adā se dekh lo jaatā rahe gila dil kā

bas ik nigāh pe Thahrā hai faisla dil kā

ada se dekh lo jata rahe gila dil ka

bas ek nigah pe Thahra hai faisla dil ka

apne begāne se ab mujh ko shikāyat na rahī

dushmanī kar ke mire dost ne maarā mujh ko

apne begane se ab mujh ko shikayat na rahi

dushmani kar ke mere dost ne mara mujh ko

sindūr us kī maañg meñ detā hai yuuñ bahār

jaise dhanak nikaltī hai abr-e-siyāh meñ

sindur us ki mang mein deta hai yun bahaar

jaise dhanak nikalti hai abr-e-siyah mein

ai be-ḳhudi-e-dil mujhe ye bhī ḳhabar nahīñ

kis din bahār aa.ī maiñ dīvāna kab huā

ai be-KHudi-e-dil mujhe ye bhi KHabar nahin

kis din bahaar aai main diwana kab hua

āḳhir insān huuñ patthar kā to rakhtā nahīñ dil

ai buto itnā satāo na ḳhudā-rā mujh ko

aaKHir insan hun patthar ka to rakhta nahin dil

ai buto itna satao na KHuda-ra mujh ko

hoñThoñ meñ daab kar jo gilaurī dī yaar ne

kyā daañt piise ġhairoñ ne kyā kyā chabā.e hoñTh

honThon mein dab kar jo gilauri di yar ne

kya dant pise ghairon ne kya kya chabae honTh

phir mujh se is tarah kī na kījegā dil-lagī

ḳhair is ghaḌī to aap kā maiñ kar gayā lihāz

phir mujh se is tarah ki na kijega dil-lagi

KHair is ghaDi to aap ka main kar gaya lihaz

dast-e-junūñ ne phaaḌ ke pheñkā idhar-udhar

dāman abad meñ hai to garebāñ azal meñ hai

dast-e-junun ne phaD ke phenka idhar-udhar

daman abad mein hai to gareban azal mein hai

karo tum mujh se bāteñ aur maiñ bāteñ karūñ tum se

kalīm-ullāh ho jā.ūñ maiñ ejāz-e-takallum se

karo tum mujh se baaten aur main baaten karun tum se

kalim-ullah ho jaun main ejaz-e-takallum se

āsār-e-rihā.ī haiñ ye dil bol rahā hai

sayyād sitamgar mire par khol rahā hai

aasar-e-rihai hain ye dil bol raha hai

sayyaad sitamgar mere par khol raha hai

ḳhafā ho gāliyāñ do chāhe aane do na aane do

maiñ bose lūñgā sote meñ mujhe lapkā hai chorī kā

KHafa ho galiyan do chahe aane do na aane do

main bose lunga sote mein mujhe lapka hai chori ka

vo riñd huuñ ki mujhe hathkaḌī se bai.at hai

milā hai gesū-e-jānāñ se silsila dil kā

wo rind hun ki mujhe hathkaDi se baiat hai

mila hai gesu-e-jaanan se silsila dil ka

zamīn paañv ke nīche se sarkī jaatī hai

hameñ na chheḌiye ham haiñ falak satā.e hue

zamin panw ke niche se sarki jati hai

hamein na chheDiye hum hain falak satae hue

umr to apnī huī sab but-parastī meñ basar

naam ko duniyā meñ haiñ ab sāhib-e-islām ham

umr to apni hui sab but-parasti mein basar

nam ko duniya mein hain ab sahib-e-islam hum

ḳhudā-hāfiz hai ab ai zāhido islām-e-āshiq kā

butān-e-dahr ġhālib aa ga.e haiñ ka.aba-o-dil par

KHuda-hafiz hai ab ai zahido islam-e-ashiq ka

butan-e-dahr ghaalib aa gae hain kaba-o-dil par

ai parī-zād jo tū raqs kare mastī meñ

dāna-e-tāk har ik paañv meñ ghuñghrū ho jaa.e

ai pari-zad jo tu raqs kare masti mein

dana-e-tak har ek panw mein ghunghru ho jae

ḳharīdārī-e-jins-e-husn par raġhbat dilātā hai

banā hai shauq-e-dil dallāl bāzār-e-mohabbat kā

KHaridari-e-jins-e-husn par raghbat dilata hai

bana hai shauq-e-dil dallal bazar-e-mohabbat ka

raste meñ un ko chheḌ ke khāte haiñ gāliyāñ

bāzār kī miThā.ī bhī hotī hai kyā lazīz

raste mein un ko chheD ke khate hain galiyan

bazar ki miThai bhi hoti hai kya laziz

yahī insāf tire ahd meñ hai ai shah-e-husn

vājib-ul-qatl mohabbat ke gunahgār haiñ sab

yahi insaf tere ahd mein hai ai shah-e-husn

wajib-ul-qatl mohabbat ke gunahgar hain sab

yaar kī fart-e-nazākat kā huuñ maiñ shukr-guzār

dhyān bhī us kā mire dil se nikalne na diyā

yar ki fart-e-nazakat ka hun main shukr-guzar

dhyan bhi us ka mere dil se nikalne na diya

kareñge ham se vo kyūñkar nibāh dekhte haiñ

ham un kī thoḌe dinoñ aur chaah dekhte haiñ

karenge hum se wo kyunkar nibah dekhte hain

hum un ki thoDe dinon aur chah dekhte hain

banā kar til ruḳh-e-raushan par do shoḳhī se se kahte haiñ

ye kājal ham ne yaarā hai charāġh-e-māh-e-tābāñ par

bana kar til ruKH-e-raushan par do shoKHi se se kahte hain

ye kajal hum ne yara hai charagh-e-mah-e-taban par

yaad dilvā.iye un ko jo kabhī va.ada-e-vasl

to vo kis naaz se farmāte haiñ ham bhuul ga.e

yaad dilwaiye un ko jo kabhi wada-e-wasl

to wo kis naz se farmate hain hum bhul gae

chalā hai chhoḌ ke tanhā kidhar tasavvur-e-yār

shab-e-firāq meñ thā tujh se mashġhala dil kā

chala hai chhoD ke tanha kidhar tasawwur-e-yar

shab-e-firaq mein tha tujh se mashghala dil ka

ruḳh tah-e-zulf hai aur zulf pareshāñ sar par

maañg bāloñ meñ nahīñ hai ye numāyāñ sar par

ruKH tah-e-zulf hai aur zulf pareshan sar par

mang baalon mein nahin hai ye numayan sar par

kyā koī dil lagā ke kahe sher ai 'qalaq'

nāqadrī-e-suḳhan se haiñ ahl-e-suḳhan udaas

kya koi dil laga ke kahe sher ai 'qalaq'

naqadri-e-suKHan se hain ahl-e-suKHan udas

manzil hai apnī apnī 'qalaq' apnī apnī gor

koī nahīñ sharīk kisī ke gunāh meñ

manzil hai apni apni 'qalaq' apni apni gor

koi nahin sharik kisi ke gunah mein

himmat kā zāhidoñ kī sarāsar qusūr thā

mai-ḳhāna ḳhānqāh se aisā na duur thā

himmat ka zahidon ki sarasar qusur tha

mai-KHana KHanqah se aisa na dur tha

vo ek raat to mujh se alag na so.egā

huā jo lazzat-e-bos-o-kanār se vāqif

wo ek raat to mujh se alag na soega

hua jo lazzat-e-bos-o-kanar se waqif

ghaaT par talvār ke nahlā.īyo mayyat mirī

kushta-e-abrū huuñ maiñ kyā ġhusl-ḳhāna chāhiye

ghaT par talwar ke nahlaiyo mayyat meri

kushta-e-abru hun main kya ghusl-KHana chahiye

khulne se ek jism ke sau aib Dhak ga.e

uryāñ-tanī bhī josh-e-junūñ meñ libās hai

khulne se ek jism ke sau aib Dhak gae

uryan-tani bhi josh-e-junun mein libas hai

chheḌā agar mire dil-e-nālāñ ko aap ne

phir bhuul jā.iyegā bajānā sitār kā

chheDa agar mere dil-e-nalan ko aap ne

phir bhul jaiyega bajaana sitar ka

sitam vo tum ne kiye bhūle ham gila dil kā

huā tumhāre bigaḌne se faisla dil kā

sitam wo tum ne kiye bhule hum gila dil ka

hua tumhaare bigaDne se faisla dil ka

'qalaq' ġhazleñ paḌheñge jā-e-qur.āñ sab pas-e-murdan

hamārī qabr par jab majma-e-ahl-e-suḳhan hogā

'qalaq' ghazlen paDhenge ja-e-quran sab pas-e-murdan

hamari qabr par jab majma-e-ahl-e-suKHan hoga

maiñ vo mai-kash huuñ milī hai mujh ko ghuTTī meñ sharāb

shiir ke badle piyā hai maiñ ne shīra taak kā

main wo mai-kash hun mili hai mujh ko ghuTTi mein sharab

shir ke badle piya hai main ne shira tak ka

ālam-e-pīrī meñ kyā mū-e-siyah kā e.atibār

sub.h-e-sādiq detī hai jhūTī gavāhī raat kī

aalam-e-piri mein kya mu-e-siyah ka eatibar

subh-e-sadiq deti hai jhuTi gawahi raat ki

gulgasht-e-bāġh ko jo gayā vo gul-e-farañg

ġhunche salām karte the Topī utaar ke

gulgasht-e-bagh ko jo gaya wo gul-e-farang

ghunche salam karte the Topi utar ke

tire hoñThoñ se sharmā kar pasīne meñ huā ye tar

ḳhizar ne ḳhud araq poñchhā jabīn-e-āb-e-haivāñ kā

tere honThon se sharma kar pasine mein hua ye tar

KHizar ne KHud araq ponchha jabin-e-ab-e-haiwan ka

rāh-e-haq meñ khel jāñ-bāzī hai o zāhir-parast

kyā tamāshā daar par mansūr ne naT kā kiyā

rah-e-haq mein khel jaan-bazi hai o zahir-parast

kya tamasha dar par mansur ne naT ka kiya

ḳhat meñ likkhī hai haqīqat dasht-gardī kī agar

nāma-bar jañgalī kabūtar ko banānā chāhiye

KHat mein likkhi hai haqiqat dasht-gardi ki agar

nama-bar jangali kabutar ko banana chahiye

kotāh umr ho ga.ī aur ye na kam huī

ai jaan aa ke tūl-e-shab-e-intizār dekh

kotah umr ho gai aur ye na kam hui

ai jaan aa ke tul-e-shab-e-intizar dekh

huā maiñ riñd-mashrab ḳhaak mar kar is tamannā meñ

namāz āḳhir paḌheñge vo kisī din to tayammum se

hua main rind-mashrab KHak mar kar is tamanna mein

namaz aaKHir paDhenge wo kisi din to tayammum se

jab huā garm-e-kalām-e-muḳhtasar mahkā diyā

itr khīñchā yaar ke lab ne gul-e-taqrīr kā

jab hua garm-e-kalam-e-muKHtasar mahka diya

itr khincha yar ke lab ne gul-e-taqrir ka

mubārak dair-o-ka.aba hoñ 'qalaq' shaiḳh-o-barahman ko

bichhā.eñge musallā chal ke ham mehrāb-e-abrū meñ

mubarak dair-o-kaba hon 'qalaq' shaiKH-o-barahman ko

bichhaenge musalla chal ke hum mehrab-e-abru mein

kufr-o-islām ke jhagḌoñ se chhuḌāyā sad-shukr

qaid-e-maz.hab se junūñ ne mujhe āzād kiyā

kufr-o-islam ke jhagDon se chhuDaya sad-shukr

qaid-e-mazhab se junun ne mujhe aazad kiya

nayā mazmūn laanā kāTnā koh-o-jabal kā hai

nahīñ ham sher kahte pesha-e-farhād kahte haiñ

naya mazmun lana kaTna koh-o-jabal ka hai

nahin hum sher kahte pesha-e-farhad kahte hain

misāl-e-ā.ina ham jab se hairatī haiñ tire

ki jin dinoñ meñ na thā tū siñgār se vāqif

misal-e-aina hum jab se hairati hain tere

ki jin dinon mein na tha tu singar se waqif

un vā.izoñ kī zid se ham ab kī bahār meñ

toḌeñge tauba pīr-e-muġhāñ kī dukān par

un waizon ki zid se hum ab ki bahaar mein

toDenge tauba pir-e-mughan ki dukan par

mudallal jo suḳhan apnā hai vo burhān-e-qāte.a hai

tabī.at meñ ravānī hai ziyāda haft-qulzum se

mudallal jo suKHan apna hai wo burhan-e-qatea hai

tabiat mein rawani hai ziyaada haft-qulzum se

jame kyā paañv mere ḳhāna-e-dil meñ qanā.at kā

jigar meñ chuTkiyāñ letā hai nāḳhun dast-e-hājat kā

jame kya panw mere KHana-e-dil mein qanaat ka

jigar mein chuTkiyan leta hai naKHun dast-e-hajat ka