ابھی تہذیب کا نوحہ نہ لکھنا

ابھی کچھ لوگ اردو بولتے ہیں

یہ معجزہ ہمارے ہی طرز بیاں کا تھا

اس نے وہ سن لیا تھا جو ہم نے کہا نہ تھا

اپنوں سے جنگ ہے تو بھلے ہار جاؤں میں

لیکن میں اپنے ساتھ سپاہی نہ لاؤں گا

وہ جگنو ہو ستارہ ہو کہ آنسو

اندھیرے میں سبھی مہتاب سے ہیں

کوئی منظر نہیں برسات کے موسم میں بھی

اس کی زلفوں سے پھسلتی ہوئی دھوپوں جیسا

پرانے وقتوں کے کچھ لوگ اب بھی کہتے ہیں

بڑا وہی ہے جو دشمن کو بھی معاف کرے

تمہارے خط کبھی پڑھنا کبھی ترتیب سے رکھنا

عجب مشغولیت رہتی ہے بیکاری کے موسم میں

میں جھوٹ کو سچائی کے پیکر میں سجاتا

کیا کیجیے مجھ کو یہ ہنر ہی نہیں آیا

رنج و غم سہنے کی عادت ہو گئی ہے

زندہ رہنے کے سلیقے دے گیا وہ

لوگ یہ سوچ کے ہی پریشان ہیں

میں زمیں تھا تو کیوں آسماں ہو گیا

لاج رکھنی پڑ گئی ہے دوستوں کی

ہم بھری محفل میں جھوٹے ہو گئے ہیں

رنج و غم ٹھوکریں مایوسی گھٹن بے زاری

میرے خوابوں کی یہ تعبیر بھی ہو سکتی ہے

یہ بھی کیا بات کہ میں تیری انا کی خاطر

تیری قامت سے زیادہ ترا سایا چاہوں

چلو امن و اماں ہے میکدے میں

وہیں کچھ پل ٹھہر کر دیکھتے ہیں

جگنو تھا کہکشاں تھا ستارہ تھا یا گہر

آنسو کسی کی آنکھ سے جب تک گرا نہ تھا

جام شراب اب تو مرے سامنے نہ رکھ

آنکھوں میں نور ہاتھ میں جنبش کہاں ہے اب

وہ اک لمحہ جو تیرے وصل کا تھا

بیاض ہجر پر لکھا ہوا ہے

دلوں میں کرب بڑھتا جا رہا ہے

مگر چہرے ابھی شاداب سے ہیں

یہ منصفان شہر ہیں یہ پاسبان شہر

ان کو بتاؤ نام جو بلوائیوں کے ہیں

ذرا یادوں کے ہی پتھر اچھالو

نواح جاں میں سناٹے بہت ہیں