ġham-e-dil ab kisī ke bas kā nahīñ

kyā davā kyā duā kare koī

gham-e-dil ab kisi ke bas ka nahin

kya dawa kya dua kare koi

tum aziiz aur tumhārā ġham bhī aziiz

kis se kis kā gilā kare koī

tum aziz aur tumhaara gham bhi aziz

kis se kis ka gila kare koi

vo pūchhte haiñ dil-e-mubtalā kā haal aur ham

javāb meñ faqat aañsū bahā.e jaate haiñ

wo puchhte hain dil-e-mubtala ka haal aur hum

jawab mein faqat aansu bahae jate hain

us ne is andāz se dekhā mujhe

zindagī bhar kā gila jaatā rahā

us ne is andaz se dekha mujhe

zindagi bhar ka gila jata raha

mirā vajūd haqīqat mirā adam dhokā

fanā kī shakl meñ sar-chashma-e-baqā huuñ maiñ

mera wajud haqiqat mera adam dhoka

fana ki shakl mein sar-chashma-e-baqa hun main

bedard mujh se sharh-e-ġham-e-zindagī na pūchh

kaafī hai is qadar ki jiye jā rahā huuñ maiñ

bedard mujh se sharh-e-gham-e-zindagi na puchh

kafi hai is qadar ki jiye ja raha hun main

ab vo piirī meñ kahāñ ahd-e-javānī kī umañg

rañg maujoñ kā badal jāatā hai sāhil ke qarīb

ab wo piri mein kahan ahd-e-jawani ki umang

rang maujon ka badal jaata hai sahil ke qarib

ab kyuuñ gila rahegā mujhe hijr-e-yār kā

be-tābiyoñ se lutf uThāne lagā huuñ maiñ

ab kyun gila rahega mujhe hijr-e-yar ka

be-tabiyon se lutf uThane laga hun main

uThne ko to uThā huuñ mahfil se tirī lekin

ab dil ko ye dhaḌkā hai jā.ūñ to kidhar jā.ūñ

uThne ko to uTha hun mahfil se teri lekin

ab dil ko ye dhaDka hai jaun to kidhar jaun

lutf-e-jafā isī meñ hai yād-e-jafā na aa.e phir

tujh ko sitam kā vāsta mujh ko miTā ke bhuul jā

lutf-e-jafa isi mein hai yaad-e-jafa na aae phir

tujh ko sitam ka wasta mujh ko miTa ke bhul ja

ġhazab hai ye ehsās vārastagī kā

ki tujh se bhī ḳhud ko barī chāhtā huuñ

ghazab hai ye ehsas warastagi ka

ki tujh se bhi KHud ko bari chahta hun

tū hai bahār to dāman mirā ho kyuuñ ḳhālī

ise bhī bhar de guloñ se tujhe ḳhudā kī qasam

tu hai bahaar to daman mera ho kyun KHali

ise bhi bhar de gulon se tujhe KHuda ki qasam

ashk-e-ġham uqda-kushā-e-ḳhalish-e-jāñ niklā

jis ko dushvār maiñ samjhā thā vo āsāñ niklā

ashk-e-gham uqda-kusha-e-KHalish-e-jaan nikla

jis ko dushwar main samjha tha wo aasan nikla

dil-e-sarshār mirā chashm-e-siyah-mast tirī

jazba Takrā de na paimāne se paimāne ko

dil-e-sarshaar mera chashm-e-siyah-mast teri

jazba Takra de na paimane se paimane ko