محبت کی سزا ترک محبت

محبت کا یہی انعام بھی ہے

اک حلقۂ احباب ہے تنہائی بھی اس کی

اک ہم ہیں کہ ہر بزم میں تنہا نظر آئے

زباں تک جو نہ آئے وہ محبت اور ہوتی ہے

فسانہ اور ہوتا ہے حقیقت اور ہوتی ہے

تیری قسمت ہی میں زاہد مئے نہیں

شکر تو مجبوریوں کا نام ہے

سرکشی خودکشی پہ ختم ہوئی

ایک رسی تھی جل گئی شاید

اس دور کی تخلیق بھی کیا شیشہ گری ہے

ہر آئینے میں آدمی الٹا نظر آئے

پی لیا کرتے ہیں جینے کی تمنا میں کبھی

لڑکھڑانا بھی ضروری ہے سنبھلنے کے لیے

میں تنگ ہوں سکون سے اب اضطراب دے

بے انتہا سکون بھی آزار ہی تو ہے

رات بھی مرجھا چلی چاند بھی کمھلا گیا

پھر بھی ترا انتظار دیکھیے کب تک رہے

ہارنے جیتنے سے کچھ نہیں ہوتا وامقؔ

کھیل ہر سانس پہ ہے داؤں لگاتے رہنا

ہم نہ کہتے تھے شاعری ہے وبال

آج لو گھر گئے حسینوں میں

نہیں ملتے تو اک ادنیٰ شکایت ہے نہ ملنے کی

مگر مل کر نہ ملنے کی شکایت اور ہوتی ہے

تم ہوش میں جب آئے تو آفت ہی بن کے آئے

اب میرے پاس جب بھی تم آؤ نشے میں آؤ

رہنا تم چاہے جہاں خبروں میں آتے رہنا

ہم کو احساس جدائی سے بچاتے رہنا

نہ پوچھو بے بسی اس تشنہ لب کی

کہ جس کی دسترس میں جام بھی ہے

جب پرانا لہجہ کھو دیتا ہے اپنی تازگی

اک نئی طرز نوا ایجاد کر لیتے ہیں ہم

وہ لمحہ بھر کی ملی خلد میں جو آزادی

تو قید ہو گئے مٹی میں ہم سدا کے لیے

لے کے تیشہ اٹھا ہے پھر مزدور

ڈھل رہے ہیں جبل مشینوں میں

یقیناً آ گیا ہے مے کدے میں تشنہ لب کوئی

کہ پیتا جا رہا ہوں کیفیت کم ہوتی جاتی ہے

اگر غبار ہو دل میں اگر ہو تنگ نظر

تو مہر و ماہ سے بھی تیرگی نہیں جاتی

وہ تو کہئے آج بھی زنجیر میں جھنکار ہے

ورنہ کس کو یاد رہ جاتی ہے دیوانوں کی بات

پہچان لو اس کو وہی قاتل ہے ہمارا

جس ہاتھ میں ٹوٹی ہوئی تلوار لگے ہے

بدلتی رہتی ہیں قدریں رحیل وقت کے ساتھ

زمانہ بدلے گا ہر شے کا نام بدلے گا

مجھے اس جنوں کی ہے جستجو جو چمن کو بخش دے رنگ و بو

جو نوید فصل بہار ہو مجھے اس نظر کی تلاش ہے

یہ مانا شیشۂ دل رونق بازار الفت ہے

مگر جب ٹوٹ جاتا ہے تو قیمت اور ہوتی ہے

وہ وعدے یاد نہیں تشنہ ہے مگر اب تک

وہ وعدے بھی کوئی وعدے جو مے پلا کے لیے

وہ جو تسبیح لیے ہے اس کو

میرے آگے سے اٹھا دے ساقی

کس نے بسایا تھا اور ان کو کس نے یوں برباد کیا

اپنے لہو کی بو آتی ہے ان اجڑے بازاروں سے

کون سنتا ہے بھکاری کی صدائیں اس لیے

کچھ ظریفانہ لطیفے یاد کر لیتے ہیں ہم

یہ زندگی کی رات ہے تاریک کس قدر

دونوں سروں پہ شمع جلاؤ نشے میں آؤ

لاکھ آباد تمنا ہو کے دل

پھر بھی ویراں ہے نہ جانے کس لیے

یہ ہم کو چھوڑ کے تنہا کہاں چلے وامقؔ

ابھی تو منزل معراج دار باقی ہے

مرے فکر و فن کو نئی فضا نئے بال و پر کی تلاش ہے

جو قفس کو یاس کے پھونک دے مجھے اس شرر کی تلاش ہے

دیکھیے کب راہ پر ٹھیک سے اٹھیں قدم

رات کی مے کا خمار دیکھیے کب تک رہے

اے کاش مرے گوش و نظر بھی رہیں ثابت

جب حسن سنا جائے یا نغمہ نظر آئے

ہم کو حاجت نہیں نقیبوں کی

شعر اپنا نقیب ہے خود ہی

ہے جس کی ٹھوکروں میں آب زندگی وامقؔ

وہ تشنگی کا سمندر دکھائی دیتا ہے

اسے ضد کہ وامقؔ شکوہ گر کسی راز سے نہ ہو با خبر

مجھے ناز ہے کہ یہ دیدہ ور مری عمر بھر کی تلاش ہے

ارے او ادیب فسردہ خو ارے او مغنی رنگ و بو

ابھی حاشیے پہ کھڑا ہے تو بہت آگے اہل ہنر گئے