جب نظارے تھے تو آنکھوں کو نہیں تھی پروا

اب انہی آنکھوں نے چاہا تو نظارے نہیں تھے

ہم اتنی روشنی میں دیکھ بھی سکتے نہیں اس کو

سو اپنے آپ ہی اس چاند کو گہنائے رکھتے ہیں

راستے ہیں کھلے ہوئے سارے

پھر بھی یہ زندگی رکی ہوئی ہے

اٹھا سکتے نہیں جب چوم کر ہی چھوڑنا اچھا

محبت کا یہ پتھر اس دفعہ بھاری زیادہ ہے

تم ہی بتلاؤ کہ اس کی قدر کیا ہوگی تمہیں

جو محبت مفت میں مل جائے آسانی کے ساتھ

چہرے سے جھاڑ پچھلے برس کی کدورتیں

دیوار سے پرانا کلینڈر اتار دے

ایک ناموجودگی رہ جائے گی چاروں طرف

رفتہ رفتہ اس قدر سنسان کر دے گا مجھے

اس کو آنا تھا کہ وہ مجھ کو بلاتا تھا کہیں

رات بھر بارش تھی اس کا رات بھر پیغام تھا

مجھ میں ہیں گہری اداسی کے جراثیم اس قدر

میں تجھے بھی اس مرض میں مبتلا کر جاؤں گا

ایک دن صبح جو اٹھیں تو یہ دنیا ہی نہ ہو

ہے مدار اب کسی ایسی ہی خوش امکانی پر

تجھ کو میری نہ مجھے تیری خبر جائے گی

عید اب کے بھی دبے پاؤں گزر جائے گی

روشنی اب راہ سے بھٹکا بھی دیتی ہے میاں

اس کی آنکھوں کی چمک نے مجھ کو بے گھر کر دیا

سنا ہے وہ مرے بارے میں سوچتا ہے بہت

خبر تو ہے ہی مگر معتبر زیادہ نہیں

ہاتھ پیر آپ ہی میں مار رہا ہوں فی الحال

ڈوبتے کو ابھی تنکے کا سہارا کم ہے

یہ ہم جو پیٹ سے ہی سوچتے ہیں شام و سحر

کبھی تو جائیں گے اس دال بھات سے آگے

وہ بہت چالاک ہے لیکن اگر ہمت کریں

پہلا پہلا جھوٹ ہے اس کو یقیں آ جائے گا

وہ مجھ سے اپنا پتا پوچھنے کو آ نکلے

کہ جن سے میں نے خود اپنا سراغ پایا تھا

میں اندر سے کہیں تبدیل ہونا چاہتا تھا

پرانی کینچلی میں ہی نیا ہونا تھا مجھ کو

یہاں کسی کو بھی کچھ حسب آرزو نہ ملا

کسی کو ہم نہ ملے اور ہم کو تو نہ ملا

اک لہر ہے کہ مجھ میں اچھلنے کو ہے ظفرؔ

اک لفظ ہے کہ مجھ سے ادا ہونے والا ہے

خوشی ملی تو یہ عالم تھا بدحواسی کا

کہ دھیان ہی نہ رہا غم کی بے لباسی کا

یوں بھی ہوتا ہے کہ یک دم کوئی اچھا لگ جائے

بات کچھ بھی نہ ہو اور دل میں تماشا لگ جائے

سال ہا سال سے خاموش تھے گہرے پانی

اب نظر آئے ہیں آواز کے آثار مجھے

ترا چڑھا ہوا دریا سمجھ میں آتا ہے

ترے خموش کنارے نہیں سمجھتا ہوں

بڑھاپے سے اگلی یہ منزل ہے کوئی

جواں ہو گیا ہوں حسیں ہو گیا ہوں

ہم پہ دنیا ہوئی سوار ظفرؔ

اور ہم ہیں سوار دنیا پر

بجھا نہیں مرے اندر کا آفتاب ابھی

جلا کے خاک کرے گا یہی شرارہ مجھے

ایسا ہے جیسے آنکھ کی پتلی کے وسط میں

نقشہ بنا ہوا ہے کسی خواب زار کا

ہوا کے ساتھ جو اک بوسہ بھیجتا ہوں کبھی

تو شعلہ اس بدن پاک سے نکلتا ہے

میں زیادہ ہوں بہت اس کے لیے اب تک بھی

اور میرے لیے وہ سارے کا سارا کم ہے

کہاں تک ہو سکا کار محبت کیا بتائیں

تمہارے سامنے ہے کام جتنا ہو رہا ہے

جو یہاں خود ہی لگا رکھی ہے چاروں جانب

ایک دن ہم نے اسی آگ میں جل جانا ہے

ملا تو منزل جاں میں اتارنے نہ دیا

وہ کھو گیا تو کسی نے پکارنے نہ دیا

صاف و شفاف تھی پانی کی طرح نیت دل

دیکھنے والوں نے دیکھا اسے گدلا کر کے

جدھر سے کھول کے بیٹھے تھے در اندھیرے کا

اسی طرف سے ہمیں روشنی بہت آئی

اب کے اس بزم میں کچھ اپنا پتہ بھی دینا

پاؤں پر پاؤں جو رکھنا تو دبا بھی دینا

میری سورج سے ملاقات بھی ہو سکتی ہے

سوکھنے ڈال دیا جاؤں جو دھویا ہوا میں

کرتا ہوں نیند میں ہی سفر سارے شہر کا

فارغ تو بیٹھتا نہیں سونے کے باوجود

انکساری میں مرا حکم بھی جاری تھا ظفرؔ

عرض کرتے ہوئے ارشاد بھی خود میں نے کیا

بس ایک بار کسی نے گلے لگایا تھا

پھر اس کے بعد نہ میں تھا نہ میرا سایا تھا

سنوگے لفظ میں بھی پھڑپھڑاہٹ

لہو میں بھی پرافشانی رہے گی

اب اس کی دید محبت نہیں ضرورت ہے

کہ اس سے مل کے بچھڑنے کی آرزو ہے بہت

رکھتا ہوں اپنا آپ بہت کھینچ تان کر

چھوٹا ہوں اور خود کو بڑا کرنے آیا ہوں

یہ زندگی کی آخری شب ہی نہ ہو کہیں

جو سو گئے ہیں ان کو جگا لینا چاہیئے

حسن اس کا اسی مقام پہ ہے

یہ مسافر سفر نہیں کرتا

وہ چہرہ ہاتھ میں لے کر کتاب کی صورت

ہر ایک لفظ ہر اک نقش کی ادا دیکھوں

در امید سے ہو کر نکلنے لگتا ہوں

تو یاس روزن زنداں سے آنکھ مارتی ہے

آگے بڑھوں تو زرد گھٹا میرے روبرو

پیچھے مڑوں تو گرد سفر میرے سامنے

چومنے کے لیے تھام رکھوں کوئی دم وہ ہاتھ

اور وہ پانوں رنگ حنا کے لیے چھوڑ دوں

وہ مقامات مقدس وہ ترے گنبد و قوس

اور مرا ایسے نشانات کا زائر ہونا