log achchhe haiñ bahut dil meñ utar jaate haiñ

ik burā.ī hai to bas ye hai ki mar jaate haiñ

log achchhe hain bahut dil mein utar jate hain

ek burai hai to bas ye hai ki mar jate hain

maiñ ne kitne raste badle lekin har raste meñ 'faroġh'

ek añdherā saath rahā hai raushniyoñ ke hujūm liye

main ne kitne raste badle lekin har raste mein 'farogh'

ek andhera sath raha hai raushniyon ke hujum liye

merā bhī ek baap thā achchhā sā ek baap

vo jis jagah pahuñch ke marā thā vahīñ huuñ maiñ

mera bhi ek bap tha achchha sa ek bap

wo jis jagah pahunch ke mara tha wahin hun main

husn ko husn banāne meñ mirā haath bhī hai

aap mujh ko nazar-andāz nahīñ kar sakte

husn ko husn banane mein mera hath bhi hai

aap mujh ko nazar-andaz nahin kar sakte

apne hālāt se maiñ sulh to kar luuñ lekin

mujh meñ rū-posh jo ik shaḳhs hai mar jā.egā

apne haalat se main sulh to kar lun lekin

mujh mein ru-posh jo ek shaKHs hai mar jaega

fasl tumhārī achchhī hogī jaao hamāre kahne se

apne gaañv kī har gorī ko na.ī chunariyā lā denā

fasl tumhaari achchhi hogi jao hamare kahne se

apne ganw ki har gori ko nai chunariya la dena

ishq vo kār-e-musalsal hai ki ham apne liye

ek lamha bhī pas-andāz nahīñ kar sakte

ishq wo kar-e-musalsal hai ki hum apne liye

ek lamha bhi pas-andaz nahin kar sakte

aa.egā mere ba.ad 'faroġh' in kā zamāna

jis daur kā maiñ huuñ mire ash.ār nahīñ haiñ

aaega mere baad 'farogh' in ka zamana

jis daur ka main hun mere ashaar nahin hain

rū-e-zamīñ pe chaar arab mere aks haiñ

in meñ se maiñ bhī ek huuñ chāhe kahīñ huuñ maiñ

ru-e-zamin pe chaar arab mere aks hain

in mein se main bhi ek hun chahe kahin hun main

din ke shor meñ shāmil shāyad koī tumhārī baat bhī ho

āvāzoñ ke uljhe dhāge suljhā.eñge shaam ko

din ke shor mein shamil shayad koi tumhaari baat bhi ho

aawazon ke uljhe dhage suljhaenge sham ko

lākhoñ hī baar bujh ke jalā dard kā diyā

so ek baar aur bujhā phir jalā nahīñ

lakhon hi bar bujh ke jala dard ka diya

so ek bar aur bujha phir jala nahin

dhuup musāfir chhāñv musāfir aa.e koī koī jaa.e

ghar meñ baiThā soch rahā huuñ āñgan hai yā rasta hai

dhup musafir chhanw musafir aae koi koi jae

ghar mein baiTha soch raha hun aangan hai ya rasta hai

ab kī rut meñ jab dhartī ko barkhā kī mahkār mile

mere badan kī miTTī ko bhī rañgoñ meñ nahlā denā

ab ki rut mein jab dharti ko barkha ki mahkar mile

mere badan ki miTTi ko bhi rangon mein nahla dena

log nāzuk the aur ehsās ke vīrāne tak

vo guzarte hue āñkhoñ kī jalan se aa.e

log nazuk the aur ehsas ke virane tak

wo guzarte hue aankhon ki jalan se aae

ghar meñ to ab kyā rakkhā hai vaise aao talāsh kareñ

shāyad koī ḳhvāb paḌā ho idhar udhar kisī kone meñ

ghar mein to ab kya rakkha hai waise aao talash karen

shayad koi KHwab paDa ho idhar udhar kisi kone mein

kuchh itne paas se ho kar vo raushnī guzrī

ki aaj tak dar-o-dīvār ko malāl sā hai

kuchh itne pas se ho kar wo raushni guzri

ki aaj tak dar-o-diwar ko malal sa hai

ik yahī duniyā badaltī hai 'faroġh'

kaisī kaisī ajnabī duniyāoñ meñ

ek yahi duniya badalti hai 'farogh'

kaisi kaisi ajnabi duniyaon mein

tez havā ke saath chalā hai zard musāfir mausam kā

os ne dāman thaam liyā to pal-do-pal ko rukā bhī hai

tez hawa ke sath chala hai zard musafir mausam ka

os ne daman tham liya to pal-do-pal ko ruka bhi hai

bastiyoñ meñ ham bhī rahte haiñ magar

jaise āvāra havā sahrāoñ meñ

bastiyon mein hum bhi rahte hain magar

jaise aawara hawa sahraon mein

ham koī achchhe chor nahīñ par ek daf.a to ham ne bhī

saarā gahna luuT liyā thā aadhī raat ke mehmāñ kā

hum koi achchhe chor nahin par ek dafa to hum ne bhi

sara gahna luT liya tha aadhi raat ke mehman ka