اس ڈوبتے سورج سے تو امید ہی کیا تھی

ہنس ہنس کے ستاروں نے بھی دل توڑ دیا ہے

حال کہہ دیتے ہیں نازک سے اشارے اکثر

کتنی خاموش نگاہوں کی زباں ہوتی ہے

خود شناسی تھی جستجو تیری

تجھ کو ڈھونڈا تو آپ کو پایا

ان کے گیسو سنورتے جاتے ہیں

حادثے ہیں گزرتے جاتے ہیں

شام ہجراں بھی اک قیامت تھی

آپ آئے تو مجھ کو یاد آیا

تسکین دے سکیں گے نہ جام و سبو مجھے

بے چین کر رہی ہے تری آرزو مجھے

محبت کا ان کو یقیں آ چلا ہے

حقیقت بنے جا رہے ہیں فسانے

تصویر زندگی میں نیا رنگ بھر گئے

وہ حادثے جو دل پہ ہمارے گزر گئے

ان مست نگاہوں نے خود اپنا بھرم کھولا

انکار کے پردے میں اقرار نظر آئے

بہت دشوار تھی راہ محبت

ہمارا ساتھ دیتے ہم سفر کیا

کون سمجھے ہم پہ کیا گزری ہے نقشؔ

دل لرز اٹھتا ہے ذکر شام سے

یوں روٹھ کے جانے پہ میں خاموش ہوں لیکن

یہ بات مرے دل کو گوارا تو نہیں ہے

مری ناکامیوں پر ہنسنے والے

ترے پہلو میں شاید دل نہیں ہے

دنیا سے ہٹ کے اک نئی دنیا بنا سکیں

کچھ اہل آرزو اسی حسرت میں مر گئے

یوں گزرتے ہیں ہجر کے لمحے

جیسے وہ بات کرتے جاتے ہیں

اغیار کا شکوہ نہیں اس عہد ہوس میں

اک عمر کے یاروں نے بھی دل توڑ دیا ہے

کس طرح کریں تجھ سے گلہ تیرے ستم کا

مدہوش اشاروں نے بھی دل توڑ دیا ہے

پھر کسی کی بزم کا آیا خیال

پھر دھواں اٹھا دل ناکام سے

میری خاموشیوں کے عالم میں

گونج اٹھتی ہے آپ کی آواز

اے نقشؔ کر رہا تھا جنہیں غرق ناخدا

طوفاں کے زور سے وہ سفینے ابھر گئے

پھول روتے ہیں خار ہنستے ہیں

دیکھ! گلشن کا یہ نظارا بھی

ڈوبنے والے موج طوفاں سے

جانے کیا بات کرتے جاتے ہیں

یہ زور برق و باد یہ طوفان الاماں

محروم ہو نہ جائیں کہیں آشیاں سے ہم

زندگی کا بنا سہارا بھی

اور ان کے کرم نے مارا بھی

تری بزم طرب میں آ گیا ہوں

مگر دل کو سکوں حاصل نہیں ہے