ملتی ہے خوشی سب کو جیسے ہی کہیں سے بھی

بھولی ہوئی بچپن کی تصویر نکلتی ہے

یہ جو بے حال سا منظر یہ جو بیمار سے ہم تم

سیاست کی نوازش ہے کسی سے کچھ نہیں بولیں

یہ تمنا ہے خدا عالم ہستی میں ترے

میں عیاں دیکھنا چاہوں تو نہاں تک دیکھوں

بس رنج کی ہے داستاں عنوان ہزاروں

جینے کے لئے مر گئے انسان ہزاروں

دیکھا نہیں جس نے مرے طوفاں کو سکوں میں

وہ شخص مری روح کے اندر نہیں اترا

اسی پہ صبر ہے مجھ کو ہر ایک دور یہاں

بہار آنے سے پہلے خزاں سے گزرا ہے

کہیں سراغ نہیں ہے کسی بھی قاتل کا

لہولہان مگر شہر کا نظارہ ہے

گمان کہتا ہے کے میں یقیں کا شاعر ہوں

یقین کہتا ہے کے میں گماں کا شاعر ہوں

سجدے کا سبب جان کے شیریں ہے پریشاں

فرہاد نے کہہ ڈالا کے رب ڈھونڈ رہا ہوں

خدا کی رضا ہے نہ حاصل کسی کو

خدا کے لیے پر لڑائی بہت ہے

کوئی حیات زمانہ کو ہے عزیز بہت

کوئی حیات ہے کہ روز روز مرتی ہے

جس خاک سے کہتے ہو وفا ہم نہیں کرتے

سوئے ہیں اسی خاک میں سلطان ہزاروں

دوام پائے گا اک روز حق زمانے میں

یہ انتظار نہیں انتظار وحشت ہے

اتنی نہ انتشار کی حدت ہو روبرو

انساں غم حیات میں جلتا دکھائی دے

مرے وجود کا محور چمکتا رہتا ہے

اسی سند سے مقدر چمکتا رہتا ہے