ہمیں تو ان کی محبت ہے کوئی کچھ سمجھے

ہمارے ساتھ محبت انہیں نہیں تو نہیں

کسی کو کوستے کیوں ہو دعا اپنے لیے مانگو

تمہارا فائدہ کیا ہے جو دشمن کا ضرر ہوگا

رقیب قتل ہوا اس کی تیغ ابرو سے

حرام زادہ تھا اچھا ہوا حلال ہوا

ہم نہ کہتے تھے کہ سودا زلف کا اچھا نہیں

دیکھیے تو اب سر بازار رسوا کون ہے

میکشوں میں نہ کوئی مجھ سا نمازی ہوگا

در مے خانہ پہ بچھتا ہے مصلیٰ اپنا

صنم پرستی کروں ترک کیوں کر اے واعظ

بتوں کا ذکر خدا کی کتاب میں دیکھا

ہاتھ دونوں مری گردن میں حمائل کیجے

اور غیروں کو دکھا دیجے انگوٹھا اپنا

کسی صیاد کی پڑ جائے نہ چڑیا پہ نظر

آپ سرکائیں نہ محرم سے دوپٹا اپنا

کچھ ایسی پلا دے مجھے اے پیر مغاں آج

قینچی کی طرح چلنے لگی میری زباں آج

تا مرگ مجھ سے ترک نہ ہوگی کبھی نماز

پر نشۂ شراب نے مجبور کر دیا

دیکھیے پار ہو کس طرح سے بیڑا اپنا

مجھ کو طوفاں کی خبر دیدۂ تر دیتے ہیں

بت نظر آئیں گے معشوقوں کی کثرت ہوگی

آج بت خانہ میں اللہ کی قدرت ہوگی

شراب پیتے ہیں تو جاگتے ہیں ساری رات

مدام عابد شب زندہ دار ہم بھی ہیں

دوشالہ شال کشمیری امیروں کو مبارک ہو

گلیم کہنہ میں جاڑا فقیروں کا بسر ہوگا

زاہدو کعبہ کی جانب کھینچتے ہو کیوں مجھے

جی نہیں لگتا کبھی مزدور کا بیگار میں

شکایت مجھ کو دونوں سے ہے ناصح ہو کہ واعظ ہو

نہ سمجھا ہوں نہ سمجھوں سر پھرا لے جس کا جی چاہے

در بدر پھرنے نے میری قدر کھوئی اے فلک

ان کے دل میں ہی جگہ ملتی جو خلوت مانگتا

ان پری رویوں کی ایسی ہی اگر کثرت رہی

تھوڑے عرصہ میں پرستاں آگرہ ہو جائے گا

مے کشو دیر ہے کیا دور چلے بسم اللہ

آئی ہے شیشہ و ساغر کی طلب گار گھٹا

جی چاہتا ہے اس بت کافر کے عشق میں

تسبیح توڑ ڈالیے زنار دیکھ کر

پان کھا کر جو اگال آپ نے تھوکا صاحب

جوہری محو ہوے لعل یمن یاد آیا

رند مشرب ہیں کسی سے ہمیں کچھ کام نہیں

دیر اپنا ہے نہ کعبہ نہ کلیسا اپنا

او ستم گر تری تلوار کا دھبا چھٹ جائے

اپنے دامن کو لہو سے مرے بھر جانے دے

طواف کعبہ کو کیا جائیں حج نہیں واجب

کلال خانہ کے کچھ دین دار ہم بھی ہیں

دیکھو تو ایک جا پہ ٹھہرتی نہیں نظر

لپکا پڑا ہے آنکھ کو کیا دیکھ بھال کا

دشت وحشت خیز میں عریاں ہے آغاؔ آپ ہی

قاصد جاناں کو کیا دیتا جو خلعت مانگتا

جنوں کے ہاتھ سے ہے ان دنوں گریباں تنگ

قبا پکارتی ہے تار تار ہم بھی ہیں

وعدۂ بادۂ اطہر کا بھروسہ کب تک

چل کے بھٹی پہ پئیں جرعۂ عرفاں کیسا