bosa-e-ruḳhsār par takrār rahne dījiye

lījiye yā dījiye inkār rahne dījiye

bosa-e-ruKHsar par takrar rahne dijiye

lijiye ya dijiye inkar rahne dijiye

baiTh jaatā huuñ jahāñ chhāñv ghanī hotī hai

haa.e kyā chiiz ġharīb-ul-vatanī hotī hai

baiTh jata hun jahan chhanw ghani hoti hai

hae kya chiz gharib-ul-watani hoti hai

tandurustī se to behtar thī mirī bīmārī

vo kabhī pūchh to lete the ki haal achchhā hai

tandurusti se to behtar thi meri bimari

wo kabhi puchh to lete the ki haal achchha hai

hasīnoñ se faqat sāhib-salāmat duur kī achchhī

na un kī dostī achchhī na un kī dushmanī achchhī

hasinon se faqat sahib-salamat dur ki achchhi

na un ki dosti achchhi na un ki dushmani achchhi

aadmī kā aadmī har haal meñ hamdard ho

ik tavajjoh chāhiye insāñ ko insāñ kī taraf

aadmi ka aadmi har haal mein hamdard ho

ek tawajjoh chahiye insan ko insan ki taraf

mirī sharāb kī tauba pe jā na ai vaa.iz

nashe kī baat nahīñ e'tibār ke qābil

meri sharab ki tauba pe ja na ai waiz

nashe ki baat nahin e'tibar ke qabil

burā hī kyā hai baratnā purānī rasmoñ kā

kabhī sharāb kā piinā bhī kyā halāl na thā

bura hi kya hai baratna purani rasmon ka

kabhi sharab ka pina bhi kya halal na tha

gayā jo haath se vo vaqt phir nahīñ aatā

kahāñ umiid ki phir din phireñ hamāre ab

gaya jo hath se wo waqt phir nahin aata

kahan umid ki phir din phiren hamare ab

yaad aa.iiñ us ko dekh ke apnī musībateñ

ro.e ham aaj ḳhuub lipaT kar raqīb se

yaad aain us ko dekh ke apni musibaten

roe hum aaj KHub lipaT kar raqib se

aḳhīr vaqt hai kis muñh se jā.ūñ masjid ko

tamām umr to guzrī sharāb-ḳhāne meñ

aKHir waqt hai kis munh se jaun masjid ko

tamam umr to guzri sharab-KHane mein

āshiq kī be-kasī kā to aalam na pūchhiye

majnūñ pe kyā guzar ga.ī sahrā gavāh hai

aashiq ki be-kasi ka to aalam na puchhiye

majnun pe kya guzar gai sahra gawah hai

sach hai is ek parde meñ chhupte haiñ laakh aib

ya.anī janāb-e-shaiḳh kī dāḌhī darāz hai

sach hai is ek parde mein chhupte hain lakh aib

yani janab-e-shaiKH ki daDhi daraaz hai

zāhid ko raT lagī hai sharāb-e-tuhūr kī

aayā hai mai-kade meñ to sūjhī hai duur kī

zahid ko raT lagi hai sharab-e-tuhur ki

aaya hai mai-kade mein to sujhi hai dur ki

kāfir-e-ishq ko kyā dair-o-haram se matlab

jis taraf tū hai udhar hī hameñ sajda karnā

kafir-e-ishq ko kya dair-o-haram se matlab

jis taraf tu hai udhar hi hamein sajda karna

shab-e-visāl lagāyā jo un ko siine se

to hañs ke bole alag baiThiye qarīne se

shab-e-visal lagaya jo un ko sine se

to hans ke bole alag baiThiye qarine se

un kī yaktā.ī kā da.avā miT gayā

aa.ine ne dūsrā paidā kiyā

un ki yaktai ka dawa miT gaya

aaine ne dusra paida kiya

jab milā koī hasīñ jaan par aafat aa.ī

sau jagah ahd-e-javānī meñ tabī.at aa.ī

jab mila koi hasin jaan par aafat aai

sau jagah ahd-e-jawani mein tabiat aai

pī lo do ghūñT ki saaqī kī rahe baat 'hafīz'

saaf inkār se ḳhātir-shikanī hotī hai

pi lo do ghunT ki saqi ki rahe baat 'hafiz'

saf inkar se KHatir-shikani hoti hai

parī thī koī chhalāvā thī yā javānī thī

kahāñ ye ho ga.ī champat jhalak dikhā ke mujhe

pari thi koi chhalawa thi ya jawani thi

kahan ye ho gai champat jhalak dikha ke mujhe

the chor mai-kade ke masjid ke rahne vaale

mai se bharā huā hai jo zarf hai vazū kā

the chor mai-kade ke masjid ke rahne wale

mai se bhara hua hai jo zarf hai wazu ka