو منور کر دے

اپنی اردو تو محبت کی زباں تھی پیارے

اف سیاست نے اسے جوڑ دیا مذہب سے

اب کہاں دوست ملیں ساتھ نبھانے والے

سب نے سیکھے ہیں اب آداب زمانے والے

بڑے باوفا تھے مرے یار سب

مصیبت میں جب تک پکارا نہ تھا

دے گیا خوب سزا مجھ کو کوئی کر کے معاف

سر جھکا ایسے کہ تا عمر اٹھایا نہ گیا

ذکر میرا آئے گا محفل میں جب جب دوستو

رو پڑیں گے یاد کر کے یار سب یاری مری

محبت کے مریضوں کا مداوا ہے ذرا مشکل

اترتا ہے صداؔ ان کا بخار آہستہ آہستہ

کیوں سدا پہنے وہ تیرا ہی پسندیدہ لباس

کچھ تو موسم کے مطابق بھی سنورنا ہے اسے

وقت کے ساتھ صداؔ بدلے تعلق کتنے

تب گلے ملتے تھے اب ہاتھ ملایا نہ گیا

بھلے ہی لاکھ حوالوں کے ساتھ کہتے ہیں

مگر وہ صرف کتابوں کی بات کہتے ہیں

رسم دنیا تو کسی طور نبھاتے جاؤ

دل نہیں ملتے بھی تو ہاتھ ملاتے جاؤ

اجالا علم کا پھیلا تو ہے چاروں طرف یارو

بصیرت آدمی کی کچھ مگر کم ہوتی جاتی ہے

دل جلاؤ یا دیئے آنکھوں کے دروازے پر

وقت سے پہلے تو آتے نہیں آنے والے

اک نہ اک روز رفاقت میں بدل جائے گی

دشمنی کو بھی سلیقے سے نبھاتے جاؤ

تم ستاروں کے بھروسے پہ نہ بیٹھے رہنا

اپنی تدبیر سے تقدیر بناتے جاؤ

دل کو سمجھا لیں ابھی سے تو مناسب ہوگا

اک نہ اک روز تو وعدے سے مکرنا ہے اسے

صداؔ کے پاس ہے دنیا کا تجربہ واعظ

تمہاری بات میں بس فلسفہ کتاب کا ہے

چلو کہ ہم بھی زمانے کے ساتھ چلتے ہیں

نہیں بدلتا زمانہ تو ہم بدلتے ہیں

چوم لوں میں ورق ورق اس کا

تیرے چہرے سے جو کتاب ملے

نہ ذکر گل کا کہیں ہے نہ ماہتاب کا ہے

تمام شہر میں چرچا ترے شباب کا ہے

وہ تو خوشبو ہے ہر اک سمت بکھرنا ہے اسے

دل کو کیوں ضد ہے کہ آغوش میں بھرنا ہے اسے

موت کی گود میں جب تک نہیں تو سو جاتا

تو صداؔ چین سے ہرگز نہیں سونے والا

کون آئے گا بھول کر رستہ

دل کو کیوں ضد ہے گھر سجانے کی

ہمیں نہ راس زمانے کی محفلیں آئی

چلو کہ چھوڑ کے اب اس جہاں کو چلتے ہیں

انہیں نہ تولیے تہذیب کے ترازو میں

گھروں میں ان کے نہ چولھے نہ دیپ جلتے ہیں

لوگ کہتے ہیں دل لگانا جسے

روگ وہ بھی لگا کے دیکھ لیا

اشک آنکھوں سے مری نکلے مسلسل لیکن

اس نے اک حرف تسلی نہ نکالا لب سے

چمن میں خشک سالی پر ہے خوش صیاد کہ اب خود

پرندے پیٹ کی خاطر اسیر دام ہوتے ہیں

مر مر کے جئیں کس لیے بندے ترے مولیٰ

جینا بھی ذرا موت سا آسان بنا دے

اپنی آنکھوں کی بد نصیبی ہائے

اک نہ اک روز حادثہ دیکھا

ڈھونڈ افلاک نئے اور زمینیں بھی نئی

ہو غزل کا تری ہر شعر نیا حرف بہ حرف

جنہیں ہم بلبلا پانی کا دکھتے ہیں کہو ان سے

نظر ہو دیکھنے والی تو بحر بے کراں ہم ہیں

کتنا سوچا تھا دل لگائیں گے

سوچتے سوچتے حیات ہوئی

چھین لینا یا خدا مجھ سے مرے لوح و قلم

گر زوال آئے مرے اشعار کے معیار میں

شعر میں ساتھ روانی کے معانی بھی تو بھر

اے صداؔ قید تو کوزے میں سمندر کر دے