اوروں کی برائی کو نہ دیکھوں وہ نظر دے

ہاں اپنی برائی کو پرکھنے کا ہنر دے

رسوا ہوئے ذلیل ہوئے در بدر ہوئے

حق بات لب پہ آئی تو ہم بے ہنر ہوئے

وہ لوگ اپنے آپ میں کتنے عظیم تھے

جو اپنے دشمنوں سے بھی نفرت نہ کر سکے

پرند شاخ پہ تنہا اداس بیٹھا ہے

اڑان بھول گیا مدتوں کی بندش میں

تیری آمد کی منتظر آنکھیں

بجھ گئیں خاک ہو گئے رستے

اب کے سفر میں درد کے پہلو عجیب ہیں

جو لوگ ہم خیال نہ تھے ہم سفر ہوئے

اس بھرے شہر میں دن رات ٹھہرتے ہی نہیں

کون یادوں کے سفر نامے کو تحریر کرے

حادثوں کی مار سے ٹوٹے مگر زندہ رہے

زندگی جو زخم بھی تو نے دیا گہرا نہ تھا

میں کیا ہوں کون ہوں کیا چیز مجھ میں مضمر ہے

کئی حجاب اٹھائے مگر حجاب میں ہوں

پرند اونچی اڑانوں کی دھن میں رہتا ہے

مگر زمیں کی حدوں میں بسر بھی کرتا ہے

بہت عزیز تھے اس کو سفر کے ہنگامے

وہ سب کے ساتھ چلا تھا مگر اکیلا تھا

تو مجھ کو بھولنا چاہے تو بھول سکتا ہے

میں ایک حرف تمنا تری کتاب میں ہوں

جو زخم دیتا ہے تو بے اثر ہی دیتا ہے

خلش وہ دے کہ جسے بھول بھی نہ پاؤں میں

وہ لوگ جن کی زمانہ ہنسی اڑاتا ہے

اک عمر بعد انہیں معتبر بھی کرتا ہے

عجیب شخص تھا اس کو سمجھنا مشکل ہے

کنارے آب کھڑا تھا مگر وہ پیاسا تھا

دور تک ایک سیاہی کا بھنور آئے گا

خود میں اترو گے تو ایسا بھی سفر آئے گا

تری نگاہ تو خوش منظری پہ رہتی ہے

تیری پسند کے منظر کہاں سے لاؤں میں

اپنا لہو یتیم تھا کوئی نہ رنگ لا سکا

منصف سبھی خموش تھے عذر جفا کے سامنے

گھر میں کیا غم کے سوا تھا جو بہا لے جاتا

میری ویرانی پہ ہنستا رہا دریا اس کا

لوح جہاں پہ اس طرح لکھا گیا ہوں میں

جس کا کوئی جواب نہیں وہ سوال ہوں

حرف کو برگ نوا دیتا ہوں

یوں مرے پاس ہنر کچھ بھی نہیں

وہ شہر چھوڑ کے مدت ہوئی چلا بھی گیا

حد افق پہ مگر چاند روبرو ہے وہی

زمانہ لاکھ ستاروں کو چھو کے آ جائے

ابھی دلوں کو مگر حاجت رفو ہے وہی

حدود دل سے جو گزرا وہ جان لیوا تھا

یوں زلزلے تو کئی اس جہان میں آئے

ذرا سی ٹھیس لگی تھی کہ چور چور ہوا

ترے خیال کا پیکر بھی آبگینہ تھا

شب کی دیوار گری تو دیکھا

نوک نشتر ہے سحر کچھ بھی نہیں

جن کو زمین دیدۂ دل سے عزیز تھی

وہ کم نگاہ لوگ تھے ہجرت نہ کر سکے

تمام درد کے رشتوں سے واسطہ نہ رہے

حصار جسم سے نکلوں تو بے صدا ہو جاؤں

رواں تھی کوئی طلب سی لہو کے دریا میں

کہ موج موج بھنور عمر کا سفینہ تھا

حدود شہر سے باہر بھی بستیاں پھیلیں

سمٹ کے رہ گئے یوں جنگلوں کے گھیرے بھی

کسے خیال تھا مٹتی ہوئی عبارت کا

مہک رہا تھا چمن در چمن سماعت کا

کیا بستیاں تھیں جن کو ہوا نے مٹا دیا

ہر نقش بے نوا در و دیوار دیکھیے