کچھ ایسی بھی دل کی باتیں ہوتی ہیں

جن باتوں کو خلوت کم پڑ جاتی ہے

کچھ دیر بیٹھ جائیے دیوار کے قریب

کیا کہہ رہا ہے سایۂ دیوار جانیے

کیا کہیں اور دل کے بارے میں

ہم ملازم ہیں اس ادارے میں

نیند اڑنے لگی ہے آنکھوں سے

دھول جمنے لگی ہے بستر پر

پیڑ ہو یا کہ آدمی غائرؔ

سر بلند اپنی عاجزی سے ہوا

نہ ہم وحشت میں اپنے گھر سے نکلے

نہ صحرا اپنی ویرانی سے نکلا

میرے اندر کا شور ہے مجھ میں

ورنہ باہر تو خامشی ہے یہاں

مجھ سے رستوں کا بچھڑنا نہیں دیکھا جاتا

مجھ سے ملنے وہ کسی موڑ پہ آیا نہ کرے

موت کا کیا کام جب اس شہر میں

زندگی جیسی بلا موجود ہے

زندگی میں کسک ضروری تھی

یہ خلا پر تری کمی سے ہوا

زمیں آباد ہوتی جا رہی ہے

کہاں جائے گی تنہائی ہماری

زندگی دھوپ میں آنے سے کھلی

سایہ دیوار اٹھانے سے کھلا

شور جتنا ہے کائنات میں شور

میرے اندر کی خامشی سے ہوا

بنے ہیں کام سب الجھن سے میرے

یہی اطوار ہیں بچپن سے میرے

کل رات جگاتی رہی اک خواب کی دوری

اور نیند بچھاتی رہی بستر مرے آگے

کیا چاہتی ہے ہم سے ہماری یہ زندگی

کیا قرض ہے جو ہم سے ادا ہو نہیں رہا

تیرا خیال تیری تمنا تک آ گیا

میں دل کو ڈھونڈھتا ہوا دنیا تک آ گیا

مجھ سے منسوب ہے غبار مرا

قافلے میں نہ کر شمار مرا

ہمارے دل کی طرح شہر کے یہ رستے بھی

ہزار بھید چھپائے ہوئے سے لگتے ہیں

ہماری زندگی پر موت بھی حیران ہے غائرؔ

نہ جانے کس نے یہ تاریخ پیدائش نکالی ہے

ان ستاروں میں کہیں تم بھی ہو

ان نظاروں میں کہیں میں بھی ہوں

یہ ہوا یوں ہی خاک چھانتی ہے

یا کوئی چیز کھو گئی ہے یہاں

زمیں ہموار ہو کر رہ گئی ہے

اڑی ہے دھول وہ دامن سے میرے

نظر ملی تو نظاروں میں بانٹ دی میں نے

یہ روشنی بھی ستاروں میں بانٹ دی میں نے

اک دن دکھ کی شدت کم پڑ جاتی ہے

کیسی بھی ہو وحشت کم پڑ جاتی ہے

صحرا میں آ نکلے تو معلوم ہوا

تنہائی کو وسعت کم پڑ جاتی ہے

دھوپ سائے کی طرح پھیل گئی

ان درختوں کی دعا لینے سے

ہماری زندگی پر موت بھی حیران ہے غائرؔ

نہ جانے کس نے یہ تاریخ پیدائش نکالی ہے

حال پوچھا نہ کرے ہاتھ ملایا نہ کرے

میں اسی دھوپ میں خوش ہوں کوئی سایہ نہ کرے