mat poñchh abrū-e-araq-ālūd haath se

lāzim hai ehtiyāt ki hai āb-dār teġh

mat ponchh abru-e-araq-alud hath se

lazim hai ehtiyat ki hai aab-dar tegh

dikhā deñge chālākī hāthoñ kī nāseh

jo sābit junūñ se garebāñ rahegā

dikha denge chaalaki hathon ki naseh

jo sabit junun se gareban rahega

lagāyā mohabbat kā jab yaañ shajar

shajar lag gayā aur samar jal gayā

lagaya mohabbat ka jab yan shajar

shajar lag gaya aur samar jal gaya

darvāza go khulā hai ijābat kā par 'hasan'

ham kis kis aarzū ko ḳhudā se talab kareñ

darwaza go khula hai ijabat ka par 'hasan'

hum kis kis aarzu ko KHuda se talab karen

dair-o-ka.aba hī ko jaanā kuchh nahīñ lāzim ġharaz

jis taraf paa.ī ḳhabar us kī udhar ko uTh ga.e

dair-o-kaba hi ko jaana kuchh nahin lazim gharaz

jis taraf pai KHabar us ki udhar ko uTh gae

asar hove na hove par balā se jī to bahlegā

nikālā shaġhl tanhā.ī meñ maiñ nā-chār rone kā

asar howe na howe par bala se ji to bahlega

nikala shaghl tanhai mein main na-chaar rone ka

ḳhvāh ka.aba ho ki but-ḳhāna ġharaz ham se sun

jis taraf dil kī tabī.at ho udhar ko chaliye

KHwah kaba ho ki but-KHana gharaz hum se sun

jis taraf dil ki tabiat ho udhar ko chaliye

kar ke bismil na tū ne phir dekhā

bas isī ġham meñ jaan dī ham ne

kar ke bismil na tu ne phir dekha

bas isi gham mein jaan di hum ne

tū rahā dil meñ dil rahā tujh meñ

tis pe terā milāp ho na sakā

tu raha dil mein dil raha tujh mein

tis pe tera milap ho na saka

mar gayā hotā na hotī qahr meñ shāmil jo mehr

sehhat-e-dil is davā-e-mo'tadil ne kī ġharaz

mar gaya hota na hoti qahr mein shamil jo mehr

sehhat-e-dil is dawa-e-mo'tadil ne ki gharaz

maiñ to is Dar se kuchh nahīñ kahtā

tū mabādā udaas ho jaave

main to is Dar se kuchh nahin kahta

tu mabaada udas ho jawe

mānind-e-aks dekhā use aur na mil sake

kis rū se phir kaheñge ki roz-e-visāl thā

manind-e-aks dekha use aur na mil sake

kis ru se phir kahenge ki roz-e-visal tha

shaiḳh tū nek-o-bad-e-duḳhtar-e-raz kyā jaane

vo bichārī to tire paas na aa.ī na ga.ī

shaiKH tu nek-o-bad-e-duKHtar-e-raz kya jaane

wo bichaari to tere pas na aai na gai

duniyā hai sambhal ke dil lagānā

yaañ log ajab ajab mileñge

duniya hai sambhal ke dil lagana

yan log ajab ajab milenge

jab lage hoñge judā hazrat-e-dil ham ne kahā

phir bhī miliyegā kabhī ham se kahā yā qismat

jab lage honge juda hazrat-e-dil hum ne kaha

phir bhi miliyega kabhi hum se kaha ya qismat

jān-o-dil haiñ udaas se mere

uTh gayā kaun paas se mere

jaan-o-dil hain udas se mere

uTh gaya kaun pas se mere

bandā butoñ kā kis ke kahe se huā ye dil

haq kī taraf se kyā use ilhām kuchh huā

banda buton ka kis ke kahe se hua ye dil

haq ki taraf se kya use ilham kuchh hua

kahtā hai tū ki tujh ko paatā nahīñ kabhī ghar

ye jhuuT sach hai dekhūñ aaj apne ghar rahūñgā

kahta hai tu ki tujh ko pata nahin kabhi ghar

ye jhuT sach hai dekhun aaj apne ghar rahunga

ye dil kuchh aaphī ho jaatā hai band aur aaphī khultā hai

na maiñ qaid is ko kartā huuñ na maiñ āzād kartā huuñ

ye dil kuchh aaphi ho jata hai band aur aaphi khulta hai

na main qaid is ko karta hun na main aazad karta hun

tiir par tiir lage to bhī na paikāñ nikle

yārab is ghar meñ jo aave na vo mehmāñ nikle

tir par tir lage to bhi na paikan nikle

yarab is ghar mein jo aawe na wo mehman nikle

āsāñ na samajhiyo tum naḳhvat se paak honā

ik umr kho ke ham ne sīkhā hai ḳhaak honā

aasan na samajhiyo tum naKHwat se pak hona

ek umr kho ke hum ne sikha hai KHak hona

mohabbat kā rasta ajab garm thā

qadam jab dharā ḳhaak par jal gayā

mohabbat ka rasta ajab garm tha

qadam jab dhara KHak par jal gaya

taaki ibrat kareñ aur ġhair na dekheñ tujh ko

jī meñ aatā hai nikalvā.iye do-chār kī aañkh

taki ibrat karen aur ghair na dekhen tujh ko

ji mein aata hai nikalwaiye do-chaar ki aankh

maiñ bhī ik ma.anī-e-pechīda ajab thā ki 'hasan'

guftugū merī na pahuñchī kabhī taqrīr talak

main bhi ek mani-e-pechida ajab tha ki 'hasan'

guftugu meri na pahunchi kabhi taqrir talak

āshnā bevafā nahīñ hotā

bevafā āshnā nahīñ hotā

aashna bewafa nahin hota

bewafa aashna nahin hota

zulm kab tak kījiyegā is dil-e-nāshād par

ab to is bande pe Tuk kiije karam banda-navāz

zulm kab tak kijiyega is dil-e-nashad par

ab to is bande pe Tuk kije karam banda-nawaz

vo tāb-o-tavāñ kahāñ hai yārab

jo is dil-e-nā-tavāñ meñ tab thā

wo tab-o-tawan kahan hai yarab

jo is dil-e-na-tawan mein tab tha

naujavānī kī diid kar liije

apne mausam kī iid kar liije

naujawani ki did kar lije

apne mausam ki id kar lije

kyuuñ in dinoñ 'hasan' tū itnā jhaTak gayā hai

zālim kahīñ tirā dil kyā phir aTak gayā hai

kyun in dinon 'hasan' tu itna jhaTak gaya hai

zalim kahin tera dil kya phir aTak gaya hai

sadā aish daurāñ dikhātā nahīñ

gayā vaqt phir haath aatā nahīñ

sada aish dauran dikhata nahin

gaya waqt phir hath aata nahin

vasl hotā hai jin ko duniyā meñ

yārab aise bhī log hote haiñ

wasl hota hai jin ko duniya mein

yarab aise bhi log hote hain

maiñ hashr ko kyā ro.uuñ ki uTh jaate hī tere

barpā huī ik mujh pe qayāmat to yahīñ aur

main hashr ko kya roun ki uTh jate hi tere

barpa hui ek mujh pe qayamat to yahin aur

chāhā thā ġharaz maiñ ne ishq aise hī dilbar kā

gar mujh pe bahut guzrā ġham is meñ to kam guzrā

chaha tha gharaz main ne ishq aise hi dilbar ka

gar mujh pe bahut guzra gham is mein to kam guzra

apne kahne meñ to dil mutlaq nahīñ kis se kaheñ

kyā kareñ ai nāseho kuchh to karo irshād tum

apne kahne mein to dil mutlaq nahin kis se kahen

kya karen ai naseho kuchh to karo irshad tum

ġhamze ne le ke dil ko adā ke kiyā supurd

ġhamze se dil ko leñ ki adā se talab kareñ

ghamze ne le ke dil ko ada ke kiya supurd

ghamze se dil ko len ki ada se talab karen

kyā jāniye ki bāham kyuuñ ham meñ aur us meñ

mauqūf ho gayā hai ab vo tapāk honā

kya jaaniye ki baham kyun hum mein aur us mein

mauquf ho gaya hai ab wo tapak hona

vasl meñ bhī na ga.ī chheḌ yahī kahtā rah

ki tujhe aisā bhulā duuñ ki bahut yaad kare

wasl mein bhi na gai chheD yahi kahta rah

ki tujhe aisa bhula dun ki bahut yaad kare

sau sau tarah ke vasl ne marham rakhe vale

zaḳhm-e-firāq haiñ mire vaise hī tar hanūz

sau sau tarah ke wasl ne marham rakhe wale

zaKHm-e-firaq hain mere waise hi tar hanuz

bas ab chaupaḌ uThāo aur kuchh bāteñ kareñ sāhab

jo maiñ jiitā to tum jiite jo tum haare to maiñ haarā

bas ab chaupaD uThao aur kuchh baaten karen sahab

jo main jita to tum jite jo tum haare to main haara

nāḳhun na pahuñchā ābla-e-dil talak 'hasan'

ham mar ga.e ye ham se na āḳhir girah ga.ī

naKHun na pahuncha aabla-e-dil talak 'hasan'

hum mar gae ye hum se na aaKHir girah gai

zaat gar pochhiye aadam kī to hai ek vahī

laakh yuuñ kahne ko Thahrā.iye zāteñ dil meñ

zat gar pochhiye aadam ki to hai ek wahi

lakh yun kahne ko Thahraiye zaten dil mein

sar ko na pheñk apne falak par ġhurūr se

tū ḳhaak se banā hai tirā ghar zamīn hai

sar ko na phenk apne falak par ghurur se

tu KHak se bana hai tera ghar zamin hai

jis tarah chāhā likhīñ dil ne kahā yuuñ mat likh

saikḌoñ baar dharā aur uThāyā kāġhaz

jis tarah chaha likhin dil ne kaha yun mat likh

saikDon bar dhara aur uThaya kaghaz

jhūT-mūT un se maiñ kuchh maslahatan bolūñgā

sach hai tū bol na uThiyo dil-e-āgāh ki jhuuT

jhuT-muT un se main kuchh maslahatan bolunga

sach hai tu bol na uThiyo dil-e-agah ki jhuT

mat baḳht-e-ḳhufta par mire hañs ai raqīb tū

hogā tire nasīb bhī ye ḳhvāb dekhnā

mat baKHt-e-KHufta par mere hans ai raqib tu

hoga tere nasib bhi ye KHwab dekhna

qismat ne duur aisā hī pheñkā hameñ ki ham

phir jīte-jī pahuñch na sake apne yaar tak

qismat ne dur aisa hi phenka hamein ki hum

phir jite-ji pahunch na sake apne yar tak

kyā thā ki aaj naaqa be-sārbān paayā

majnūñ ke haath ham ne us kī mahār dekhī

kya tha ki aaj naqa be-sarban paya

majnun ke hath hum ne us ki mahaar dekhi

go bhale sab haiñ aur maiñ huuñ burā

kyā bhaloñ meñ burā nahīñ hotā

go bhale sab hain aur main hun bura

kya bhalon mein bura nahin hota

kyuuñ giraftārī ke baa.is muztarib sayyād huuñ

lagte lagte jī qafas meñ bhī mirā lag jā.egā

kyun giraftari ke bais muztarib sayyaad hun

lagte lagte ji qafas mein bhi mera lag jaega

dil apnā inhīñ bātoñ se uTh jaatā hai tujh se

jā baiThe hai tū mil ko jo har nā-kas-o-kas meñ

dil apna inhin baaton se uTh jata hai tujh se

ja baiThe hai tu mil ko jo har na-kas-o-kas mein