ai ham-nafas na pūchh javānī kā mājrā

mauj-e-nasīm thī idhar aa.ī udhar ga.ī

ai ham-nafas na puchh jawani ka majra

mauj-e-nasim thi idhar aai udhar gai

talātum aarzū meñ hai na tūfāñ justujū meñ hai

javānī kā guzar jaanā hai dariyā kā utar jaanā

talatum aarzu mein hai na tufan justuju mein hai

jawani ka guzar jaana hai dariya ka utar jaana

aql ko kyuuñ batā.eñ ishq kā raaz

ġhair ko rāz-dāñ nahīñ karte

aql ko kyun bataen ishq ka raaz

ghair ko raaz-dan nahin karte

burā ho ulfat-e-ḳhūbāñ kā ham-nashīñ ham to

shabāb hī meñ burā apnā haal kar baiThe

bura ho ulfat-e-KHuban ka ham-nashin hum to

shabab hi mein bura apna haal kar baiThe

ye fitrat kā taqāzā thā ki chāhā ḳhūb-rūoñ ko

jo karte aa.e haiñ insāñ na karte ham to kyā karte

ye fitrat ka taqaza tha ki chaha KHub-ruon ko

jo karte aae hain insan na karte hum to kya karte

dām-e-ġham-e-hayāt meñ uljhā ga.ī umiid

ham ye samajh rahe the ki ehsān kar ga.ī

dam-e-gham-e-hayat mein uljha gai umid

hum ye samajh rahe the ki ehsan kar gai

gadā nahīñ haiñ ki dast-e-savāl phailā.eñ

kabhī na aap ne pūchhā ki aarzū kyā hai

gada nahin hain ki dast-e-sawal phailaen

kabhi na aap ne puchha ki aarzu kya hai

uThāne ke qābil haiñ sab naaz tere

magar ham kahāñ naaz uThāne ke qābil

uThane ke qabil hain sab naz tere

magar hum kahan naz uThane ke qabil

saaf aatā hai nazar anjām har āġhāz kā

zindagānī maut kī tamhīd hai mere liye

saf aata hai nazar anjam har aaghaz ka

zindagani maut ki tamhid hai mere liye

hai ye pur-dard dāstāñ 'mahrūm'

kyā sunā.eñ kisī ko haal apnā

hai ye pur-dard dastan 'mahrum'

kya sunaen kisi ko haal apna

ba-zāhir garm hai bāzār-e-ulfat

magar jins-e-vafā kam ho ga.ī hai

ba-zahir garm hai bazar-e-ulfat

magar jins-e-wafa kam ho gai hai

dil meñ kahte haiñ ki ai kaash na aa.e hote

un ke aane se jo bīmār kā haal achchhā hai

dil mein kahte hain ki ai kash na aae hote

un ke aane se jo bimar ka haal achchha hai

yuuñ to barsoñ na pilā.ūñ na piyūñ ai zāhid

tauba karte hī badal jaatī hai nīyat merī

yun to barson na pilaun na piyun ai zahid

tauba karte hi badal jati hai niyat meri

fikr-e-ma.āsh o ishq-e-butāñ yād-e-raftagāñ

in mushkiloñ se ahd-bar.ā.ī na ho sakī

fikr-e-maash o ishq-e-butan yaad-e-raftagan

in mushkilon se ahd-barai na ho saki

huuñ vo barbād ki qismat meñ nasheman na qafas

chal diyā chhoḌ kar sayyād tah-e-dām mujhe

hun wo barbaad ki qismat mein nasheman na qafas

chal diya chhoD kar sayyaad tah-e-dam mujhe

dil ke tālib nazar aate haiñ hasīñ har jānib

us ke lākhoñ haiñ ḳharīdār ki maal achchhā hai

dil ke talib nazar aate hain hasin har jaanib

us ke lakhon hain KHaridar ki mal achchha hai

na rahī be-ḳhudi-e-shauq meñ itnī bhī ḳhabar

hijr achchhā hai ki 'mahrūm' visāl achchhā hai

na rahi be-KHudi-e-shauq mein itni bhi KHabar

hijr achchha hai ki 'mahrum' visal achchha hai

na ilm hai na zabāñ hai to kis liye 'mahrūm'

tum apne aap ko shā.ir ḳhayāl kar baiThe

na ilm hai na zaban hai to kis liye 'mahrum'

tum apne aap ko shair KHayal kar baiThe

bād-e-tark-e-ārzū baiThā huuñ kaisā mutma.in

ho ga.ī āsāñ har ik mushkil ba-āsānī mirī

baad-e-tark-e-arzu baiTha hun kaisa mutmain

ho gai aasan har ek mushkil ba-asani meri

mandir bhī saaf ham ne kiye masjideñ bhī paak

mushkil ye hai ki dil kī safā.ī na ho sakī

mandir bhi saf hum ne kiye masjiden bhi pak

mushkil ye hai ki dil ki safai na ho saki