Search result for ",may" | Category - Nazm, Page

Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for ",May"

Nazm MATCHES FOR ",may"

Nazm

ai nae sal bata tujh mein naya-pan kya hai

january february march me.n pa.Degii sardii
aur april may june me.n ho gii garmii

Faiz Ludhianvi

Nazm

ek sau bis din

ham december me.n shaayad mile the kahii.n..!!
january, february, march, april....
aur ab may aa gayaa.....
ek sau biis din.....
ek sau biis sadiyaa.n.... guzar bhii ga.ii.n
tum bhii jiite rahe,
mai.n bhii jiitii rahii....
KHvaahisho.n kii sulagtii hu.ii ret par
zindagaanii dabe paa.nv chaltii rahii
mai.n jhulastii rahii....
mai.n.... jhulastii.... rahii
KHair,
chho.Do ye sab!
tum bataa.o tumhe.n kyaa hu.aa?
kyuu.n pareshaan ho????

Fariha Naqvi

Nazm

yaum-e-may

aaj may kaa pahlaa din hai aaj kaa din mazduur kaa din hai
zulm-o-sitam ke madd-e-muqaabil hausla-e-jamhuur kaa din hai

Suroor Barabankvi

Nazm

barah mahine

january kaa mahiina jo aa kar gayaa
phir na.e saal kii ibtidaa.ii kar gayaa
february kar rahaa hai judaa sardiyaa.n
ham utaare.nge ab uun kii vardiyaa.n
march hai saal kaa tiisraa maah-e-nau
sab ko kartaa hai talqiin ab KHush raho
maah april me.n imtihaa.n aa.e.nge
raat-din pa.Dh ke ham paas ho jaa.e.nge
lo may aa gayaa band maktab hu.e
garmiyo.n se pareshaan ham sab hu.e
june baarish kii laa.e KHabar dosto
hai falak kii taraf har nazar dosto
hai july ke aane ke ab silsile
khul ga.e saare school maktab khule
saal me.n jab bhii maah-e-august aa chalaa
apnii aazaadiyo.n kaa ba.Dhaa qaafila
jab bhii maah-e-september janaab aa.egaa
ketiyo.n par Gazab kaa shabaab aa.egaa
laa.e KHush-haaliyaa.n dekhnaa october
khet khaliyaan ko ho rahii hai nazar
kitnaa pur-kaif mausam november me.n hai
motiyo.n jaisii shabnam november me.n hai
saal ruKHsat hu.aa lo december chalaa
ho shuruu.a ab na.e saal kaa silsila

Haidar Bayabani

Nazm

yakum may

ye may kii pahlii, din hai banda-e-mazduur kaa
muddato.n ke baa'd dekhaa is ne jalva huur kaa
ye jo rishta-daar thaa ham sab kaa lekin duur kaa
mill ke maalik ne ise rutba diyaa mansuur kaa
jab lagaayaa haq kaa na.ara daar par khii.nchaa gayaa
naKHl-e-san.at is ke KHuu.n kii dhaar par sii.nchaa gayaa

Syed Mohammad Jafri

Nazm

naya calendar

farvarii phuulo.n kii gaa.Dii pe savaar aatii hai
march aataa hai to baaGo.n me.n bahaar aatii hai
ham ne ballaa jo ghumaayaa to ka.ii bhaag liye
ek chauke hii me.n april may bhaag liye
tez garmii ne pasiine me.n nahaayaa ham ko
june july ne do maah sataayaa ham ko
ye KHabar le ke august aur sitambar aa.e
imtihaano.n me.n ba.Dii shaan ke number aa.e
yaad karte hai.n sabaq leTe hu.e bistar me.n
likhne pa.Dhne kaa maza aataa hai october me.n
yaad rah rah ke hame.n das kaa pahaa.Daa aayaa
jab bhii aayaa hai november hame.n jaa.Daa aayaa
garm muffler se jo kaano.n ko chhupaayaa ham ne
taaliyaa.n de ke december ko bhagaayaa ham ne
phir na.e saal kaa matlab hame.n samjhaatii hai
january sabz dupaTTe me.n chalii aatii hai

Shabnam Rumani

Nazm

saDak ban rahi hai

may ke mahiine kaa maanuus manzar
Gariibo.n ke saathii ye ka.nkar ye patthar
vahaa.n shahr se ek hii miil haT kar
sa.Dak ban rahii hai
zamii.n par kudaalo.n ko barsaa rahe hai.n
pasiine pasiine hu.e jaa rahe hai.n
magar is mashaqqat me.n bhii gaa rahe hai.n
sa.Dak ban rahii hai
musiibat hai ko.ii masarrat nahii.n hai
unhe.n sochne kii bhii fursat nahii.n hai
jamadaar ko kuchh shikaayat nahii.n hai
sa.Dak ban rahii hai
javaa.n naujavaa.n aur KHamiida kamar bhii
fasurda jabii.n bhii bahisht-e-nazar bhii
vahii.n shaam-e-Gam bhii jamaal-e-sahar bhii
sa.Dak bin rahii hai
jamadaar saa.e me.n baiThaa hu.aa hai
kisii par use kuchh itaab aa gayaa hai
kisii kii taraf dekh kar ha.ns rahaa hai
sa.Dak ban rahii hai
ye be-baak ulfat par alha.D ishaara
basantii se raamuu to raamuu se raadhaa
jamadaar bhii hai basantii kaa shaidaa
sa.Dak ban rahii hai
jo sar pe hai pag.Dii to haatho.n me.n hunter
chalaa hai jamadaar kis shaan se ghar
basantii bhii jaatii hai nazre.n bachaa kar
sa.Dak ban rahii hai
samajhte hai.n lekin hai.n masruur ab bhii
usii tarah gaate hai.n mazduur ab bhii
bahar-haal vaa.n hasb-e-dastuur ab bhii
sa.Dak ban rahii hai

Salam Machhli shahri

Nazm

garmi ka mausam

may kaa aan pahu.nchaa hai mahiina
bahaa choTii se e.Dii tak pasiinaa
baje baara to suuraj sar pe aayaa
hu.aa pairo.n tale poshiida saayaa
chalii luu aur ta.Daaqe kii pa.Dii dhuup
lapaT hai aag kii goyaa ka.Dii dhuup
zamii.n hai yaa ko.ii jaltaa tavaa hai
ko.ii sho.ala hai yaa pachhu.aa havaa hai
dar-o-diivaar hai.n garmii se tapte
banii-aadam hai.n machhlii se ta.Dapte
parinde u.D ke hai.n paanii pe girte
charinde bhii hai.n ghabraa.e se phirte
darinde chhup ga.e hai.n jhaa.Diyo.n me.n
magar Duube pa.De hai.n khaa.Diyo.n me.n
na puuchho kuchh Gariibo.n ke makaa.n kii
zamii.n kaa farsh hai chhat aasmaa.n kii
na pa.nkhaa hai na TaTTii hai na kamra
zaraa sii jho.npa.Dii mehnat kaa samra
amiiro.n ko mubaarak ho havelii
Gariibo.n kaa bhii hai allaah belii

Ismail Merathi

Nazm

sal mahina aur din

aa.nkh jhapakte ek second
ek minute me.n saaTh second
saaTh minute kaa ik ghanTa
ik din me.n chaubiis ghanTa
saat dino.n kaa ik hafta
ek maah hai tiis din kaa
baarah mahiine kaa ik saal
365 din kaa ik saal
january me.n din hai.n iktiis
february me.n hai.n aTThaa.iis
chaar se san taqsiim jo puuraa
february us me.n untiis din kaa
march iktiis april tiis
may iktiis june me.n tiis
may june me.n garmii ziyaada
is me.n sab ko aa.e pasiina
iktiis july iktiis august
barkhaa rut me.n rahnaa mast
tiis september iktiis december
sardii me.n sab kaa.npe.n thar thar
maazii guzraa ab hai haal
ek sadii me.n hai.n sau saal

Abrar Kiratpuri

Nazm

sitam-gar

tum mujh par vaarid hu.e
ik sitamgar kii tarah
may kii vo shaam thii
mujhe aaj bhii yaad hai
safed rang kii shirt pahne
haath me.n aKHbaar rol kiye
tum pinDaal kii kursii par biraajmaan the
pahlii nazar me.n tum aam se the
jaise tum aashiq ho aur mai.n mahbuub
merii nazar kaa lams tumhe.n KHaasaa KHaas kar gayaa
dekho
kahaanii ne palTaa khaayaa
tum muhib ban ga.e aur mai.n diivaanii kahlaa.ii
mere aate hii tum simaT ga.e
tab se aaj tak vaise hii merii ruuh me.n
ek ko.npal kii tarah simTe baiThe ho
mai.n muntazir huu.n
kab ehsaas kaa naazuk parinda a.ng.Daa.ii le
tum apnii baa.nhe.n phailaa.e
isii pinDaal kii isii kursii par
gahrii KHaamoshii se shor karte hu.e
merii taraf ba.Dho
ki dekhne vaalo.n ko paakiiza mohabbat
raqs kartii dikhaa.ii de
jis me.n na numaa.ish ho na havas
bas ik suruur ho
aur mai.n
mai.n zamiin ke isii be-bas be-his Tuk.De par aa.nkhe.n muu.nde tumhe.n dekhtii rahuu.n
pachhtaave kaa jaal aaj tak mujhe lapeT me.n jak.De hai
mai.n kisii asiir-zaadii kii tarah
apnii qaid ko taqdiir kaa likhaa jaan kar KHush huu.n
mai.n iz.haar-o-iqraar se barii
apnii KHvaahish par hayaa kii chaadar Daale
mohabbat kaa tauq gale me.n laTkaa.e
KHamoshii ko labo.n par sajaa.e
naa-ummiidii ko shikast dete hu.e
guu.ngii bahrii andhii mohabbat par iktifaa kiye hu.e huu.n
ki asiir KHvaahish-o-farmaa.ish kaa haq nahii.n rakhte

Saira Iqbal

Nazm

uphaar-e-raksha-bandhan

prem jagat ke rahne vaalo prem se rishta jo.Do
hirdai hai parbhuu kaa Deraa use kabhii na to.Do
ulTii gangaa bahtii hai bahne do us ko chho.Do
apne jiivan dhaaraa ko tum siidhe ruKH par mo.Do
karam karegaa jo achchhaa achchhaa.ii pe vo maregaa
aur buraa ko.ii jo karegaa vaisaa hii vo bharegaa
pun kyaa hai jo bhii kisii ne us ko to vo milegaa
baaG me.n us ke jiivan ke vo ban kar phuul khulegaa
hinduu muslim sikh iisaa.ii sab hai.n bhaa.ii bhaa.ii
bhaa nahii.n saktii kabhii kisii ko ik-duuje kii judaa.ii
aaj hai rakshaa-bandhan kaa din hai ye kitnaa suhaanaa
bhaa.ii-bahan ke prem kaa ye din sab ko sunaa.e fasaana
shiilaa ne arshad kii le lii jaa ke haath me.n kalaa.ii
phir ye bolii rakshaa-bandhan aaj hii hai mire bhaa.ii
pyaar bharaa ye haath jo rakh do sar par aaj hamaare
har dukh har Gam duur ho jaa.e KHushiyaa.n aa.e dvaare
pyaar hii puujaa pyaar ibaadat pyaar se rishta jo.Do
har dukh har Gam duur ho jaa.e KHushiyaa.n aa.e dvaare
zainab bhii raahul ke haath me.n baa.ndh ke bolii raakhii
dukh-sa.nkaT ke saagar kii nayyaa kaa tuu hai maajhii
pavitra prem kaa jag me.n dekho kaisaa ye uphaar hai
isii pyaar aur prem se bhayyaa sukh-may ye sansaar hai
kabhii kisii bhii bahan pe bhayyaa sankaT aa nahii.n paa.e
phuul na hargiz kabhii kisii kii KHushiyo.n ke murjhaa.e
siitaa giitaa shabnam shaahii.n me.n hai bhed na bhaav
chaaro.n kaa hai ek charitra aur sab kaa ek subhaav
buu.nd lahuu kii ek rago.n me.n tan bhii ek samaan
prem paaTh pa.Dhaayaa sab ne giitaa ho yaa puraan
ho har din rakshaa-bandhan kaa sab prem kii jot jalaa.e.n
prem kii KHushbuu se mahke ghar aa.ngan chaaro.n dishaa.e.n

Mohammad Hazim Hassan

Nazm

phone aa gaya hai

mire cell pe u k se phone aa gayaa hai
ye mujh me.n jo ik cartoon aa gayaa hai
uchhal kar daruu.n se baruu.n aa gayaa hai
ki mahfil me.n jaise beyon aa gayaa hai
na samjho ki mujh par junuun aa gayaa hai
mere cell pe u k se phone aa gayaa hai
magan ho ke baate.n kiye jaa rahaa huu.n
kabhii jaa rahaa huu.n kabhii aa rahaa huu.n
kha.Daa ho ke ab sar jo sahlaa rahaa huu.n
na dekhaa ki aage sutuun aa gayaa hai
mire cell pe u k se phone aa gayaa hai
jo ik se shuruu.a kii to sab se shuruu.a kii
na puuchho ye ab baat kab se shuruu.a kii
iktiis may kii jo shab se shuruu.a kii
to baato.n hii baato.n me.n june aa gayaa hai
mire cell pe you ke se phone aa gayaa hai
ye chillaa.ii.n naanii are kyaa hu.aa hai
ki ik kaan se haath chipkaa hu.aa hai
abhii chup lagii thii abhii hans rahaa hai
abhii josh thaa ab sukuun aa gayaa hai
mire cell pe you ke se phone aa gayaa hai

Ahmad Hatib Siddiqi

Nazm

nainital

aa.o bachcho giit sunaa.e.n
nainital kaa haal bataa.e.n
ek pahaa.Dii desh basaa hai
qudrat ke ra.ngo.n se bharaa hai
uu.nchii uu.nchii hai.n chaTTaane.n
jaise qil.e kii diivaare.n
bal khaa.ii sa.Dko.n ke kinaare
hare bhare pe.Do.n ke nazaare
hadd-e-nazar tak haraa-bharaa hai
ra.ng-bira.nga phuul khilaa hai
KHushbuu se mahkii hai.n fazaa.e.n
bhiinii bhiinii mast havaa.e.n
is dhartii ke rang albele
god me.n jis ke baadal khele
chiinaa piik kii uu.nchii choTii
everest kii hai yaad dilaatii
aaTh hazaar foot uu.nchaa.ii par
khii.nch aayaa jannat kaa manzar
may june me.n KHaasii sardii
jaa.Do.n me.n hai barf barastii
snowfall vo haule haule
jaise nature motii role
niilaa niilaa jhiil kaa paanii
gahre taal kii hai ye nishaanii
lahro.n se Takraatii kashtii
chalii kinaare haTtii bachtii

begum tasniim Abbas

Nazm

may yaum-ul-hisab

mujhe be-rahm hastii ke ziyaa.n-KHaane me.n kyuu.n bhejaa gayaa
kyuu.n halqa-e-zanjiir me.n rakh dii ga.ii.n be-taabiyaa.n merii
har ik manzar mirii nazro.n kaa juuyaa thaa
farozaa.n shaaKH-saaro.n par hujuum-e-ra.ng-o-buu
u.Dtaa hu.aa bar-ravaa.n
siimaab-paa mauje.n
sabaa kaa raqs-e-be-parvaa
shab-e-mahtaab kaa afsuu.n
mah-o-anjum ke raqsaa.n daa.ere
ruu-e-shafaq
taabaa.n ufuq
dariyaa.o.n kii raftaar
shab ke jaagte asraar
sahraa kaa munavvar siina-e-uryaa.n
tilism-e-be-karaa.n ke KHvaab-guu.n saa.e
mirii raato.n me.n misl-e-barq lahraa.e
sitaaro.n kii tajallii me.n thaa harf-e-kun kaa afsaana
ba.Daa faiyyaz thaa fitrat kaa kaashaana
ka.ii sahraa mire gaam-e-tamannaa ke shanaasaa the
vo harf-o-saut kii vaadii
vo zauq-e-sher kaa jaada
vo irfaa.n ke gurezaa.n aastaano.n par jabii.n-saa.ii
vo daanish kii paziiraa.ii
vo ma.anii kii ghanerii chhaa.nv me.n
zehn-e-rasaa kaa kashf vo
asraar ke parde ke piichhe
dil kii mahshar-KHez aavaaze.n
dil kii mahshar-KHez aavaaze.n
vo Gam-haa-e-nihaanii se farozaa.n zauq-e-biinaa.ii

Sajida Zaidi

Nazm

akaD shah

december me.n qulfii kii khole dukaan
may me.n rakhe moTe kap.Do.n ke thaan

Mohammad Osama Sarsari

Nazm

dhund chhaTne lagi

mujh ko ye jaan.ne me.n bhii 'umre.n lagii.n
ki jo raate.n december kii giilii sii maddham sii is chaa.ndnii me.n kaTii.n
vo jo raate.n hamaare milan kii ruto.n me.n hasii.n KHvaab bunte hu.e gahrii aa.nkho.n me.n bas jaagte hii bitaa.ii ga.ii.n
un kii saarii haqiiqat mohabbat nahii.n thii faqat ek dhoka thii bas
dhund rasto.n me.n gaa.Dii ke shiisho.n pe jamtii hu.ii vo haraarat jo saa.nso.n kii thii
bhaap u.Dte hii shiisho.n pe kuchh na rahaa
bas namii rah ga.ii
ha.nste ha.nste fajiira kii sa.Dko.n pe gaa.Dii me.n coffee ke cup se uThii bhaap me.n saare lamhe namii kii nazar ho ga.e
january farvarii march april may
jab may aa gayaa
to fajiira kii sa.Dko.n pe bikhre hu.e munjamid KHvaab paanii hu.e
dhuup niklii to aa.nkho.n se ashko.n kii suurat hasii.n-KHvaab bah kar nikalne lage
vo december kii raato.n me.n dekhe hu.e KHvaab yak-dam sabhii phir pighalne lage
dhund chhaTne lagii to dikhaa.ii diyaa
saamne apne kaa.nTo.n bhare haath khole hu.e
ik bhayaanak sii suurat me.n tanhaa kha.Dii thii mirii zindagii
aur tum jaa chuke the kahii.n
chand qadam kii masaafat thii aur us masaafat me.n 'umro.n kaa thaa faasla
phir tumhaare chale jaane ke baa'd to kitnii tanhaa thii mai.n
is bhayaanak sii suurat me.n tanhaa kha.Dii zindagii ke gale lag ke rotii rahii barso.n rotii rahii
jo bhii manzar pas-e-dhund the
saare dhu.ndlaa ga.e
mai.n vo manzar suhaane unhe.n Dhuu.nDne jab fajiira ga.ii lambe uu.nche pahaa.Do.n se Takraa ke merii sadaa guu.njtii hii rahii
dhund ke mausam palaT aa.e hai.n phir suno
phir december kii rut me.n chalo
un fajiira ke uu.nche pahaa.Do.n kii us oT me.n ko.ii vaa'da karo
aaKHirii saa.ns tak vo nibhaane kaa vaa'da ko.ii
haa.n magar mujh ko ye jaan.ne me.n bhii 'umre.n lagii.n
ki vo vaa'de faqat dhund chhaTne se pahle talak the sabhii
dhund chhaTne lagii to yaqii.n ho gayaa
ab na aa.oge tum haa.n magar mujh ko ye jaan.ne me.n bhii 'umre.n lagii.n
aur kitne december guzarte rahe
bas guzarte rahe

Kanval Malik

Nazm

yakum may

qatl-e-gul qatl-e-sabaa qatl-e-sahar kii taqriib
mun.aqid hotii rahii baarhaa aivaano.n me.n
qila-e-jabr-o-tashaddud me.n
qasr-e-zulmat me.n
KHalvat-e-shab me.n
gaahe-gaahe sar-e-raahe
aur is baar ye taqriib ba.Dii shaan ke saath
mun.aqid ahl-e-havas ke haatho.n
rahguzaaro.n pe hu.ii
bar-sar-e-baazaar hu.ii
kuucha-e-shahr-e-nigaaraa.n me.n hu.ii
dasht-o-sahraa me.n hu.ii
kohsaaro.n me.n hu.ii
naam-e-gul naam-e-sabaa naam-e-sahar vird-e-zabaa.n
har-nafas gaam-ba-gaam
mohtaram hai ravish-e-makr-o-fareb-e-paiham
sheva-e-raahzanii kii KHair
pesha-e-qatl kii azmat kii duhaa.ii diije
dast-e-qaatil ke taqaddus kii qasam khaa.ii ga.ii
saathiyo chalte raho
ham rivaayaat-e-chicago ke amii.n
KHuun-e-fučík ke taqaddus ke amii.n
azmat-e-KHuun-e-lumumba ke amii.n
KHuun-e-naasir ke amii.n
nazr-e-KHuu.n dete rahe hai.n
sar-e-mahfil sar-e-zindaa.n sar-e-maqtal sar-e-daar
nazr-e-KHuu.n dete rahe.nge ham log

Muslim Shameem

Nazm

bhali si ek shakl thi

mai.n ko.ii panting nahii.n
ki ik frame me.n rahuu.n
vahii jo man kaa miit ho
usii ke prem me.n rahuu.n

Ahmad Faraz

Nazm

shikwa

kyuu.n ziyaa.n-kaar banuu.n suud-faraamosh rahuu.n
fikr-e-fardaa na karuu.n mahv-e-Gam-e-dosh rahuu.n
naale bulbul ke sunuu.n aur hama-tan gosh rahuu.n
ham-navaa mai.n bhii ko.ii gul huu.n ki KHaamosh rahuu.n
jur.at-aamoz mirii taab-e-suKHan hai mujh ko
shikva allaah se KHaakam-ba-dahan hai mujh ko
hai bajaa sheva-e-tasliim me.n mash.huur hai.n ham
qissa-e-dard sunaate hai.n ki majbuur hai.n ham
saaz KHaamosh hai.n fariyaad se maamuur hai.n ham
naala aataa hai agar lab pe to ma.azuur hai.n ham
ai KHudaa shikva-e-arbaab-e-vafaa bhii sun le
KHuugar-e-hamd se tho.Daa saa gila bhii sun le
thii to maujuud azal se hii tirii zaat-e-qadiim
phuul thaa zeb-e-chaman par na pareshaa.n thii shamiim
shart insaaf hai ai saahib-e-altaaf-e-amiim
buu-e-gul phailtii kis tarah jo hotii na nasiim
ham ko jam.iiyat-e-KHaatir ye pareshaanii thii
varna ummat tire mahbuub kii diivaanii thii
ham se pahle thaa ajab tere jahaa.n kaa manzar
kahii.n masjuud the patthar kahii.n ma.abuud shajar
KHuugar-e-paikar-e-mahsuus thii insaa.n kii nazar
maantaa phir ko.ii an-dekhe KHudaa ko kyuu.nkar
tujh ko ma.aluum hai letaa thaa ko.ii naam tiraa
quvvat-e-baazu-e-muslim ne kiyaa kaam tiraa
bas rahe the yahii.n saljuuq bhii tuuraanii bhii
ahl-e-chii.n chiin me.n iiraan me.n saasaanii bhii
isii maamuure me.n aabaad the yuunaanii bhii
isii duniyaa me.n yahuudii bhii the nasraanii bhii
par tire naam pe talvaar uThaa.ii kis ne
baat jo big.Dii hu.ii thii vo banaa.ii kis ne
the hamii.n ek tire maarka-aaraa.o.n me.n
KHushkiyo.n me.n kabhii la.Dte kabhii dariyaa.o.n me.n
dii.n azaane.n kabhii europe ke kaliisaa.o.n me.n
kabhii africa ke tapte hu.e sahraa.o.n me.n
shaan aa.nkho.n me.n na jachtii thii jahaa.n-daaro.n kii
kalma pa.Dhte the hamii.n chhaa.nv me.n talvaaro.n kii
ham jo jiite the to jango.n kii musiibat ke liye
aur marte the tire naam kii azmat ke liye
thii na kuchh teGzanii apnii hukuumat ke liye
sar-ba-kaf phirte the kyaa dahr me.n daulat ke liye
qaum apnii jo zar-o-maal-e-jahaa.n par martii
but-faroshii ke evaz but-shikanii kyuu.n kartii
Tal na sakte the agar jang me.n a.D jaate the
paa.nv shero.n ke bhii maidaa.n se ukha.D jaate the
tujh se sarkash hu.aa ko.ii to biga.D jaate the
teG kyaa chiiz hai ham top se la.D jaate the
naqsh-e-tauhiid kaa har dil pe biThaayaa ham ne
zer-e-KHanjar bhii ye paiGaam sunaayaa ham ne
tuu hii kah de ki ukhaa.Daa dar-e-KHaibar kis ne
shahr qaisar kaa jo thaa us ko kiyaa sar kis ne
to.De maKHluuq KHudaa-vando.n ke paikar kis ne
kaaT kar rakh diye kuffaar ke lashkar kis ne
kis ne ThanDaa kiyaa aatish-kada-e-iiraa.n ko
kis ne phir zinda kiyaa tazkira-e-yazdaa.n ko
kaun sii qaum faqat terii talabgaar hu.ii
aur tere liye zahmat-kash-e-paikaar hu.ii
kis kii shamshiir jahaa.ngiir jahaa.n-daar hu.ii
kis kii takbiir se duniyaa tirii bedaar hu.ii
kis kii haibat se sanam sahme hu.e rahte the
mu.nh ke bal gir ke huu-allahu-ahad kahte the
aa gayaa ain la.Daa.ii me.n agar vaqt-e-namaaz
qibla-ruu ho ke zamii.n-bos hu.ii qaum-e-hijaaz
ek hii saf me.n kha.De ho ga.e mahmuud o ayaaz
na ko.ii banda rahaa aur na ko.ii banda-navaaz
banda o saahab o mohtaaj o Ganii ek hu.e
terii sarkaar me.n pahu.nche to sabhii ek hu.e
mahfil-e-kaun-o-makaa.n me.n sahar o shaam phire
mai-e-tauhiid ko le kar sifat-e-jaam phire
koh me.n dasht me.n le kar tiraa paiGaam phire
aur ma.aluum hai tujh ko kabhii naakaam phire
dasht to dasht hai.n dariyaa bhii na chho.De ham ne
bahr-e-zulmaat me.n dau.Daa diye gho.De ham ne
safha-e-dahr se baatil ko miTaayaa ham ne
nau-e-insaa.n ko Gulaamii se chhu.Daayaa ham ne
tere ka.abe ko jabiino.n se basaayaa ham ne
tere qur.aan ko siino.n se lagaayaa ham ne
phir bhii ham se ye gila hai ki vafaadaar nahii.n
ham vafaadaar nahii.n tuu bhii to dildaar nahii.n
ummate.n aur bhii hai.n un me.n gunahgaar bhii hai.n
ijz vaale bhii hai.n mast-e-mai-e-pindaar bhii hai.n
un me.n kaahil bhii hai.n Gaafil bhii hai.n hushyaar bhii hai.n
saik.Do.n hai.n ki tire naam se be-zaar bhii hai.n
rahmate.n hai.n tirii aGyaar ke kaashaano.n par
barq girtii hai to bechaare musalmaano.n par
but sanam-KHaano.n me.n kahte hai.n musalmaan ga.e
hai KHushii un ko ki ka.abe ke nigahbaan ga.e
manzil-e-dahr se uu.nTo.n ke hudii-KHvaan ga.e
apnii baGlo.n me.n dabaa.e hu.e qur.aan ga.e
KHanda-zan kufr hai ehsaas tujhe hai ki nahii.n
apnii tauhiid kaa kuchh paas tujhe hai ki nahii.n
ye shikaayat nahii.n hai.n un ke KHazaane maamuur
nahii.n mahfil me.n jinhe.n baat bhii karne kaa shu.uur
qahr to ye hai ki kaafir ko mile.n huur o qusuur
aur bechaare musalmaa.n ko faqat vaada-e-huur
ab vo altaaf nahii.n ham pe inaayaat nahii.n
baat ye kyaa hai ki pahlii sii mudaaraat nahii.n
kyuu.n musalmaano.n me.n hai daulat-e-duniyaa naayaab
terii qudrat to hai vo jis kii na had hai na hisaab
tuu jo chaahe to uThe siina-e-sahraa se habaab
rah-rav-e-dasht ho sailii-zada-e-mauj-e-saraab
taan-e-aGyaar hai rusvaa.ii hai naadaarii hai
kyaa tire naam pe marne kaa evaz KHvaarii hai
banii aGyaar kii ab chaahne vaalii duniyaa
rah ga.ii apne liye ek KHayaalii duniyaa
ham to ruKHsat hu.e auro.n ne sa.nbhaalii duniyaa
phir na kahnaa hu.ii tauhiid se KHaalii duniyaa
ham to jiite hai.n ki duniyaa me.n tiraa naam rahe
kahii.n mumkin hai ki saaqii na rahe jaam rahe
terii mahfil bhii ga.ii chaahne vaale bhii ga.e
shab kii aahe.n bhii ga.ii.n sub.h ke naale bhii ga.e
dil tujhe de bhii ga.e apnaa sila le bhii ga.e
aa ke baiThe bhii na the aur nikaale bhii ga.e
aa.e ushshaaq ga.e vaada-e-fardaa le kar
ab unhe.n Dhuu.nD charaaG-e-ruKH-e-zebaa le kar
dard-e-lailaa bhii vahii qais kaa pahluu bhii vahii
najd ke dasht o jabal me.n ram-e-aahuu bhii vahii
ishq kaa dil bhii vahii husn kaa jaaduu bhii vahii
ummat-e-ahmad-e-mursil bhii vahii tuu bhii vahii
phir ye aazurdagi-e-Gair sabab kyaa ma.anii
apne shaidaa.o.n pe ye chashm-e-Gazab kyaa ma.anii
tujh ko chho.Daa ki rasuul-e-arabii ko chho.Daa
but-garii pesha kiyaa but-shikanii ko chho.Daa
ishq ko ishq kii aashufta-sarii ko chho.Daa
rasm-e-salmaan o uvais-e-qaranii ko chho.Daa
aag takbiir kii siino.n me.n dabii rakhte hai.n
zindagii misl-e-bilaal-e-habashii rakhte hai.n
ishq kii KHair vo pahlii sii adaa bhii na sahii
jaada-paimaali-e-tasliim-o-razaa bhii na sahii
muztarib dil sifat-e-qibla-numaa bhii na sahii
aur paabandi-e-aa.iin-e-vafaa bhii na sahii
kabhii ham se kabhii Gairo.n se shanaasaa.ii hai
baat kahne kii nahii.n tuu bhii to harjaa.ii hai
sar-e-faaraa.n pe kiyaa diin ko kaamil tuu ne
ik ishaare me.n hazaaro.n ke liye dil tuu ne
aatish-andoz kiyaa ishq kaa haasil tuu ne
phuu.nk dii garmi-e-ruKHsaar se mahfil tuu ne
aaj kyuu.n siine hamaare sharer-aabaad nahii.n
ham vahii soKHta-saamaa.n hai.n tujhe yaad nahii.n
vaadii-e-najd me.n vo shor-e-salaasil na rahaa
qais diivaana-e-nazzaara-e-mahmil na rahaa
hausle vo na rahe ham na rahe dil na rahaa
ghar ye uj.Daa hai ki tuu raunaq-e-mahfil na rahaa
ai KHushaa aa.n roz ki aa.ii o ba-sad naaz aa.ii
be-hijaabaana suu-e-mahfil-e-maa baaz aa.ii
baada-kash Gair hai.n gulshan me.n lab-e-juu baiThe
sunte hai.n jaam-ba-kaf naGma-e-kuu-kuu baiThe
daur ha.ngaama-e-gulzaar se yaksuu baiThe
tere diivaane bhii hai.n muntazir-e-huu baiThe
apne parvaano.n ko phir zauq-e-KHud-afrozii de
barq-e-deriina ko farmaan-e-jigar-sozii de
qaum-e-aavaara inaa.n-taab hai phir suu-e-hijaaz
le u.Daa bulbul-e-be-par ko mazaaq-e-parvaaz
muztarib-e-baaG ke har Gunche me.n hai buu-e-niyaaz
tuu zaraa chhe.D to de tishna-e-mizraab hai saaz
naGme betaab hai.n taaro.n se nikalne ke liye
tuur muztar hai usii aag me.n jalne ke liye
mushkile.n ummat-e-marhuum kii aasaa.n kar de
mor-e-be-maaya ko ham-dosh-e-sulaimaa.n kar de
jins-e-naayaab-e-mohabbat ko phir arzaa.n kar de
hind ke dair-nashiino.n ko musalmaa.n kar de
juu-e-KHuu.n mii chakad az hasrat-e-dairiina-e-maa
mii tapad naala ba-nishtar kada-e-siina-e-maa
buu-e-gul le ga.ii bairuun-e-chaman raaz-e-chaman
kyaa qayaamat hai ki KHud phuul hai.n Gammaaz-e-chaman
ahd-e-gul KHatm hu.aa TuuT gayaa saaz-e-chaman
u.D ga.e Daaliyo.n se zamzama-pardaaz-e-chaman
ek bulbul hai ki mahv-e-tarannum ab tak
us ke siine me.n hai naGmo.n kaa talaatum ab tak
qumriyaa.n shaaKH-e-sanobar se gurezaa.n bhii hu.ii.n
pattiyaa.n phuul kii jha.D jha.D ke pareshaa.n bhii hu.ii.n
vo puraanii raushe.n baaG kii viiraa.n bhii hu.ii.n
Daaliyaa.n pairahan-e-barg se uryaa.n bhii hu.ii.n
qaid-e-mausam se tabii.at rahii aazaad us kii
kaash gulshan me.n samajhtaa ko.ii fariyaad us kii
lutf marne me.n hai baaqii na maza jiine me.n
kuchh maza hai to yahii KHuun-e-jigar piine me.n
kitne betaab hai.n jauhar mire aa.iine me.n
kis qadar jalve ta.Dapte hai.n mire siine me.n
is gulistaa.n me.n magar dekhne vaale hii nahii.n
daaG jo siine me.n rakhte ho.n vo laale hii nahii.n
chaak is bulbul-e-tanhaa kii navaa se dil ho.n
jaagne vaale isii baa.ng-e-daraa se dil ho.n
ya.anii phir zinda na.e ahd-e-vafaa se dil ho.n
phir isii baada-e-dairiina ke pyaase dil ho.n
ajamii KHum hai to kyaa mai to hijaazii hai mirii
naGma hindii hai to kyaa lai to hijaazii hai mirii

Allama Iqbal

Nazm

mujhse pahle

phir bhii maazii kaa KHayaal aataa hai gaahe-gaahe
muddate.n dard kii lau kam to nahii.n kar saktii.n
zaKHm bhar jaa.e.n magar daaG to rah jaataa hai
duuriyo.n se kabhii yaade.n to nahii.n mar saktii.n

Ahmad Faraz

Load More

Search

ENG

Notification

Rekhta Foundation

Devoted to the preservation & promotion of Urdu

Rekhta Dictionary

A Trilingual Treasure of Urdu Words

Sufinama

Online Treasure of Sufi and Sant Poetry

Hindwi

World of Hindi language and literature

Rekhta Learning

The best way to learn Urdu online

Rekhta Books

Best of Urdu & Hindi Books

Donate

Speak Now