جب ڈوب کے مرنا ہے تو کیا سوچ رہے ہو

ان جھیل سی آنکھوں میں اتر کیوں نہیں جاتے

جنگ کا شور بھی کچھ دیر تو تھم سکتا ہے

پھر سے اک امن کی افواہ اڑا دی جائے

یہ کیسا دشت تحیر ہے یاں سے کوچ کرو

ہمارے پاؤں سے رفتار کھینچتا ہے کوئی

تو میرے ساتھ نہیں ہے تو سوچتا ہوں میں

کہ اب تو تجھ سے بچھڑنے کا کوئی ڈر بھی نہیں

شاخ مژگاں پہ مہکنے لگے زخموں کے گلاب

پچھلے موسم کی ملاقات کی بو زندہ ہے

ان دنوں اپنی بھی وحشت کا عجب عالم ہے

گھر میں ہم دشت و بیابان اٹھا لائے ہیں

ہوا کی ڈور میں ٹوٹے ہوئے تارے پروتی ہے

یہ تنہائی عجب لڑکی ہے سناٹے میں روتی ہے

ہاں وضع احتیاط کا قائل نہیں ہوں میں

جو زخم ہے جگر میں چھپانے سے میں رہا

چشم خوش آب کی تمثیل میں رہنے والے

ہم پرندے ہیں اسی جھیل میں رہنے والے

اک نئے طرز پہ آباد کریں گے اس کو

ہم ترے شہر کی پہچان اٹھا لائے ہیں

اس عاجزی سے کیا اس نے میرے سر کا سوال

خود اپنے ہاتھ سے تلوار توڑ دی میں نے

ریت پر وہ پڑی ہے مشک کوئی

تیر بھی اور کمان سا کچھ ہے

بریدہ سر کو سجا دے فصیل نیزہ پر

دریدہ جسم کو پھر عرصۂ قتال میں رکھ

تیر مت دیکھ مرے زخم کو دیکھ

یار یار اپنا عدو میں گم ہے

کس لئے کرتے ہو تم حرف ملامت سے گریز

ہم کہاں صحبت جبریل میں رہنے والے