اسے کسی سے محبت نہ تھی مگر اس نے

گلاب توڑ کے دنیا کو شک میں ڈال دیا

اس سے کچھ خاص تعلق بھی نہیں ہے اپنا

میں پریشان ہوا جس کی پریشانی پر

اس سے ملنا تو اسے عید مبارک کہنا

یہ بھی کہنا کہ مری عید مبارک کر دے

اب مجھ کو اہتمام سے کیجے سپرد خاک

اکتا چکا ہوں جسم کا ملبہ اٹھا کے میں

میں جب میدان خالی کر کے آیا

مرا دشمن اکیلا رہ گیا تھا

چاند تارے تو مرے بس میں نہیں ہیں آزرؔ

پھول لایا ہوں مرا ہاتھ کہاں تک جاتا

سبھی کے ہاتھ میں پتھر تھے آذرؔ

ہمارے ہاتھ میں اک آئینا تھا

بدن کو چھوڑ ہی جانا ہے روح نے آزرؔ

ہر اک چراغ سے آخر دھواں نکلتا ہے

تم خود ہی داستان بدلتے ہو دفعتاً

ہم ورنہ دیکھتے نہیں کردار سے پرے

ایک لمحے کے لیے تنہا نہیں ہونے دیا

خود کو اپنے ساتھ رکھا جس جہاں کی سیر کی

اک دن جو یونہی پردۂ افلاک اٹھایا

برپا تھا تماشا کوئی تنہائی سے آگے

سخن سرائی کوئی سہل کام تھوڑی ہے

یہ لوگ کس لیے جنجال میں پڑے ہوئے ہیں

وہی ستارہ نما اک چراغ ہے آزرؔ

مرا خیال تھا نکلے گا طاق سے کچھ اور