mujhe ḳhabar nahīñ ġham kyā hai aur ḳhushī kyā hai

ye zindagī kī hai sūrat to zindagī kyā hai

mujhe KHabar nahin gham kya hai aur KHushi kya hai

ye zindagi ki hai surat to zindagi kya hai

tamām umr isī rañj meñ tamām huī

kabhī ye tum ne na pūchā tirī ḳhushī kyā hai

tamam umr isi ranj mein tamam hui

kabhi ye tum ne na pucha teri KHushi kya hai

kisī māshūq kā āshiq se ḳhafā ho jaanā

ruuh kā jism se goyā hai judā ho jaanā

kisi mashuq ka aashiq se KHafa ho jaana

ruh ka jism se goya hai juda ho jaana

maut hī aap ke bīmār kī qismat meñ na thī

varna kab zahr kā mumkin thā davā ho jaanā

maut hi aap ke bimar ki qismat mein na thi

warna kab zahr ka mumkin tha dawa ho jaana

saaqī o vaa.iz meñ zid hai bāda-kash chakkar meñ hai

tauba lab par aur lab Duubā huā sāġhar meñ hai

saqi o waiz mein zid hai baada-kash chakkar mein hai

tauba lab par aur lab Duba hua saghar mein hai

hamārā intiḳhāb achchhā nahīñ ai dil to phir tū hī

ḳhayāl-e-yār se behtar koī mehmān paidā kar

hamara intiKHab achchha nahin ai dil to phir tu hi

KHayal-e-yar se behtar koi mehman paida kar

kisī ko bhej ke ḳhat haa.e ye kaisā azaab aayā

ki har ik pūchhtā hai nāma-bar aayā javāb aayā

kisi ko bhej ke KHat hae ye kaisa azab aaya

ki har ek puchhta hai nama-bar aaya jawab aaya

kar ke dafn apne parā.e chal diye

bekasī kā qabr par mātam rahā

kar ke dafn apne parae chal diye

bekasi ka qabr par matam raha

rok le ai zabt jo aañsū ki chashm-e-tar meñ hai

kuchh nahīñ bigḌā abhī tak ghar kī daulat ghar meñ hai

rok le ai zabt jo aansu ki chashm-e-tar mein hai

kuchh nahin bigDa abhi tak ghar ki daulat ghar mein hai

ek dil hai ek hasrat ek ham haiñ ek tum

itne ġham kam haiñ jo koī aur ġham paidā kareñ

ek dil hai ek hasrat ek hum hain ek tum

itne gham kam hain jo koi aur gham paida karen

jab mulāqāt huī tum se to takrār huī

aise milne se to behtar hai judā ho jaanā

jab mulaqat hui tum se to takrar hui

aise milne se to behtar hai juda ho jaana

qāsid na.ī adā se adā-e-payām ho

matlab ye hai ki baat na ho aur kalām ho

qasid nai ada se ada-e-payam ho

matlab ye hai ki baat na ho aur kalam ho

shaiḳh ko jannat mubārak ham ko dozaḳh hai qubūl

fikr-e-uqbā vo kareñ ham ḳhidamt-e-dunyā kareñ

shaiKH ko jannat mubarak hum ko dozaKH hai qubul

fikr-e-uqba wo karen hum KHidamt-e-dunya karen

tañg aa gayā huuñ vusat-e-mafhūm-e-ishq se

niklā jo harf muñh se vo afsāna ho gayā

tang aa gaya hun wusat-e-mafhum-e-ishq se

nikla jo harf munh se wo afsana ho gaya

ye sadma jiite jī dil se hamāre jā nahīñ saktā

unheñ vo bhūle baiThe haiñ jo un par marne vaale haiñ

ye sadma jite ji dil se hamare ja nahin sakta

unhen wo bhule baiThe hain jo un par marne wale hain

kyuuñ chup haiñ vo be-bāt samajh meñ nahīñ aatā

ye rañg-e-mulāqāt samajh meñ nahīñ aatā

kyun chup hain wo be-baat samajh mein nahin aata

ye rang-e-mulaqat samajh mein nahin aata

merā hāl-e-zār to dekhā magar

ye na pūchhā kyuuñ ye hālat ho ga.ī

mera haal-e-zar to dekha magar

ye na puchha kyun ye haalat ho gai

mutma.in apne yaqīñ par agar insāñ ho jaa.e

sau hijāboñ meñ jo pinhāñ hai numāyāñ ho jaa.e

mutmain apne yaqin par agar insan ho jae

sau hijabon mein jo pinhan hai numayan ho jae

hai vo jab dil meñ to kaisī justujū

DhūñDne vāloñ kī ġhaflat dekhnā

hai wo jab dil mein to kaisi justuju

DhunDne walon ki ghaflat dekhna

hālat dil-e-betāb kī dekhī nahīñ jaatī

behtar hai ki ho jaa.e ye paivand zamīñ kā

haalat dil-e-betab ki dekhi nahin jati

behtar hai ki ho jae ye paiwand zamin ka

ham apnī be-qarāri-e-dil se haiñ be-qarār

āmezish-e-sukūñ hai is iztirāb meñ

hum apni be-qarari-e-dil se hain be-qarar

aamezish-e-sukun hai is iztirab mein

ishq rusvā-kun-e-ālam vo hai 'ahsan' jis se

nek-nāmoñ kī bhī bad-nāmī o rusvā.ī hai

ishq ruswa-kun-e-alam wo hai 'ahsan' jis se

nek-namon ki bhi bad-nami o ruswai hai

rāh-e-ulfat kā nishāñ ye hai ki vo hai be-nishāñ

jaada kaisā naqsh-e-pā tak koī manzil meñ nahīñ

rah-e-ulfat ka nishan ye hai ki wo hai be-nishan

jada kaisa naqsh-e-pa tak koi manzil mein nahin