aas pe terī bikhrā detā huuñ kamre kī sab chīzeñ

aas bikharne par sab chīzeñ ḳhud hī uThā ke rakhtā huuñ

aas pe teri bikhra deta hun kamre ki sab chizen

aas bikharne par sab chizen KHud hi uTha ke rakhta hun

bol paḌtā to mirī baat mirī hī rahtī

ḳhāmushī ne haiñ diye sab ko fasāne kyā kyā

bol paDta to meri baat meri hi rahti

KHamushi ne hain diye sab ko fasane kya kya

kabhī ḳhauf thā tire hijr kā kabhī aarzū ke zavāl kā

rahā hijr-o-vasl ke darmiyāñ tujhe kho sakā na maiñ pā sakā

kabhi KHauf tha tere hijr ka kabhi aarzu ke zawal ka

raha hijr-o-wasl ke darmiyan tujhe kho saka na main pa saka

bāzār meñ ik chiiz nahiñ kaam kī mere

ye shahr mirī jeb kā rakhtā hai bharam ḳhuub

bazar mein ek chiz nahin kaam ki mere

ye shahr meri jeb ka rakhta hai bharam KHub

kyā kyā na paḌhā is maktab meñ, kitne hī hunar sīkhe haiñ yahāñ

iz.hār kabhī āñkhoñ se kiyā kabhī had se sivā bebāk huā

kya kya na paDha is maktab mein, kitne hi hunar sikhe hain yahan

izhaar kabhi aankhon se kiya kabhi had se siwa bebak hua

dil to saada hai terī har baat ko sachchā māntā hai

aql ne bāteñ karte terā aañkh churānā dekhā hai

dil to sada hai teri har baat ko sachcha manta hai

aql ne baaten karte tera aankh churana dekha hai

har ek sub.h vazū kartī haiñ mirī āñkheñ

ki shāyad aaj to aa jaa.e vo habīb nazar

har ek subh wazu karti hain meri aankhen

ki shayad aaj to aa jae wo habib nazar

alag alag tāsīreñ in kii, ashkoñ ke jo dhāre haiñ

ishq meñ Tapkeñ to haiñ motī, nafrat meñ añgāre haiñ

alag alag tasiren in ki, ashkon ke jo dhaare hain

ishq mein Tapken to hain moti, nafrat mein angare hain

ye hī haiñ din, bāġhī agar banñā hai ban

tujh par sitam kis ko patā phir ho na ho

ye hi hain din, baghi agar banna hai ban

tujh par sitam kis ko pata phir ho na ho

mere saath sū-e-junūn chal mire zaḳhm khā mirā raqs kar

mere sher paḌh ke milegā kyā patā paḌh ke ghar koī pā sakā?

mere sath su-e-junun chal mere zaKHm kha mera raqs kar

mere sher paDh ke milega kya pata paDh ke ghar koi pa saka?

jis din se gayā vo jān-e-ġhazal har misre kī sūrat bigḌī

har lafz pareshāñ dikhtā hai, is darja varaq namnāk huā

jis din se gaya wo jaan-e-ghazal har misre ki surat bigDi

har lafz pareshan dikhta hai, is darja waraq namnak hua