Sher on Abr

aa.e kuchh abr kuchh sharāb aa.e

is ke ba.ad aa.e jo azaab aa.e

aae kuchh abr kuchh sharab aae

is ke baad aae jo azab aae

gungunātī huī aatī haiñ falak se būñdeñ

koī badlī tirī pāzeb se Takrā.ī hai

gungunati hui aati hain falak se bunden

koi badli teri pazeb se Takrai hai

ye ek abr kā TukḌā kahāñ kahāñ barse

tamām dasht hī pyāsā dikhā.ī detā hai

ye ek abr ka TukDa kahan kahan barse

tamam dasht hi pyasa dikhai deta hai

abr barse to ināyat us kī

shāḳh to sirf duā kartī hai

abr barse to inayat us ki

shaKH to sirf dua karti hai

go barastī nahīñ sadā āñkheñ

abr to baara maas hotā hai

go barasti nahin sada aankhen

abr to bara mas hota hai

falak par uḌte jaate bādaloñ ko dekhtā huuñ maiñ

havā kahtī hai mujh se ye tamāshā kaisā lagtā hai

falak par uDte jate baadalon ko dekhta hun main

hawa kahti hai mujh se ye tamasha kaisa lagta hai

sabza o gul kahāñ se aa.e haiñ

abr kyā chiiz hai havā kyā hai

sabza o gul kahan se aae hain

abr kya chiz hai hawa kya hai

barsāt kā mazā tire gesū dikhā ga.e

aks āsmān par jo paḌā abr chhā ga.e

barsat ka maza tere gesu dikha gae

aks aasman par jo paDa abr chha gae

ham ne barsāt ke mausam meñ jo chāhī tauba

abr is zor se garjā ki ilāhī tauba

hum ne barsat ke mausam mein jo chahi tauba

abr is zor se garja ki ilahi tauba

yā abr-e-karam ban ke baras ḳhushk zamīñ par

yā pyaas ke sahrā meñ mujhe jiinā sikhā de

ya abr-e-karam ban ke baras KHushk zamin par

ya pyas ke sahra mein mujhe jina sikha de

uTThā jo abr dil kī umañgeñ chamak uThīñ

lahrā.īñ bijliyāñ to maiñ lahrā ke pī gayā

uTTha jo abr dil ki umangen chamak uThin

lahrain bijliyan to main lahra ke pi gaya

abr kī tīrgī meñ ham ko to

sūjhtā kuchh nahīñ sivā.e sharāb

abr ki tirgi mein hum ko to

sujhta kuchh nahin siwae sharab

duā.eñ māñgī haiñ saaqī ne khol kar zulfeñ

basān-e-dast-e-karam abr-e-dajla-bār baras

duaen mangi hain saqi ne khol kar zulfen

basan-e-dast-e-karam abr-e-dajla-bar baras