بجلی چمکی تو ابر رویا

یاد آ گئی کیا ہنسی کسی کی

نہ ہوگا کوئی مجھ سا محو تصور

جسے دیکھتا ہوں سمجھتا ہوں تو ہے

اے جنوں ہاتھ جو وہ زلف نہ آئی ہوتی

آہ نے عرش کی زنجیر ہلائی ہوتی

نہیں بچتا ہے بیمار محبت

سنا ہے ہم نے گویاؔ کی زبانی

اپنے سوا نہیں ہے کوئی اپنا آشنا

دریا کی طرح آپ ہیں اپنے کنار میں

نقش پا پنج شاخہ قبر پر روشن کرو

مر گیا ہوں میں تمہاری گرمیٔ رفتار پر

سارے قرآن سے اس پری رو کو

یاد اک لفظ لن ترانی ہے

نہ مر کے بھی تری صورت کو دیکھنے دوں گا

پڑوں گا غیر کی آنکھوں میں وہ غبار ہوں میں

ناصحا عاشقی میں رکھ معذور

کیا کروں عالم جوانی ہے

خار چبھ کر جو ٹوٹتا ہے کبھی

آبلہ پھوٹ پھوٹ روتا ہے

زاہدو قدرت خدا دیکھو

بت کو بھی دعوی خدائی ہے

وہ طفل نصیری آئے شاید

قسمیں دوں مرتضیٰ علی کی

ضعف سے رہتا ہے اب پاؤں پہ سر

آپ اپنی ٹھوکریں کھاتے ہیں ہم

خون مرا کر کے لگانا نہ حنا میرے بعد

دست رنگیں نہ ہوں انگشت نما میرے بعد

دماغ اور ہی پاتی ہیں ان حسینوں میں

یہ ماہ وہ ہیں نظر آئیں جو مہینوں میں

جامۂ سرخ ترا دیکھ کے گل

پیرہن اپنا قبا کرتے ہیں

آسماں کہتے ہیں جس کو وہ زمین شعر ہے

ماہ نو مصرع ہے وصف ابروئے خم دار میں

در پہ نالاں جو ہوں تو کہتا ہے

پوچھو کیا چیز بیچتا ہے یہ

ہر گام پہ ہی سائے سے اک مصرع موزوں

گر چند قدم چلیے تو کیا خوب غزل ہو

سخت ہے حیرت ہمیں جو زیر ابرو خال ہے

ہم تو سنتے تھے کہ کعبہ میں کوئی ہندو نہیں

ٹھکرا کے چلے جبیں کو میری

قسمت کی لکھی نے یاوری کی

گیا ہے کوچۂ کاکل میں اب دل

مسلماں وارد ہندوستاں ہے

گر ہمارے قتل کے مضموں کا وہ نامہ لکھے

بیضۂ فولاد سے نکلیں کبوتر سیکڑوں

مثل طفلاں وحشیوں سے ضد ہے چرخ پیر کو

گر طلب منہ کی کریں برسائے پتھر سیکڑوں

جو پنہاں تھا وہی ہر سو عیاں ہے

یہ کہیے لن ترانی اب کہاں ہے