مجھے خبر نہیں غم کیا ہے اور خوشی کیا ہے

یہ زندگی کی ہے صورت تو زندگی کیا ہے

تمام عمر اسی رنج میں تمام ہوئی

کبھی یہ تم نے نہ پوچھا تری خوشی کیا ہے

کسی معشوق کا عاشق سے خفا ہو جانا

روح کا جسم سے گویا ہے جدا ہو جانا

موت ہی آپ کے بیمار کی قسمت میں نہ تھی

ورنہ کب زہر کا ممکن تھا دوا ہو جانا

ساقی و واعظ میں ضد ہے بادہ کش چکر میں ہے

توبہ لب پر اور لب ڈوبا ہوا ساغر میں ہے

ہمارا انتخاب اچھا نہیں اے دل تو پھر تو ہی

خیال یار سے بہتر کوئی مہمان پیدا کر

کسی کو بھیج کے خط ہائے یہ کیسا عذاب آیا

کہ ہر اک پوچھتا ہے نامہ بر آیا جواب آیا

روک لے اے ضبط جو آنسو کہ چشم تر میں ہے

کچھ نہیں بگڑا ابھی تک گھر کی دولت گھر میں ہے

کر کے دفن اپنے پرائے چل دیے

بیکسی کا قبر پر ماتم رہا

ایک دل ہے ایک حسرت ایک ہم ہیں ایک تم

اتنے غم کم ہیں جو کوئی اور غم پیدا کریں

جب ملاقات ہوئی تم سے تو تکرار ہوئی

ایسے ملنے سے تو بہتر ہے جدا ہو جانا

قاصد نئی ادا سے ادائے پیام ہو

مطلب یہ ہے کہ بات نہ ہو اور کلام ہو

شیخ کو جنت مبارک، ہم کو دوزخ ہے قبول

فکر عقبیٰ وہ کریں، ہم خدمت دنیا کریں

تنگ آ گیا ہوں وسعت مفہوم عشق سے

نکلا جو حرف منہ سے وہ افسانہ ہو گیا

یہ صدمہ جیتے جی دل سے ہمارے جا نہیں سکتا

انہیں وہ بھولے بیٹھے ہیں جو ان پر مرنے والے ہیں

کیوں چپ ہیں وہ بے بات سمجھ میں نہیں آتا

یہ رنگ ملاقات سمجھ میں نہیں آتا

میرا حال زار تو دیکھا مگر

یہ نہ پوچھا کیوں یہ حالت ہو گئی

مطمئن اپنے یقیں پر اگر انساں ہو جائے

سو حجابوں میں جو پنہاں ہے نمایاں ہو جائے

ہے وہ جب دل میں تو کیسی جستجو

ڈھونڈنے والوں کی غفلت دیکھنا

حالت دل بیتاب کی دیکھی نہیں جاتی

بہتر ہے کہ ہو جائے یہ پیوند زمیں کا

ہم اپنی بے قراری دل سے ہیں بے قرار

آمیزش سکوں ہے اس اضطراب میں

عشق رسوا کن عالم وہ ہے احسنؔ جس سے

نیک ناموں کی بھی بد نامی و رسوائی ہے

راہ الفت کا نشاں یہ ہے کہ وہ ہے بے نشاں

جادہ کیسا نقش پا تک کوئی منزل میں نہیں