apne sabhī gile bajā par hai yahī ki dilrubā

merā tirā mo.āmla ishq ke bas kā thā nahīñ

apne sabhi gile baja par hai yahi ki dilruba

mera tera moamla ishq ke bas ka tha nahin

saarī duniyā ke ġham hamāre haiñ

aur sitam ye ki ham tumhāre haiñ

sari duniya ke gham hamare hain

aur sitam ye ki hum tumhaare hain

hameñ shikva nahīñ ik dūsre se

manānā chāhiye is par ḳhushī kyā

hamein shikwa nahin ek dusre se

manana chahiye is par KHushi kya

ab nahīñ mileñge ham kūcha-e-tamannā meñ

kūcha-e-tamannā meñ ab nahīñ mileñge ham

ab nahin milenge hum kucha-e-tamanna mein

kucha-e-tamanna mein ab nahin milenge hum

rakho dair-o-haram ko ab muqaffal

ka.ī pāgal yahāñ se bhaag nikle

rakho dair-o-haram ko ab muqaffal

kai pagal yahan se bhag nikle

us ke hoñThoñ pe rakh ke hoñTh apne

baat hī ham tamām kar rahe haiñ

us ke honThon pe rakh ke honTh apne

baat hi hum tamam kar rahe hain

ye paiham talḳh-kāmī sī rahī kyā

mohabbat zahr khā kar aa.ī thī kyā

ye paiham talKH-kaami si rahi kya

mohabbat zahr kha kar aai thi kya

maiñ sahūñ karb-e-zindagī kab tak

rahe āḳhir tirī kamī kab tak

main sahun karb-e-zindagi kab tak

rahe aaKHir teri kami kab tak

ham ne kyuuñ ḳhud pe e'tibār kiyā

saḳht be-e'tibār the ham to

hum ne kyun KHud pe e'tibar kiya

saKHt be-e'tibar the hum to

maiñ jo huuñ 'jaun-elia' huuñ janāb

is kā behad lihāz kījiyegā

main jo hun 'jaun-elia' hun janab

is ka behad lihaz kijiyega

rehn sarshārī-e-fazā ke haiñ

aaj ke ba.ad ham havā ke haiñ

rehn sarshaari-e-faza ke hain

aaj ke baad hum hawa ke hain

tirī qīmat ghaTā.ī jā rahī hai

mujhe furqat sikhā.ī jā rahī hai

teri qimat ghaTai ja rahi hai

mujhe furqat sikhai ja rahi hai

maiñ le ke dil ke rishte ghar se nikal chukā huuñ

dīvār-o-dar ke rishte dīvār-o-dar meñ hoñge

main le ke dil ke rishte ghar se nikal chuka hun

diwar-o-dar ke rishte diwar-o-dar mein honge

ab ki jab jānāna tum ko hai sabhī par e'tibār

ab tumheñ jānāna mujh par e'tibār aayā to kyā

ab ki jab jaanana tum ko hai sabhi par e'tibar

ab tumhein jaanana mujh par e'tibar aaya to kya

'jaun' duniyā kī chākarī kar ke

tū ne dil kī vo naukrī kyā kī

'jaun' duniya ki chaakari kar ke

tu ne dil ki wo naukri kya ki

maiñ is dīvār par chaḌh to gayā thā

utāre kaun ab dīvār par se

main is diwar par chaDh to gaya tha

utare kaun ab diwar par se

teġh to 'jaun' pheñk diije magar

haath meñ apne Dhaal to rakhiye

tegh to 'jaun' phenk dije magar

hath mein apne Dhaal to rakhiye

na.ī ḳhvāhish rachā.ī jā rahī hai

tirī furqat manā.ī jā rahī hai

nai KHwahish rachai ja rahi hai

teri furqat manai ja rahi hai

mirī sharāb kā shohra hai ab zamāne meñ

so ye karam hai to kis kā hai ab bhī aa jaao

meri sharab ka shohra hai ab zamane mein

so ye karam hai to kis ka hai ab bhi aa jao

aur kyā chāhtī hai gardish-e-ayyām ki ham

apnā ghar bhuul ga.e un kī galī bhuul ga.e

aur kya chahti hai gardish-e-ayyam ki hum

apna ghar bhul gae un ki gali bhul gae

mustaqil boltā hī rahtā huuñ

kitnā ḳhāmosh huuñ maiñ andar se

mustaqil bolta hi rahta hun

kitna KHamosh hun main andar se

aap apnī galī ke saa.il ko

kam se kam par savāl to rakhiye

aap apni gali ke sail ko

kam se kam par sawal to rakhiye

ham ajab haiñ ki us kī bāhoñ meñ

shikva-e-nārasā.ī karte haiñ

hum ajab hain ki us ki bahon mein

shikwa-e-narasai karte hain

jāniye us se nibhegī kis tarah

vo ḳhudā hai maiñ to banda bhī nahīñ

jaaniye us se nibhegi kis tarah

wo KHuda hai main to banda bhi nahin

maiñ bhī bahut ajiib huuñ itnā ajiib huuñ ki bas

ḳhud ko tabāh kar liyā aur malāl bhī nahīñ

main bhi bahut ajib hun itna ajib hun ki bas

KHud ko tabah kar liya aur malal bhi nahin

ek hī to havas rahī hai hameñ

apnī hālat tabāh kī jaa.e

ek hi to hawas rahi hai hamein

apni haalat tabah ki jae

ḳhudā se le liyā jannat kā va.ade

ye zāhid to baḌe hī ghaag nikle

KHuda se le liya jannat ka wade

ye zahid to baDe hi ghag nikle

kis liye dekhtī ho ā.īna

tum to ḳhud se bhī ḳhūbsūrat ho

kis liye dekhti ho aaina

tum to KHud se bhi KHubsurat ho

in laboñ kā lahū na pī jā.ūñ

apnī tishna-labī se ḳhatra hai

in labon ka lahu na pi jaun

apni tishna-labi se KHatra hai

jam.a ham ne kiyā hai ġham dil meñ

is kā ab suud khaa.e jā.eñge

jama hum ne kiya hai gham dil mein

is ka ab sud khae jaenge

bahut katrā rahe hū muġhbachoñ se

gunāh-e-tark-e-bāda kar liyā kyā

bahut katra rahe hu mughbachon se

gunah-e-tark-e-baada kar liya kya

mujh se ab log kam hī milte haiñ

yuuñ bhī maiñ haT gayā huuñ manzar se

mujh se ab log kam hi milte hain

yun bhi main haT gaya hun manzar se

us se har-dam mo.āmla hai magar

darmiyāñ koī silsila hī nahīñ

us se har-dam moamla hai magar

darmiyan koi silsila hi nahin

mujhe ab hosh aatā jā rahā hai

ḳhudā terī ḳhudā.ī jā rahī hai

mujhe ab hosh aata ja raha hai

KHuda teri KHudai ja rahi hai

paḌī rahne do insānoñ kī lāsheñ

zamīñ kā bojh halkā kyuuñ kareñ ham

paDi rahne do insanon ki lashen

zamin ka bojh halka kyun karen hum

ḳharch chalegā ab mirā kis ke hisāb meñ bhalā

sab ke liye bahut huuñ maiñ apne liye zarā nahīñ

KHarch chalega ab mera kis ke hisab mein bhala

sab ke liye bahut hun main apne liye zara nahin

ham ko hargiz nahīñ ḳhudā manzūr

ya.anī ham be-tarah ḳhudā ke haiñ

hum ko hargiz nahin KHuda manzur

yani hum be-tarah KHuda ke hain

koī mujh tak pahuñch nahīñ paatā

itnā āsān hai patā merā

koi mujh tak pahunch nahin pata

itna aasan hai pata mera

mujh ko ḳhvāhish hī DhūñDne kī na thī

mujh meñ khoyā rahā ḳhudā merā

mujh ko KHwahish hi DhunDne ki na thi

mujh mein khoya raha KHuda mera

jān-e-man terī be-naqābī ne

aaj kitne naqāb beche haiñ

jaan-e-man teri be-naqabi ne

aaj kitne naqab beche hain

aur to kyā thā bechne ke liye

apnī āñkhoñ ke ḳhvāb beche haiñ

aur to kya tha bechne ke liye

apni aankhon ke KHwab beche hain

hamāre zaḳhm-e-tamannā purāne ho ga.e haiñ

ki us galī meñ ga.e ab zamāne ho ga.e haiñ

hamare zaKHm-e-tamanna purane ho gae hain

ki us gali mein gae ab zamane ho gae hain

mujh ko to koī Toktā bhī nahīñ

yahī hotā hai ḳhāndān meñ kyā

mujh ko to koi Tokta bhi nahin

yahi hota hai KHandan mein kya

bolte kyuuñ nahīñ mire haq meñ

aable paḌ ga.e zabān meñ kyā

bolte kyun nahin mere haq mein

aable paD gae zaban mein kya

yuuñ jo taktā hai āsmān ko tū

koī rahtā hai āsmān meñ kyā

yun jo takta hai aasman ko tu

koi rahta hai aasman mein kya

ye mujhe chain kyuuñ nahīñ paḌtā

ek hī shaḳhs thā jahān meñ kyā

ye mujhe chain kyun nahin paDta

ek hi shaKHs tha jahan mein kya

merī har baat be-asar hī rahī

naqs hai kuchh mire bayān meñ kyā

meri har baat be-asar hi rahi

naqs hai kuchh mere bayan mein kya

ye vaar kar gayā hai pahlū se kaun mujh par

thā maiñ hī daa.eñ baa.eñ aur maiñ hī darmiyāñ thā

ye war kar gaya hai pahlu se kaun mujh par

tha main hi daen baen aur main hi darmiyan tha

ab jo rishtoñ meñ bañdhā huuñ to khulā hai mujh par

kab parind uḌ nahīñ paate haiñ paroñ ke hote

ab jo rishton mein bandha hun to khula hai mujh par

kab parind uD nahin pate hain paron ke hote

kaun se shauq kis havas kā nahīñ

dil mirī jaan tere bas kā nahīñ

kaun se shauq kis hawas ka nahin

dil meri jaan tere bas ka nahin