dekhnā hasrat-e-dīdār ise kahte haiñ

phir gayā muñh tirī jānib dam-e-murdan apnā

dekhna hasrat-e-didar ise kahte hain

phir gaya munh teri jaanib dam-e-murdan apna

hai saaya chāñdnī aur chāñd mukhḌā

dupaTTā āsmān-e-āsmāñ hai

hai saya chandni aur chand mukhDa

dupaTTa aasman-e-asman hai

jis ko aate dekhtā huuñ ai parī kahtā huuñ maiñ

aadmī bhejā na ho mere bulāne ke liye

jis ko aate dekhta hun ai pari kahta hun main

aadmi bheja na ho mere bulane ke liye

aayā hai mire dil kā ġhubār āñsuoñ ke saath

lo ab to huī mālik-e-ḳhushkī-o-tarī aañkh

aaya hai mere dil ka ghubar aansuon ke sath

lo ab to hui malik-e-KHushki-o-tari aankh

sar mirā kaaT ke pachhtā.iyegā

kis kī phir jhūTī qasam khā.iyegā

sar mera kaT ke pachhtaiyega

kis ki phir jhuTi qasam khaiyega

kū-e-jānāñ se jo uThtā huuñ to so jaate haiñ paañv

daf.atan āñkhoñ se paañv meñ utar aatī hai niiñd

ku-e-jaanan se jo uThta hun to so jate hain panw

dafatan aankhon se panw mein utar aati hai nind

jab ḳhafā hotā hai to yuuñ dil ko samjhātā huuñ maiñ

aaj hai nā-mehrbāñ kal mehrbāñ ho jā.egā

jab KHafa hota hai to yun dil ko samjhata hun main

aaj hai na-mehrban kal mehrban ho jaega

isī ḳhātir to qatl-e-āshiqāñ se man.a karte the

akele phir rahe ho yūsuf-e-be-kārvāñ ho kar

isi KHatir to qatl-e-ashiqan se mana karte the

akele phir rahe ho yusuf-e-be-karwan ho kar

yaar tanhā ghar meñ hai afsos lekin ham nahīñ

huur to hai gulshan-e-firdaus meñ aadam nahīñ

yar tanha ghar mein hai afsos lekin hum nahin

hur to hai gulshan-e-firdaus mein aadam nahin

na poñchho mere aañsū tum na poñchho

kahegā koī tum ko ḳhosha-chīñ hai

na ponchho mere aansu tum na ponchho

kahega koi tum ko KHosha-chin hai

zar diyā zor diyā maal diyā ganj diye

ai falak kaun se rāhat ke evaz rañj diye

zar diya zor diya mal diya ganj diye

ai falak kaun se rahat ke ewaz ranj diye

haal pūchho na mire rone kā bas jaane do

abhī rūmāl nichoḌūñgā to tūfāñ hogā

haal puchho na mere rone ka bas jaane do

abhi rumal nichoDunga to tufan hoga

ā.eñge vaqt-e-ḳhizāñ chhoḌ de aa.ī hai bahār

le le sayyād qasam rakh de gulistāñ sar par

aaenge waqt-e-KHizan chhoD de aai hai bahaar

le le sayyaad qasam rakh de gulistan sar par

yuuñ phir rahe haiñ jaise koī baat hī nahīñ

ālūda mere ḳhuun se dāmāñ kiye hue

yun phir rahe hain jaise koi baat hi nahin

aaluda mere KHun se daman kiye hue

ek ko do kar dikhā.e aa.ina

gar banā.eñ āhan-e-shamshīr se

ek ko do kar dikhae aaina

gar banaen aahan-e-shamshir se

chup rah ke guftugū hī se paḌtā hai tafarqe

hote haiñ dono hoñT judā ik sadā ke saath

chup rah ke guftugu hi se paDta hai tafarqe

hote hain dono honT juda ek sada ke sath

but bhī na bhūleñ yaad ḳhudā kī bhī kījiye

paḌhiye namāz kar ke vuzū āb-e-gañg se

but bhi na bhulen yaad KHuda ki bhi kijiye

paDhiye namaz kar ke wuzu aab-e-gang se

hijr meñ ik maah ke aañsū hamāre gir paḌe

āsmāñ TuuTā shab-e-furqat sitāre gir paḌe

hijr mein ek mah ke aansu hamare gir paDe

aasman TuTa shab-e-furqat sitare gir paDe

apne kūche meñ mujhe rone to de ai rashk-e-gul

bāġhbāñ paanī hamesha dete haiñ gulzār ko

apne kuche mein mujhe rone to de ai rashk-e-gul

baghban pani hamesha dete hain gulzar ko

ḳhud-ba-ḳhud apnā janāza hai ravāñ

ham ye kis ke Kushta-e-raftār haiñ

KHud-ba-KHud apna janaza hai rawan

hum ye kis ke Kushta-e-raftar hain

phir vahī ham the vahī tum the mohabbat the vahī

sulh kar lete agar āñkheñ laḌāne ke liye

phir wahi hum the wahi tum the mohabbat the wahi

sulh kar lete agar aankhen laDane ke liye

vasl kī raat hai bigḌo na barābar to rahe

phaT gayā merā garebān tumhārā dāman

wasl ki raat hai bigDo na barabar to rahe

phaT gaya mera gareban tumhaara daman

ġhazab hai ruuh se is jāma-e-tan kā judā honā

libās-e-tañg hai utregā āḳhir dhajjiyāñ ho kar

ghazab hai ruh se is jama-e-tan ka juda hona

libas-e-tang hai utrega aaKHir dhajjiyan ho kar

hai chashm nīm-bāz ajab ḳhvāb-e-nāz hai

fitna to so rahā hai dar-e-fitna baaz hai

hai chashm nim-baz ajab KHwab-e-naz hai

fitna to so raha hai dar-e-fitna baz hai

is ḳhajālat ne abad tak mujhe sone na diyā

hijr meñ lag ga.ī thī ek ghaḌī merī aañkh

is KHajalat ne abad tak mujhe sone na diya

hijr mein lag gai thi ek ghaDi meri aankh

chhān Daalā tamām ka.aba-o-dair

ai hamāre ḳhudā kahāñ tū hai

chhan Dala tamam kaba-o-dair

ai hamare KHuda kahan tu hai

haath dikhlā ke ye bolā vo musalmāñ-zāda

ho gayā dast-e-nigar ab to barahman apnā

hath dikhla ke ye bola wo musalman-zada

ho gaya dast-e-nigar ab to barahman apna

kyā diid ke qābil tire kūche kī zamīñ hai

har gaam hai naqsh-e-qadam-e-rah-guazrī aañkh

kya did ke qabil tere kuche ki zamin hai

har gam hai naqsh-e-qadam-e-rah-guazri aankh

vo na āñkhoñ se ho judā yārab

jab talak merī aañkh band na ho

wo na aankhon se ho juda yarab

jab talak meri aankh band na ho

dekhā jise bismil kyā taakā jise maarā

us aañkh se Dariye jo ḳhudā se na Dare aañkh

dekha jise bismil kya taka jise mara

us aankh se Dariye jo KHuda se na Dare aankh

silsila rakhtā hai merā kufr kuchh islām se

haiñ ka.ī tasbīh ke daane mirī zunnār meñ

silsila rakhta hai mera kufr kuchh islam se

hain kai tasbih ke dane meri zunnar mein

zamīñ bhī niklī jaatī hai mirī paañv ke nīche se

mujhe mushkil huā hai saath denā apne manzil kā

zamin bhi nikli jati hai meri panw ke niche se

mujhe mushkil hua hai sath dena apne manzil ka

saḳhtī-ayyām dauḌe aatī hai patthar liye

kyā mirā naḳhl-e-tamannā bārvar hone lagā

saKHti-ayyam dauDe aati hai patthar liye

kya mera naKHl-e-tamanna barwar hone laga

sar āñkhoñ se kareñ sajda jidhar abrū hilā.e vo

judā kuchh kufr aur islām se maz.hab hamārā hai

sar aankhon se karen sajda jidhar abru hilae wo

juda kuchh kufr aur islam se mazhab hamara hai

huī gar sulh bhī to bhī rahī jañg

milā jab dil to aañkh us se laḌā kī

hui gar sulh bhi to bhi rahi jang

mila jab dil to aankh us se laDa ki

kaheñ adū na kaheñ mujh ko dekh kar muhtāj

ye un ke bande haiñ jin ko karīm kahte haiñ

kahen adu na kahen mujh ko dekh kar muhtaj

ye un ke bande hain jin ko karim kahte hain

dekh pachhtā.egā o but mire tarsāne se

uTh ke ka.abe ko chalā jā.ūñgā but-ḳhāne se

dekh pachhtaega o but mere tarsane se

uTh ke kabe ko chala jaunga but-KHane se

maiñ ne yūsuf jo kahā kyuuñ bigḌe

mol le legā koī bik jā.egā?

main ne yusuf jo kaha kyun bigDe

mol le lega koi bik jaega?

ḳhaak meñ mil jaa.e vo chashma na jis meñ aab ho

phuuT jaa.e aañkh agar mauqūf ronā ho gayā

KHak mein mil jae wo chashma na jis mein aab ho

phuT jae aankh agar mauquf rona ho gaya

be tere mujhe diid kā kuchh shauq nahīñ hai

tū parda-nashīñ hai to nigah gosha-nashīñ hai

be tere mujhe did ka kuchh shauq nahin hai

tu parda-nashin hai to nigah gosha-nashin hai

barsoñ gul-e-ḳhurshīd o gul-e-māh ko dekhā

taaza koī dikhlā.e hameñ charḳh-e-kuhan phuul

barson gul-e-KHurshid o gul-e-mah ko dekha

taza koi dikhlae hamein charKH-e-kuhan phul

pahan lo ai buto zunnār-e-tasbīh-e-sulaimānī

rakho raazī isī parde meñ har shaiḳh-o-barahman ko

pahan lo ai buto zunnar-e-tasbih-e-sulaimani

rakho raazi isi parde mein har shaiKH-o-barahman ko

saaqī ke aane kī ye tamannā hai bazm meñ

dast-e-subū buland hai dast-e-duā ke saath

saqi ke aane ki ye tamanna hai bazm mein

dast-e-subu buland hai dast-e-dua ke sath

mirā kuchh haal kah kar zikr-e-majnūñ karte haiñ āshiq

kitāb-e-āshiqī meñ apnā qissa pesh-ḳhvānī hai

mera kuchh haal kah kar zikr-e-majnun karte hain aashiq

kitab-e-ashiqi mein apna qissa pesh-KHwani hai

sāqiyā hijr meñ kab hai havas-e-guft-o-shunīd

sāġhar-e-gosh se mīnā-e-zabāñ duur rahe

saqiya hijr mein kab hai hawas-e-guft-o-shunid

saghar-e-gosh se mina-e-zaban dur rahe

pahuñchāyā tā-ba-kāba-e-maqsūd faqr ne

tark-e-libās-e-jāma-e-ehrām ho gayā

pahunchaya ta-ba-kaba-e-maqsud faqr ne

tark-e-libas-e-jama-e-ehram ho gaya

us but-e-kāfir kā zāhid ne bhī naam aisā japā

dāna-e-tasbīh har ik rām-dānā ho gayā

us but-e-kafir ka zahid ne bhi nam aisa japa

dana-e-tasbih har ek ram-dana ho gaya

tire kūche kī shāyad raah bhūlī

sabā phirtī hai muztar kū-ba-kū aaj

tere kuche ki shayad rah bhuli

saba phirti hai muztar ku-ba-ku aaj

ai buto dar-parda tum se zāhidoñ ko bhī hai ishq

sūrat-e-tasbīh pinhāñ rakhte haiñ zunnār ko

ai buto dar-parda tum se zahidon ko bhi hai ishq

surat-e-tasbih pinhan rakhte hain zunnar ko

sar jhukā.e rahā sadā gardūñ

kyā kiyā thā jo sharmsār rahā

sar jhukae raha sada gardun

kya kiya tha jo sharmsar raha