آب دیدہ ہو کے وہ آپس میں کہنا الوداع

اس کی کم میری سوا آواز بھرائی ہوئی

زاہد سنبھل غرور خدا کو نہیں پسند

فرش زمیں پہ پاؤں دماغ آسمان پر

مخلوق کو تمہاری محبت میں اے بتو

ایمان کا خیال نہ اسلام کا لحاظ

گر آپ پہلے رشتۂ الفت نہ توڑتے

مر مٹ کے ہم بھی خیر نبھاتے کسی طرح

وہ ہی آسان کرے گا مری دشواری کو

جس نے دشوار کیا ہے مری آسانی کو

نکلے ہیں گھر سے دیکھنے کو لوگ ماہ عید

اور دیکھتے ہیں ابروئے خم دار کی طرف

کیوں اجاڑا زاہدو بتخانۂ آباد کو

مسجدیں کافی نہ ہوتیں کیا خدا کی یاد کو

بھیج تو دی ہے غزل دیکھیے خوش ہوں کہ نہ ہوں

کچھ کھٹکتے ہوئے الفاظ نظر آتے ہیں

نہ آیا کر کے وعدہ وصل کا اقرار تھا کیا تھا

کسی کے بس میں تھا مجبور تھا لاچار تھا کیا تھا

جنوں ہوتا ہے چھا جاتی ہے حیرت

کمال عقل اک دیوانہ پن ہے

دیکھنے والے یہ کہتے ہیں کتاب دہر میں

تو سراپا حسن کا نقشہ ہے میں تصویر عشق

فرق کیا مقتل میں اور گلزار میں

ڈھال میں ہیں پھول پھل تلوار میں

بال رخساروں سے جب اس نے ہٹائے تو کھلا

دو فرنگی سیر کو نکلے ہیں ملک شام سے

مری قسمت لکھی جاتی تھی جس دن میں اگر ہوتا

اڑا ہی لیتا دست کاتب تقدیر سے کاغذ

ٹھہر جاؤ بوسے لینے دو نہ توڑو سلسلہ

ایک کو کیا واسطہ ہے دوسرے کے کام سے

کسی کے سنگ در سے ایک مدت سر نہیں اٹھا

محبت میں ادا کی ہیں نمازیں بے وضو برسوں

اہل دنیا باؤلے ہیں باؤلوں کی تو نہ سن

نیند اڑاتا ہو جو افسانہ اس افسانہ سے بھاگ

مدت سے اشتیاق ہے بوس و کنار کا

گر حکم ہو شروع کرے اپنا کام حرص

اک ادنیٰ سا پردہ ہے اک ادنیٰ سا تفاوت

مخلوق میں معبود میں بندہ میں خدا میں

ہوتی نہ شریعت میں پرستش کبھی ممنوع

گر پہلے بھی بت خانوں میں ہوتے صنم ایسے

ہوا میں جب اڑا پردہ تو اک بجلی سی کوندی تھی

خدا جانے تمہارا پرتو رخسار تھا کیا تھا

بد قسمتوں کو گر ہو میسر شب وصال

سورج غروب ہوتے ہی ظاہر ہو نور صبح

دلوایئے بوسہ دھیان بھی ہے

اس قرضۂ واجب الادا کا

واعظ کو لعن طعن کی فرصت ہے کس طرح

پوری ابھی خدا کی طرف لو لگی نہیں

کس طرح کر دیا دل نازک کو چور چور

اس واقعہ کی خاک ہے پتھر کو اطلاع

اے صبا چلتی ہے کیوں اس درجہ اترائی ہوئی

اڑ گئی کافور بن بن کر حیا آئی ہوئی

کچھ تو کمی ہو روز جزا کے عذاب میں

اب سے پیا کریں گے ملا کر گلاب میں

مجھے جب مار ہی ڈالا تو اب دونوں برابر ہیں

اڑاؤ خاک صرصر بن کے یا باد صبا بن کر

سنتے سنتے واعظوں سے ہجو مے

ضعف سا کچھ آ گیا ایمان میں

اسی دن سے مجھے دونوں کی بربادی کا خطرہ تھا

مکمل ہو چکے تھے جس گھڑی ارض و سما بن کر

چبھیں گے زیرہ ہائے شیشۂ دل دست نازک میں

سنبھل کر ہاتھ ڈالا کیجیے میرے گریباں پر

دیئے جائیں گے کب تک شیخ صاحب کفر کے فتوے

رہیں گی ان کے صندوقچہ میں دیں کی کنجیاں کب تک

مر چکا میں تو نہیں اس سے مجھے کچھ حاصل

برسے گر پانی کی جا آب بقا میرے بعد

اگر لوہے کے گنبد میں رکھیں گے اقربا ان کو

وہیں پہنچائے گا عاشق کسی تدبیر سے کاغذ

کبھی نہ جائے گا عاشق سے دیکھ بھال کا روگ

پلاؤ لاکھ اسے بد مزہ دوائے فراق

جاں گھل چکی ہے غم میں اک تن ہے وہ بھی مہمل

معنی نہیں ہیں بالکل مجھ میں اگر بیاں ہوں

پی بادۂ احمر تو یہ کہنے لگا گل رو

میں سرخ ہوں تم سرخ زمیں سرخ زماں سرخ

پوچھ لے پرویںؔ سے یا قیس سے دریافت کر

شہر میں مشہور ہے تیرے فدائی کا عشق

پو پھٹتے ہی ریاضؔ جہاں خلد بن گیا

غلمان مہر ساتھ لئے آئی حور صبح