paañv uThte haiñ kisī mauj kī jānib lekin

rok letā hai kināra ki Thahar paanī hai

panw uThte hain kisi mauj ki jaanib lekin

rok leta hai kinara ki Thahar pani hai

ab dil bhī dukhāo to aziyyat nahīñ hotī

hairat hai kisī baat pe hairat nahīñ hotī

ab dil bhi dukhao to aziyyat nahin hoti

hairat hai kisi baat pe hairat nahin hoti

sitāra aañkh meñ dil meñ gulāb kyā rakhnā

ki Dhaltī umr meñ rañg-e-shabāb kyā rakhnā

sitara aankh mein dil mein gulab kya rakhna

ki Dhalti umr mein rang-e-shabab kya rakhna

do chaar baras jitne bhī haiñ jabr hī sah leñ

is umr meñ ab ham se baġhāvat nahīñ hotī

do chaar baras jitne bhi hain jabr hi sah len

is umr mein ab hum se baghawat nahin hoti

ab dard bhī ik had se guzarne nahīñ paatā

ab hijr meñ vo pahlī sī vahshat nahīñ hotī

ab dard bhi ek had se guzarne nahin pata

ab hijr mein wo pahli si wahshat nahin hoti

bas itnā yaad hai ik bhuul sī huī thī kahīñ

ab is se baḌh ke dukhoñ kā hisāb kyā rakhnā

bas itna yaad hai ek bhul si hui thi kahin

ab is se baDh ke dukhon ka hisab kya rakhna

chaḌhe hue haiñ jo dariyā utar bhī jā.eñge

mire baġhair tire din guzar bhī jā.eñge

chaDhe hue hain jo dariya utar bhi jaenge

mere baghair tere din guzar bhi jaenge

vaqt kahāñ rukā bhalā par ye kise gumān thā

umr kī zad meñ aa.egā tujh sā parī-jamāl bhī

waqt kahan ruka bhala par ye kise guman tha

umr ki zad mein aaega tujh sa pari-jamal bhi

mujh pe āsāñ hai kahe lafz kā iifā karnā

us ko mushkil hai to vo apnī suhūlat dekhe

mujh pe aasan hai kahe lafz ka ifa karna

us ko mushkil hai to wo apni suhulat dekhe

hamesha ek sī hālat pe kuchh nahīñ rahtā

jo aa.e haiñ to kaḌe din guzar bhī jā.eñge

hamesha ek si haalat pe kuchh nahin rahta

jo aae hain to kaDe din guzar bhi jaenge

dekh ye dil jo kabhī had se guzar jaatā thā

dekh dariyā meñ koī shor na tuġhyānī hai

dekh ye dil jo kabhi had se guzar jata tha

dekh dariya mein koi shor na tughyani hai

gum to honā thā ba-har-hāl kisī manzar meñ

dil huā ḳhvāb meñ gum aañkh huī aab meñ gum

gum to hona tha ba-har-haal kisi manzar mein

dil hua KHwab mein gum aankh hui aab mein gum

dil ḳhush jo nahīñ rahtā to is kā bhī sabab hai

maujūd koī vaj.h-e-masarrat nahīñ hotī

dil KHush jo nahin rahta to is ka bhi sabab hai

maujud koi wajh-e-masarrat nahin hoti

ajab taqāzā hai mujh se judā na hone kā

ki jaise kaun-o-makāñ mere iḳhtiyār meñ hai

ajab taqaza hai mujh se juda na hone ka

ki jaise kaun-o-makan mere iKHtiyar mein hai

makāñ kī koī ḳhabar lā-makāñ ko kaise ho

safīr-e-rūh abhī jism ke hisār meñ hai

makan ki koi KHabar la-makan ko kaise ho

safir-e-ruh abhi jism ke hisar mein hai