chāhne vaalo pyaar meñ thoḌī āzādī bhī lāzim hai

dekho merā phuul ziyāda dekh-bhāl se TuuT gayā

chahne walo pyar mein thoDi aazadi bhi lazim hai

dekho mera phul ziyaada dekh-bhaal se TuT gaya

mujhe duniyā ke ta.anoñ par kabhī ġhussa nahīñ aatā

nadī kī tah meñ jā ke saare patthar baiTh jaate haiñ

mujhe duniya ke tanon par kabhi ghussa nahin aata

nadi ki tah mein ja ke sare patthar baiTh jate hain

ḳhaak huuñ uḌtā huuñ sach hai ki maiñ āvāra-mizāj

paanī hotā bhī to sailāb meñ dekhā jaatā

KHak hun uDta hun sach hai ki main aawara-mizaj

pani hota bhi to sailab mein dekha jata

kitnī bhī pyārī ho har ik shai se jī uktā jaatā hai

vaqt ke saath to chamkīle zevar bhī kaale paḌ jaate haiñ

kitni bhi pyari ho har ek shai se ji ukta jata hai

waqt ke sath to chamkile zewar bhi kale paD jate hain

aaj to aise bijlī chamkī bārish aa.ī khiḌkī bhīgī

jaise bādal khīñch rahā ho mere ashkoñ kī tasvīreñ

aaj to aise bijli chamki barish aai khiDki bhigi

jaise baadal khinch raha ho mere ashkon ki taswiren

use manāne meñ ham ne gañvā diyā us ko

ki shīsha TuuT gayā dhuul saaf karte hue

use manane mein hum ne ganwa diya us ko

ki shisha TuT gaya dhul saf karte hue

ek ujāle ne mujhe jaltā huā dekh liyā

varna maiñ ab bhī usī taab meñ dekhā jaatā

ek ujale ne mujhe jalta hua dekh liya

warna main ab bhi usi tab mein dekha jata

ġham kī dahshat-gardī meñ bhī dil ko khole rakkhā ham ne

varna is māhaul meñ shahroñ shahroñ taale paḌ jaate haiñ

gham ki dahshat-gardi mein bhi dil ko khole rakkha hum ne

warna is mahaul mein shahron shahron tale paD jate hain

bas ek pyaar ne sālim rakhā hameñ yaaro

raqīb mar ga.e ham meñ shigāf karte hue

bas ek pyar ne salim rakha hamein yaro

raqib mar gae hum mein shigaf karte hue