paḌhtā rahtā huuñ aap kā chehra

achchhī lagtī hai ye kitāb mujhe

paDhta rahta hun aap ka chehra

achchhi lagti hai ye kitab mujhe

inkār hī kar dījiye iqrār nahīñ to

uljhan hī meñ mar jā.egā bīmār nahīñ to

inkar hi kar dijiye iqrar nahin to

uljhan hi mein mar jaega bimar nahin to

din meñ aane lage haiñ ḳhvāb mujhe

us ne bhejā hai ik gulāb mujhe

din mein aane lage hain KHwab mujhe

us ne bheja hai ek gulab mujhe

chand yādeñ haiñ chand sapne haiñ

apne hisse meñ aur kyā hai jī

chand yaaden hain chand sapne hain

apne hisse mein aur kya hai ji

saḳht-jānī kī badaulat ab bhī ham haiñ tāza-dam

ḳhushk ho jaate haiñ varna peḌ hil jaane ke ba.ad

saKHt-jaani ki badaulat ab bhi hum hain taza-dam

KHushk ho jate hain warna peD hil jaane ke baad

jī chāhtā hai jiinā jazbāt ke mutābiq

hālāt kar rahe haiñ hālāt ke mutābiq

ji chahta hai jina jazbaat ke mutabiq

haalat kar rahe hain haalat ke mutabiq

ik baḌī jañg laḌ rahā huuñ maiñ

hañs ke tujh se bichhaḌ rahā huuñ maiñ

ek baDi jang laD raha hun main

hans ke tujh se bichhaD raha hun main

is shoḳhi-e-guftār par aatā hai bahut pyaar

jab pyaar se kahte haiñ vo shaitān kahīñ kā

is shoKHi-e-guftar par aata hai bahut pyar

jab pyar se kahte hain wo shaitan kahin ka

tum ne rasman mujhe salām kiyā

log kyā kyā gumān kar baiThe

tum ne rasman mujhe salam kiya

log kya kya guman kar baiThe

kyā batā.ūñ ki kitnī shiddat se

tum se milne ko chāhtā hai jī

kya bataun ki kitni shiddat se

tum se milne ko chahta hai ji

raa.e us par mat karo qaa.em koī

jānte jis ko nahīñ nazdīk se

rae us par mat karo qaem koi

jaante jis ko nahin nazdik se

le jaa.e jahāñ chāhe havā ham ko uḌā kar

TuuTe hue pattoñ kī hikāyat hī alag hai

le jae jahan chahe hawa hum ko uDa kar

TuTe hue patton ki hikayat hi alag hai

ek mausam kī kasak hai dil meñ dafn

mīThā mīThā dard sā hai mustaqil

ek mausam ki kasak hai dil mein dafn

miTha miTha dard sa hai mustaqil

kis kis ko batā.ūñ ki maiñ buzdil nahīñ 'rāġhib'

is daur meñ mafhūm-e-sharāfat hī alag hai

kis kis ko bataun ki main buzdil nahin 'raghib'

is daur mein mafhum-e-sharafat hi alag hai

be-sabab 'rāġhib' taḌap uThtā hai dil

dil ko samjhānā paḌegā Thiik se

be-sabab 'raghib' taDap uThta hai dil

dil ko samjhana paDega Thik se

dil meñ kuchh bhī to na rah jā.egā

jab tirī chaah nikal jā.egī

dil mein kuchh bhi to na rah jaega

jab teri chah nikal jaegi

ye vasl kī rut hai ki judā.ī kā hai mausam

ye gulshan-e-dil hai ki bayābān kahīñ kā

ye wasl ki rut hai ki judai ka hai mausam

ye gulshan-e-dil hai ki bayaban kahin ka

'rāġhib' vo merī fikr meñ ḳhud ko bhī bhuul jaa.eñ

aisī to koī baat nahīñ chāhtā thā maiñ

'raghib' wo meri fikr mein KHud ko bhi bhul jaen

aisi to koi baat nahin chahta tha main

kyā batā.ūñ dil meñ kis kī yaad kā

ek kāñTā chubh rahā hai mustaqil

kya bataun dil mein kis ki yaad ka

ek kanTa chubh raha hai mustaqil

taqdīr-e-vafā kā phuuT jaanā

maiñ bhūlā na dil kā TuuT jaanā

taqdir-e-wafa ka phuT jaana

main bhula na dil ka TuT jaana

vo kahte haiñ ki 'rāġhib' tum nahīñ rakhte ḳhayāl apnā

maiñ kahtā huuñ ki har dam fikr dāman-gīr kis kī hai

wo kahte hain ki 'raghib' tum nahin rakhte KHayal apna

main kahta hun ki har dam fikr daman-gir kis ki hai