حال پوچھا نہ کرے ہاتھ ملایا نہ کرے

میں اسی دھوپ میں خوش ہوں کوئی سایہ نہ کرے

ہماری زندگی پر موت بھی حیران ہے غائرؔ

نہ جانے کس نے یہ تاریخ پیدائش نکالی ہے

ان ستاروں میں کہیں تم بھی ہو

ان نظاروں میں کہیں میں بھی ہوں

کیا چاہتی ہے ہم سے ہماری یہ زندگی

کیا قرض ہے جو ہم سے ادا ہو نہیں رہا

دھوپ سائے کی طرح پھیل گئی

ان درختوں کی دعا لینے سے

کل رات جگاتی رہی اک خواب کی دوری

اور نیند بچھاتی رہی بستر مرے آگے

موت کا کیا کام جب اس شہر میں

زندگی جیسی بلا موجود ہے

زمیں آباد ہوتی جا رہی ہے

کہاں جائے گی تنہائی ہماری

نیند اڑنے لگی ہے آنکھوں سے

دھول جمنے لگی ہے بستر پر

زندگی دھوپ میں آنے سے کھلی

سایہ دیوار اٹھانے سے کھلا

شور جتنا ہے کائنات میں شور

میرے اندر کی خامشی سے ہوا

یہ ہوا یوں ہی خاک چھانتی ہے

یا کوئی چیز کھو گئی ہے یہاں

نہ ہم وحشت میں اپنے گھر سے نکلے

نہ صحرا اپنی ویرانی سے نکلا

ہماری زندگی پر موت بھی حیران ہے غائرؔ

نہ جانے کس نے یہ تاریخ پیدائش نکالی ہے

مجھ سے رستوں کا بچھڑنا نہیں دیکھا جاتا

مجھ سے ملنے وہ کسی موڑ پہ آیا نہ کرے

نظر ملی تو نظاروں میں بانٹ دی میں نے

یہ روشنی بھی ستاروں میں بانٹ دی میں نے

اک دن دکھ کی شدت کم پڑ جاتی ہے

کیسی بھی ہو وحشت کم پڑ جاتی ہے

ہمارے دل کی طرح شہر کے یہ رستے بھی

ہزار بھید چھپائے ہوئے سے لگتے ہیں

بنے ہیں کام سب الجھن سے میرے

یہی اطوار ہیں بچپن سے میرے

تیرا خیال تیری تمنا تک آ گیا

میں دل کو ڈھونڈھتا ہوا دنیا تک آ گیا

کیا کہیں اور دل کے بارے میں

ہم ملازم ہیں اس ادارے میں

پیڑ ہو یا کہ آدمی غائرؔ

سر بلند اپنی عاجزی سے ہوا

صحرا میں آ نکلے تو معلوم ہوا

تنہائی کو وسعت کم پڑ جاتی ہے

زندگی میں کسک ضروری تھی

یہ خلا پر تری کمی سے ہوا

میرے اندر کا شور ہے مجھ میں

ورنہ باہر تو خامشی ہے یہاں

زمیں ہموار ہو کر رہ گئی ہے

اڑی ہے دھول وہ دامن سے میرے

کچھ دیر بیٹھ جائیے دیوار کے قریب

کیا کہہ رہا ہے سایۂ دیوار جانیے

مجھ سے منسوب ہے غبار مرا

قافلے میں نہ کر شمار مرا

کچھ ایسی بھی دل کی باتیں ہوتی ہیں

جن باتوں کو خلوت کم پڑ جاتی ہے