انہونی کچھ ضرور ہوئی دل کے ساتھ آج

نادان تھا مگر یہ دوانا کبھی نہ تھا

ہر دل عزیز وہ بھی ہے ہم بھی ہیں خوش مزاج

اب کیا بتائیں کیسے ہماری نہیں بنی

در بدر کی خاک تھی تقدیر میں

ہم لیے کاندھوں پہ گھر چلتے رہے

خود پہ یہ ظلم گوارا نہیں ہوگا ہم سے

ہم تو شعلوں سے نہ گزریں گے نہ سیتا سمجھیں

اپنی تو کوئی بات بنائے نہیں بنی

کچھ ہم نہ کہہ سکے تو کچھ اس نے نہیں سنی

دہشت زدہ زمیں پر وحشت بھرے مکاں یہ

اس شہر بے اماں کا آخر کوئی خدا ہے

جن میں کھو کر ہم خود کو بھی بھول گئے ہیں

کیا ہم کو بھی ان آنکھوں نے ڈھونڈا ہوگا

جانے کیا کچھ ہے آج ہونے کو

جی مرا چاہتا ہے رونے کو

اٹھ کر چلے گئے تو کبھی پھر نہ آئیں گے

پھر لاکھ تم بلاؤ صدائیں دیا کرو

ہے یوں کہ کچھ تو بغاوت سرشت ہم بھی ہیں

ستم بھی اس نے ضرورت سے کچھ زیادہ کیا

میری طرح ٹوٹے آئینے میں اس نے بھی

ٹکڑے ٹکڑے اپنے آپ کو پایا ہوگا

کتنے سادہ ہیں ہم کہ بیٹھے ہیں

داغ دل آنسوؤں سے دھونے کو

ہم تو بیگانے سے خود کو بھی ملے ہیں بلقیسؔ

کس توقع پہ کسی شخص کو اپنا سمجھیں

تمام لالہ و گل کے چراغ روشن ہیں

شجر شجر پہ شگوفوں میں جل رہی ہے ہوا

بس ایک جان بچی تھی چھڑک دی راہوں پر

دل غریب نے اک اہتمام سادہ کیا

خود اپنی فکر اگاتی ہے وہم کے کانٹے

الجھ الجھ کے مرا ہر سوال ٹھہرا ہے

تیری تو بلقیسؔ نرالی ہی باتیں ہیں

اس دنیا میں کیسے ترا گزارا ہوگا

نہیں ہے خواب دیوانے کا ہستی

یہ دنیا صرف اک دھوکا نہیں ہے

یوں چپ رہا کرے سے تو ہو جائے ہے جنوں

زخم نہاں کرید کے کچھ رو لیا کرو

کس نے کہا کسی کا کہا تم کیا کرو

لیکن کہے کوئی تو کبھی سن لیا کرو

ذرا سی دیر بھی رکتا تو کچھ پتا چلتا

وہ رنگ تھا کہ تھی خوشبو سحاب سا کیا تھا

ہم بھی ہیں بلقیسؔ مجروحین میں

ہم پہ بھی تیر و تبر چلتے رہے