چلو میکدے میں بسیرا ہی کر لو

نہ آنا پڑے گا نہ جانا پڑے گا

جی نہیں آپ سے کیا مجھ کو شکایت ہوگی

ہاں مجھے تلخئ حالات پہ رونا آیا

کیوں اجڑ جاتی ہے دل کی محفل

یہ دیا کون بجھا دیتا ہے

کیا قیامت ہے ہجر کے دن بھی

زندگی میں شمار ہوتے ہیں

دل ناداں تری حالت کیا ہے

تو نہ اپنوں میں نہ بیگانوں میں

آج کی رات وہ آئے ہیں بڑی دیر کے بعد

آج کی رات بڑی دیر کے بعد آئی ہے

کبھی جگر پہ کبھی دل پہ چوٹ پڑتی ہے

تری نظر کے نشانے بدلتے رہتے ہیں

میرا ہونا بھی کوئی ہونا ہے

میری ہستی بھی کوئی ہستی ہے

سیفؔ انداز بیاں رنگ بدل دیتا ہے

ورنہ دنیا میں کوئی بات نئی بات نہیں

ایسے لمحے بھی گزارے ہیں تری فرقت میں

جب تری یاد بھی اس دل پہ گراں گزری ہے

زندگی کس طرح کٹے گی سیفؔ

رات کٹتی نظر نہیں آتی

قریب نزع بھی کیوں چین لے سکے کوئی

نقاب رخ سے اٹھا لو تمہیں کسی سے کیا

دل نے پایا قرار پہلو میں

گردش کائنات ختم ہوئی

بولے وہ کچھ ایسی بے رخی سے

دل ہی میں رہا سوال اپنا

پاس آئے تو اور ہو گئے دور

یہ کتنے عجیب فاصلے ہیں

تم کو بیگانے بھی اپناتے ہیں میں جانتا ہوں

میرے اپنے بھی پرائے ہیں تمہیں کیا معلوم

کوئی ایسا اہل دل ہو کہ فسانۂ محبت

میں اسے سنا کے روؤں وہ مجھے سنا کے روئے

غم گسارو بہت اداس ہوں میں

آج بہلا سکو تو آ جاؤ

تمہارے بعد خدا جانے کیا ہوا دل کو

کسی سے ربط بڑھانے کا حوصلہ نہ ہوا

اس مسافر کی نقاہت کا ٹھکانہ کیا ہے

سنگ منزل جسے دیوار نظر آنے لگے

دل ویراں کو دیکھتے کیا ہو

یہ وہی آرزو کی بستی ہے

تم نے دیوانہ بنایا مجھ کو

لوگ افسانہ بنائیں گے تمہیں

جس دن سے بھلا دیا ہے تو نے

آتا ہی نہیں خیال اپنا

کیسے جیتے ہیں یہ کس طرح جیے جاتے ہیں

اہل دل کی بسر اوقات پہ رونا آیا

ہمیں خبر ہے وہ مہمان ایک رات کا ہے

ہمارے پاس بھی سامان ایک رات کا ہے

کتنے انجان ہیں کیا سادگی سے پوچھتے ہیں

کہیے کیا میری کسی بات پہ رونا آیا

رات گزرے نہ درد دل ٹھہرے

کچھ تو بڑھ جائے کچھ تو گھٹ جائے

تھکی تھکی سی فضائیں بجھے بجھے تارے

بڑی اداس گھڑی ہے ذرا ٹھہر جاؤ

مری داستان حسرت وہ سنا سنا کے روئے

مرے آزمانے والے مجھے آزما کے روئے

آپ ٹھہرے ہیں تو ٹھہرا ہے نظام عالم

آپ گزرے ہیں تو اک موج رواں گزری ہے

یہ آلام ہستی یہ دور زمانہ

تو کیا اب تمہیں بھول جانا پڑے گا

سیفؔ پی کر بھی تشنگی نہ گئی

اب کے برسات اور ہی کچھ تھی

دشمن گئے تو کشمکش دوستی گئی

دشمن گئے کہ دوست ہمارے چلے گئے

شور دن کو نہیں سونے دیتا

شب کو سناٹا جگا دیتا ہے

کتنا بیکار تمنا کا سفر ہوتا ہے

کل کی امید پہ ہر آج بسر ہوتا ہے

شاید تمہارے ساتھ بھی واپس نہ آ سکیں

وہ ولولے جو ساتھ تمہارے چلے گئے

پھول اس خاکداں کے ہم بھی ہیں

مدعی دو جہاں کے ہم بھی ہیں

حسن جلوہ دکھا گیا اپنا

عشق بیٹھا رہا اداس کہیں

اپنی وسعت میں کھو چکا ہوں میں

راہ دکھلا سکو تو آ جاؤ