pheñk de ḳhushk phuul yādoñ ke

zid na kar tū bhī be-vafā ho jā

phenk de KHushk phul yaadon ke

zid na kar tu bhi be-wafa ho ja

jaise vīrān havelī meñ hoñ ḳhāmosh charāġh

ab guzartī haiñ tire shahr meñ shāmeñ aisī

jaise viran haweli mein hon KHamosh charagh

ab guzarti hain tere shahr mein shamen aisi

ab zamāne meñ mohabbat hai tamāshe kī tarah

is tamāshe se bahaltā nahīñ tū bhī maiñ bhī

ab zamane mein mohabbat hai tamashe ki tarah

is tamashe se bahalta nahin tu bhi main bhi

sabz peḌoñ ko pata tak nahīñ chaltā shāyad

zard patte bhare manzar se nikal jaate haiñ

sabz peDon ko pata tak nahin chalta shayad

zard patte bhare manzar se nikal jate hain

kal jahāñ dīvār hī dīvār thī

ab vahāñ dar hai jabīñ hai ishq hai

kal jahan diwar hi diwar thi

ab wahan dar hai jabin hai ishq hai

lafz kī qaid se rihā ho jā

aa mirī aañkh se adā ho jā

lafz ki qaid se riha ho ja

aa meri aankh se ada ho ja

badan meñ ruuh kī tarsīl karne vaale log

badal ga.e mujhe tabdīl karne vaale log

badan mein ruh ki tarsil karne wale log

badal gae mujhe tabdil karne wale log

ruuTh kar aañkh ke andar se nikal jaate haiñ

ashk bachchoñ kī tarah ghar se nikal jaate haiñ

ruTh kar aankh ke andar se nikal jate hain

ashk bachchon ki tarah ghar se nikal jate hain

maiñ tire hijr se niklūñgā to mar jā.ūñgā

haa.e vo log jo mehvar se nikal jaate haiñ

main tere hijr se niklunga to mar jaunga

hae wo log jo mehwar se nikal jate hain

zar kā banda ho ki mahrūmī kā maarā huā shaḳhs

jis ko dekho vahī auqāt se niklā huā hai

zar ka banda ho ki mahrumi ka mara hua shaKHs

jis ko dekho wahi auqat se nikla hua hai

hamārī raah meñ baiThegī kab tak terī duniyā

kabhī to is zuleḳhā kī javānī ḳhatm hogī

hamari rah mein baiThegi kab tak teri duniya

kabhi to is zuleKHa ki jawani KHatm hogi

hijr thā bār-e-amānat kī tarah

so ye ġham āḳhirī hichkī se uThā

hijr tha bar-e-amanat ki tarah

so ye gham aaKHiri hichki se uTha

dāman bachā rahe the ki chehra bhī jal gayā

kis aag se guzar ke tirī raushnī meñ aa.e

daman bacha rahe the ki chehra bhi jal gaya

kis aag se guzar ke teri raushni mein aae

in sulagtī huī sāñsoñ ko nahīñ dekhte log

aur samajhte haiñ ki jaltā nahīñ tū bhī maiñ bhī

in sulagti hui sanson ko nahin dekhte log

aur samajhte hain ki jalta nahin tu bhi main bhi

yahīñ aanā hai bhaTaktī huī āvāzoñ ko

ya.anī kuchh baat to hai koh-e-nidā meñ aisī

yahin aana hai bhaTakti hui aawazon ko

yani kuchh baat to hai koh-e-nida mein aisi

badan meñ dil thā muallaq ḳhalā meñ nazreñ thiiñ

magar kahīñ kahīñ siine meñ dard zinda thā

badan mein dil tha muallaq KHala mein nazren thin

magar kahin kahin sine mein dard zinda tha