vo sūrat dekh lī ham ne to phir kuchh bhī na dekhā

abhī varna paḌī thī ek duniyā dekhne ko

wo surat dekh li hum ne to phir kuchh bhi na dekha

abhi warna paDi thi ek duniya dekhne ko

us ko bhī yaad karne kī fursat na thī mujhe

masrūf thā maiñ kuchh bhī na karne ke bāvajūd

us ko bhi yaad karne ki fursat na thi mujhe

masruf tha main kuchh bhi na karne ke bawajud

baat mujh meñ bhī kuchh is tarah kī hogī jo yahāñ

kabhī vāpas hī na hotā thā vasūlā huā maiñ

baat mujh mein bhi kuchh is tarah ki hogi jo yahan

kabhi wapas hi na hota tha wasula hua main

bāzār-e-bosa tez se hai tez-tar 'zafar'

ummīd to nahīñ ki ye mahñgā.ī ḳhatm ho

bazar-e-bosa tez se hai tez-tar 'zafar'

ummid to nahin ki ye mahngai KHatm ho

pariyoñ aisā ruup hai jis kā laḌkoñ aisā naañv

saare dhande chhoḌ-chhāḌ ke chaliye us ke gaañv

pariyon aisa rup hai jis ka laDkon aisa nanw

sare dhande chhoD-chhaD ke chaliye us ke ganw

chalo itnī to āsānī rahegī

mileñge aur pareshānī rahegī

chalo itni to aasani rahegi

milenge aur pareshani rahegi

lagī thī jaan kī baazī bisāt ulaT Daalī

ye khel bhī hameñ yāroñ ne hārne na diyā

lagi thi jaan ki bazi bisat ulaT Dali

ye khel bhi hamein yaron ne haarne na diya

vidā.a kartī hai rozāna zindagī mujh ko

maiñ roz maut ke mañjdhār se nikaltā huuñ

widaa karti hai rozana zindagi mujh ko

main roz maut ke manjdhaar se nikalta hun

ab vahī karne lage dīdār se aage kī baat

jo kabhī kahte the bas dīdār honā chāhiye

ab wahi karne lage didar se aage ki baat

jo kabhi kahte the bas didar hona chahiye

ghar nayā bartan na.e kapḌe na.e

in purāne kāġhazoñ kā kyā kareñ

ghar naya bartan nae kapDe nae

in purane kaghazon ka kya karen

bharī rahe abhī āñkhoñ meñ us ke naam kī niind

vo ḳhvāb hai to yūñhī dekhne se guzregā

bhari rahe abhi aankhon mein us ke nam ki nind

wo KHwab hai to yunhi dekhne se guzrega

rau meñ aa.e to vo ḳhud garmī-e-bāzār hue

ham jinheñ haath lagā kar bhī gunahgār hue

rau mein aae to wo KHud garmi-e-bazar hue

hum jinhen hath laga kar bhi gunahgar hue

apne so.e hue sūraj kī ḳhabar le jā kar

is kamīñ-gāh meñ kirnoñ ko pakaḌtā kyā hai

apne soe hue suraj ki KHabar le ja kar

is kamin-gah mein kirnon ko pakaDta kya hai

rahtā nahīñ huuñ bojh kisī par ziyāda der

kuchh qarz thā agar to adā bhī huā huuñ maiñ

rahta nahin hun bojh kisi par ziyaada der

kuchh qarz tha agar to ada bhi hua hun main

tum apnī mastī meñ aan Takrā.e mujh se yak-dam

idhar se maiñ bhī to be-dhyānī meñ jā rahā thā

tum apni masti mein aan Takrae mujh se yak-dam

idhar se main bhi to be-dhyani mein ja raha tha

jise ab tak talāsh kartā huuñ

gum-shuda ek yaad hai mujh meñ

jise ab tak talash karta hun

gum-shuda ek yaad hai mujh mein

maiñ bikhar jā.ūñgā zanjīr kī kaḌiyoñ kī tarah

aur rah jā.egī is dasht meñ jhankār mirī

main bikhar jaunga zanjir ki kaDiyon ki tarah

aur rah jaegi is dasht mein jhankar meri

thaknā bhī lāzmī thā kuchh kaam karte karte

kuchh aur thak gayā huuñ ārām karte karte

thakna bhi lazmi tha kuchh kaam karte karte

kuchh aur thak gaya hun aaram karte karte

shab-e-visāl tire dil ke saath lag kar bhī

mirī luTī huī duniyā tujhe pukārtī hai

shab-e-visal tere dil ke sath lag kar bhi

meri luTi hui duniya tujhe pukarti hai

kaifiyat hī koī paanī ne badal lī ho kahīñ

ham jise dasht samajhte haiñ vo dariyā hī na ho

kaifiyat hi koi pani ne badal li ho kahin

hum jise dasht samajhte hain wo dariya hi na ho

rok rakhnā thā abhī aur ye āvāz kā ras

bech lenā thā ye saudā zarā mahñgā kar ke

rok rakhna tha abhi aur ye aawaz ka ras

bech lena tha ye sauda zara mahnga kar ke

bāhar galī meñ chalte hue log thak ga.e

tanhā.iyoñ kā shor thā ḳhālī makān meñ

bahar gali mein chalte hue log thak gae

tanhaiyon ka shor tha KHali makan mein

maiñ bhī kuchh der se baiThā huuñ nishāne pe 'zafar'

aur vo kheñchā huā tiir bhī chal jaanā hai

main bhi kuchh der se baiTha hun nishane pe 'zafar'

aur wo khencha hua tir bhi chal jaana hai

ishq udāsī ke paiġhām to laatā rahtā hai din raat

lekin ham ko ḳhush rahne kī aadat bahut ziyāda hai

ishq udasi ke paigham to lata rahta hai din raat

lekin hum ko KHush rahne ki aadat bahut ziyaada hai

kufr se ye jo munavvar mirī peshānī hai

zāhir is se bhī mirā jazba-e-īmānī hai

kufr se ye jo munawwar meri peshani hai

zahir is se bhi mera jazba-e-imani hai

khīñch laa.ī hai yahāñ lazzat-e-āzār mujhe

jahāñ paanī na mile aaj vahāñ maar mujhe

khinch lai hai yahan lazzat-e-azar mujhe

jahan pani na mile aaj wahan mar mujhe

din chaḌhe honā na honā ek sā rah jā.egā

ye bhī kyā kam hai ki ab se raat bhar baaqī huuñ maiñ

din chaDhe hona na hona ek sa rah jaega

ye bhi kya kam hai ki ab se raat bhar baqi hun main

khul ke ro bhī sakūñ aur hañs bhī sakūñ jī bhar ke

abhī itnī bhī farāġhat meñ nahīñ rah saktā

khul ke ro bhi sakun aur hans bhi sakun ji bhar ke

abhi itni bhi faraghat mein nahin rah sakta

bārish kī bahut tez havā meñ kahīñ mujh ko

darpesh thā ik marhala jalne kī tarah kā

barish ki bahut tez hawa mein kahin mujh ko

darpesh tha ek marhala jalne ki tarah ka

is baar milī hai jo natīje meñ burā.ī

kaam aa.ī hai apnī koī achchhā.ī hamāre

is bar mili hai jo natije mein burai

kaam aai hai apni koi achchhai hamare

aañkh ke ek ishāre se kiyā gul us ne

jal rahā thā jo diyā itnī havā hote hue

aankh ke ek ishaare se kiya gul us ne

jal raha tha jo diya itni hawa hote hue

ye shahr zinda hai lekin har ek lafz kī laash

jahāñ kahīñ se uThī shor mere ghar meñ rahā

ye shahr zinda hai lekin har ek lafz ki lash

jahan kahin se uThi shor mere ghar mein raha

maiñ ḳhvāb-e-sabz thā donoñ ke darmiyān 'zafar'

ki āsmāñ thā sunahrā zamīn bhūrī thī

main KHwab-e-sabz tha donon ke darmiyan 'zafar'

ki aasman tha sunahra zamin bhuri thi

jhuuT bolā hai to qaa.em bhī raho us par 'zafar'

aadmī ko sāhab-e-kirdār honā chāhiye

jhuT bola hai to qaem bhi raho us par 'zafar'

aadmi ko sahab-e-kirdar hona chahiye

andar kā zahr-nāk añdherā hī thā bahut

sar par tulī khaḌī hai shab-e-tār kis liye

andar ka zahr-nak andhera hi tha bahut

sar par tuli khaDi hai shab-e-tar kis liye

vaqt zaa.e na karo ham nahīñ aise vaise

ye ishāra to mujhe us ne ka.ī baar diyā

waqt zae na karo hum nahin aise waise

ye ishaara to mujhe us ne kai bar diya

muskurāte hue miltā huuñ kisī se jo 'zafar'

saaf pahchān liyā jāatā huuñ royā huā maiñ

muskuraate hue milta hun kisi se jo 'zafar'

saf pahchan liya jaata hun roya hua main

'zafar' zamīñ-zād the zamīñ se hī kaam rakkhā

jo āsmānī the āsmānoñ meñ rah ga.e haiñ

'zafar' zamin-zad the zamin se hi kaam rakkha

jo aasmani the aasmanon mein rah gae hain

apnī marzī se bhī ham ne kaam kar Daale haiñ kuchh

lafz ko laḌvā diyā hai beshtar ma.anī ke saath

apni marzi se bhi hum ne kaam kar Dale hain kuchh

lafz ko laDwa diya hai beshtar mani ke sath

hamārā ishq ravāñ hai rukāvaToñ meñ 'zafar'

ye ḳhvāb hai kisī dīvār se nahīñ ruktā

hamara ishq rawan hai rukawaTon mein 'zafar'

ye KHwab hai kisi diwar se nahin rukta

yuuñ mohabbat se na de merī mohabbat kā javāb

ye sazā saḳht hai thoḌī sī ri.āyat kar de

yun mohabbat se na de meri mohabbat ka jawab

ye saza saKHt hai thoDi si riayat kar de

maut ke saath huī hai mirī shādī so 'zafar'

umr ke āḳhirī lamhāt meñ dūlhā huā maiñ

maut ke sath hui hai meri shadi so 'zafar'

umr ke aaKHiri lamhat mein dulha hua main

palaT paḌā jo maiñ sar phoḌ kar mohabbat meñ

to rāsta isī dīvār se nikal aayā

palaT paDa jo main sar phoD kar mohabbat mein

to rasta isi diwar se nikal aaya

mirī fazā meñ hai tartīb-e-kā.enāt kuchh aur

ajab nahīñ jo tirā chāñd hai sitāra mujhe

meri faza mein hai tartib-e-kaenat kuchh aur

ajab nahin jo tera chand hai sitara mujhe

kis taaza mārke pe gayā aaj phir 'zafar'

talvār taaq meñ hai na ghoḌā hai thaan par

kis taza marke pe gaya aaj phir 'zafar'

talwar taq mein hai na ghoDa hai than par

ḳhairāt kā mujhe koī lālach nahīñ 'zafar'

maiñ is galī meñ sirf sadā karne aayā huuñ

KHairaat ka mujhe koi lalach nahin 'zafar'

main is gali mein sirf sada karne aaya hun

kahāñ chalī ga.iiñ kar ke ye toḌ-phoḌ 'zafar'

vo bijliyāñ mire a.asāb se guzarte hue

kahan chali gain kar ke ye toD-phoD 'zafar'

wo bijliyan mere aasab se guzarte hue

ḳhudā ko maan ki tujh lab ke chūmne ke sivā

koī ilaaj nahīñ aaj kī udāsī kā

KHuda ko man ki tujh lab ke chumne ke siwa

koi ilaj nahin aaj ki udasi ka

badan kā saarā lahū khiñch ke aa gayā ruḳh par

vo ek bosa hameñ de ke surḳh-rū hai bahut

badan ka sara lahu khinch ke aa gaya ruKH par

wo ek bosa hamein de ke surKH-ru hai bahut

yahīñ tak laa.ī hai ye zindagī bhar kī masāfat

lab-e-dariyā huuñ maiñ aur vo pas-e-dariyā khilā hai

yahin tak lai hai ye zindagi bhar ki masafat

lab-e-dariya hun main aur wo pas-e-dariya khila hai