ḳhudā-yā apne kun kī laaj rakh le

tirā shahkār zaa.e' ho rahā hai

KHuda-ya apne kun ki laj rakh le

tera shahkar zae' ho raha hai

qum-be-iznil-ishq se dil zinda karegā

ye mujh se mohabbat ke masīhā ne kahā hai

qum-be-iznil-ishq se dil zinda karega

ye mujh se mohabbat ke masiha ne kaha hai

kaisī 'ajīb hai ye mohabbat kī zindagī

do pattharoñ meñ jaan paḌī aur mar ga.e

kaisi 'ajib hai ye mohabbat ki zindagi

do pattharon mein jaan paDi aur mar gae

ġhurūr ḳhauf anā haath paañv kuchh TuuTe

magar jo TuuT rahā hai vo e'tibār hī kyoñ

ghurur KHauf ana hath panw kuchh TuTe

magar jo TuT raha hai wo e'tibar hi kyon

chīḳhte chīḳhte chup ho ga.iiñ nannhī rūheñ

har muqaddas dar-o-dīvār pe lā'nat bhejo

chiKHte chiKHte chup ho gain nannhi ruhen

har muqaddas dar-o-diwar pe la'nat bhejo

hukm-e-sultān kī tā'mīl tumhāre liye hai

maiñ nahīñ jā rahā chāho to ye sar le jaao

hukm-e-sultan ki ta'mil tumhaare liye hai

main nahin ja raha chaho to ye sar le jao

ashk roko nahīñ bah jaane do varna ik din

ye namī jism kī dīvār ko khā jā.egī

ashk roko nahin bah jaane do warna ek din

ye nami jism ki diwar ko kha jaegi

ai rabb-e-zuleḳhā-o-ḳhudā-e-abū-yūsuf

ik husn ke maare hue do hijr-zada dekh

ai rabb-e-zuleKHa-o-KHuda-e-abu-yusuf

ek husn ke mare hue do hijr-zada dekh

jise bhulā diye jaane ke dukh ne maar diyā

pata chalā hai use yaad kar rahā thā koī

jise bhula diye jaane ke dukh ne mar diya

pata chala hai use yaad kar raha tha koi

ajnabiyyat kī jhalak dekhī ga.ī lahje meñ

baat Darne kī hai is baat pe Dar jā.iye nā

ajnabiyyat ki jhalak dekhi gai lahje mein

baat Darne ki hai is baat pe Dar jaiye na

mujhe charāġh bujhānā paḌā thā majbūran

tumhārā saayā nahīñ jā rahā thā kyā kartā

mujhe charagh bujhana paDa tha majburan

tumhaara saya nahin ja raha tha kya karta

faqat sitāre nahīñ raushnī kā bojh bhī thā

zamīn kaañp uThī āsmāñ uThāte hue

faqat sitare nahin raushni ka bojh bhi tha

zamin kanp uThi aasman uThate hue

us ke marham se mukar jaane kā ġhussa thā mujhe

varna ye zaḳhm-e-jigar bār-e-digar kuchh nahīñ thā

us ke marham se mukar jaane ka ghussa tha mujhe

warna ye zaKHm-e-jigar bar-e-digar kuchh nahin tha

ham muttafiq nahīñ haiñ majbūr haiñ so tai hai

sāhil tirā muqaddar Thahrā bhañvar hamārā

hum muttafiq nahin hain majbur hain so tai hai

sahil tera muqaddar Thahra bhanwar hamara

mire tā'vīz aa mere gale paḌ

mire aaseb bāhar aa rahe haiñ

mere ta'wiz aa mere gale paD

mere aaseb bahar aa rahe hain

barf pighle to phir safed bahe

aarzū thī chanāb vāloñ kī

barf pighle to phir safed bahe

aarzu thi chanab walon ki

khurach khurach ke tujhe zehn se miTā.ūñgā

maiñ apne hosh ke nāḳhun zarā baḌhā to luuñ

khurach khurach ke tujhe zehn se miTaunga

main apne hosh ke naKHun zara baDha to lun

ye zarūrī to nahīñ thā ki bichhaḌ hī jaate

ham tire saath tirā hijr manā sakte the

ye zaruri to nahin tha ki bichhaD hi jate

hum tere sath tera hijr mana sakte the

dastaras meñ na rahe lafz-garī behtar hai

ham agar bol paḌeñge to bahut boleñge

dastaras mein na rahe lafz-gari behtar hai

hum agar bol paDenge to bahut bolenge

thā mast bāñdhne meñ vo tamhīd-e-zaḳhm-e-dil

siine ke ik shigāf pe uñglī dhare hue

tha mast bandhne mein wo tamhid-e-zaKHm-e-dil

sine ke ek shigaf pe ungli dhare hue

us būḌhī pujāran ke ḳhad-o-ḳhāl se pūchho

but us kī tamanna ke hasīñ the ki nahīñ the

us buDhi pujaran ke KHad-o-KHal se puchho

but us ki tamanna ke hasin the ki nahin the

javāb aa.e na aa.e shikan to aa.egī

savāl pūchh hī lenā agarche Darte hue

jawab aae na aae shikan to aaegi

sawal puchh hi lena agarche Darte hue

soyā nahīñ maiñ barsoñ talak jis ke ḳhauf se

vo ḳhvāb ab bhī chashm-badar ho nahīñ rahā

soya nahin main barson talak jis ke KHauf se

wo KHwab ab bhi chashm-badar ho nahin raha

ai bhaTakne ke irāde se nikalne vaalo

ham se kuchh dasht-navardī kā hunar le jaao

ai bhaTakne ke irade se nikalne walo

hum se kuchh dasht-nawardi ka hunar le jao

ḳhvāb to chhoḌ chuke dekhnā barsoñ pahle

dekh ye kyā hai jo tā'bīr huā chāhtā hai

KHwab to chhoD chuke dekhna barson pahle

dekh ye kya hai jo ta'bir hua chahta hai

ye baḌī talḳh haqīqat hai koī jaane to

jurm-āmez taḳhayyul ke udhar kuchh nahīñ thā

ye baDi talKH haqiqat hai koi jaane to

jurm-amez taKHayyul ke udhar kuchh nahin tha

vo jāntā hai magar bevafā nahīñ kahtā

ab us kī maslihateñ kyā batā.eñ dukh kī haiñ

wo jaanta hai magar bewafa nahin kahta

ab us ki maslihaten kya bataen dukh ki hain

zard mausam ne daraḳhtoñ kī zabāñ sil dī thī

phir koī phuul hañsā aur ḳhizāñ haar ga.ī

zard mausam ne daraKHton ki zaban sil di thi

phir koi phul hansa aur KHizan haar gai

zard chehroñ se udāsī ke bichhaḌne kā sabab

log pūchheñge to kah denā ki dukh haar gayā

zard chehron se udasi ke bichhaDne ka sabab

log puchhenge to kah dena ki dukh haar gaya

jaane do ek roz yahīñ phir ke aa.egā

jo kuchh hai us pe raḳht-e-safar jāntā huuñ maiñ

jaane do ek roz yahin phir ke aaega

jo kuchh hai us pe raKHt-e-safar jaanta hun main

misl-e-sarāb hī sahī mere bane raho

sahrā meñ tishnagī kā sahārā fareb hai

misl-e-sarab hi sahi mere bane raho

sahra mein tishnagi ka sahaara fareb hai