chashm-e-ḳhush-āb kī tamsīl meñ rahne vaale

ham parinde haiñ isī jhiil meñ rahne vaale

chashm-e-KHush-ab ki tamsil mein rahne wale

hum parinde hain isi jhil mein rahne wale

is ājizī se kiyā us ne mere sar kā savāl

ḳhud apne haath se talvār toḌ dī maiñ ne

is aajizi se kiya us ne mere sar ka sawal

KHud apne hath se talwar toD di main ne

in dinoñ apnī bhī vahshat kā ajab aalam hai

ghar meñ ham dasht-o-bayābān uThā laa.e haiñ

in dinon apni bhi wahshat ka ajab aalam hai

ghar mein hum dasht-o-bayaban uTha lae hain

havā kī Dor meñ TuuTe hue taare pirotī hai

ye tanhā.ī ajab laḌkī hai sannāTe meñ rotī hai

hawa ki Dor mein TuTe hue tare piroti hai

ye tanhai ajab laDki hai sannaTe mein roti hai

tū mere saath nahīñ hai to sochtā huuñ maiñ

ki ab to tujh se bichhaḌne kā koī Dar bhī nahīñ

tu mere sath nahin hai to sochta hun main

ki ab to tujh se bichhaDne ka koi Dar bhi nahin

burīda-sar ko sajā de fasīl-e-neza par

darīda jism ko phir arsa-e-qitāl meñ rakh

burida-sar ko saja de fasil-e-neza par

darida jism ko phir arsa-e-qital mein rakh

shāḳh-e-mizhgāñ pe mahakne lage zaḳhmoñ ke gulāb

pichhle mausam kī mulāqāt kī bū zinda hai

shaKH-e-mizhgan pe mahakne lage zaKHmon ke gulab

pichhle mausam ki mulaqat ki bu zinda hai

ret par vo paḌī hai mushk koī

tiir bhī aur kamān sā kuchh hai

ret par wo paDi hai mushk koi

tir bhi aur kaman sa kuchh hai

ye kaisā dasht-e-tahayyur hai yaañ se kuuch karo

hamāre paañv se raftār khīñchtā hai koī

ye kaisa dasht-e-tahayyur hai yan se kuch karo

hamare panw se raftar khinchta hai koi

ik na.e tarz pe ābād kareñge us ko

ham tire shahr kī pahchān uThā laa.e haiñ

ek nae tarz pe aabaad karenge us ko

hum tere shahr ki pahchan uTha lae hain

tiir mat dekh mire zaḳhm ko dekh

yār-e-yār apnā adū meñ gum hai

tir mat dekh mere zaKHm ko dekh

yar-e-yar apna adu mein gum hai

kis liye karte ho tum harf-e-malāmat se gurez

ham kahāñ sohbat-e-jibrīl meñ rahne vaale

kis liye karte ho tum harf-e-malamat se gurez

hum kahan sohbat-e-jibril mein rahne wale

jab Duub ke marnā hai to kyā soch rahe ho

in jhiil sī āñkhoñ meñ utar kyuuñ nahīñ jaate

jab Dub ke marna hai to kya soch rahe ho

in jhil si aankhon mein utar kyun nahin jate

jañg kā shor bhī kuchh der to tham saktā hai

phir se ik amn kī afvāh uḌā dī jaa.e

jang ka shor bhi kuchh der to tham sakta hai

phir se ek amn ki afwah uDa di jae

haañ vaz-e-ehtiyāt kā qaa.il nahīñ huuñ meñ

jo zaḳhm hai jigar meñ chhupāne se maiñ rahā

han waz-e-ehtiyat ka qail nahin hun mein

jo zaKHm hai jigar mein chhupane se main raha