ریاضؔ آنے میں ہے ان کے ابھی دیر

چلو ہو آئیں مرگ ناگہاں تک

کیا مزا دیتی ہے بجلی کی چمک مجھ کو ریاضؔ

مجھ سے لپٹے ہیں مرے نام سے ڈرنے والے

جس دن سے حرام ہو گئی ہے

مے خلد مقام ہو گئی ہے

مر گیا ہوں پہ تعلق ہے یہ مے خانے سے

میرے حصے کی چھلک جاتی ہے پیمانے سے

شوخی سے ہر شگوفے کے ٹکڑے اڑا دیئے

جس غنچہ پر نگاہ پڑی دل بنا دیا

میری سج دھج تو کوئی عشق بتاں میں دیکھے

ساتھ قشقہ کے ہے زنار برہمن کیسا

ظرف وضو ہے جام ہے اک خم ہے اک سبو

اک بوریا ہے میں ہوں مری خانقاہ ہے

چھپتا نہیں چھپانے سے عالم ابھار کا

آنچل کی تہہ سے دیکھ نمودار کیا ہوا

ہم جانتے ہیں لطف تقاضائے مے فروش

وہ نقد میں کہاں جو مزا ہے ادھار میں

رنگ لائے گا دیدۂ پر آب

دیکھنا دیدۂ پر آب کا رنگ

یہ کمبخت اک جہان آرزو ہے

نہ ہو کوئی ہمارا دل ہو ہم ہوں

زیر مسجد مے کدہ میں میکدے میں مست خواب

چونک اٹھا جب دی موذن نے اذاں بالائے سر

وہ جوبن بہت سر اٹھائے ہوئے ہیں

بہت تنگ بند قبا ہے کسی کا

اب مجرمان عشق سے باقی ہوں ایک میں

اے موت رہنے دے مجھے عبرت کے واسطے

ڈراتا ہے ہمیں محشر سے تو واعظ ارے جا بھی

یہ ہنگامے تو ہم نے روز کوئے یار میں دیکھے

نجد میں کیا قیس کا ہے عرس آج

ننگے ننگے جمع ہیں حمام میں

قلقل مینا صدا ناقوس کی شور اذاں

ٹھنڈے ٹھنڈے دیدنی ہے گرمیٔ بازار صبح

کہاں یہ بات حاصل ہے تری مسجد کو اے زاہد

سحر ہوتے جو ہم نے دیکھے ہیں جھرمٹ شوالے میں

کلی چمن میں کھلی تو مجھے خیال آیا

کسی کے بند قبا کی گرہ کھلی ہوگی

نشانہ بنے دل رہے تیر دل میں

نشانی نہیں اس نشانی سے اچھی

کوئی زمانہ میں روتا ہے کوئی ہنستا ہے

یہاں کسی سے کسی کی صدا نہیں ملتی

لب میگوں کا تقاضا ہے کہ جینا ہوگا

آنکھ کہتی ہے تجھے زہر بھی پینا ہوگا

میرے گھر میں غیر کے ڈر سے کبھی چھپ جائیے

غیر کے گھر میں چھپے تھے آج کس کی ڈر سے آپ

غلط ہے آپ نہ تھے ہم کلام خلوت میں

عدو سے آپ کی تصویر بولتی ہوگی

تھا بہت ان کو گلوری کا اٹھانا مشکل

دست نازک سے دیا پان بڑی مشکل سے

پیری میں ریاضؔ اب بھی جوانی کے مزے ہیں

یہ ریش سفید اور مئے ہوش ربا سرخ

ایک واعظ ہے کہ جس کی دعوتوں کی دھوم ہے

ایک ہم ہیں جس کے گھر کل مے ادھار آنے کو تھی

خدا کے ہاتھ ہے بکنا نہ بکنا مے کا اے ساقی

برابر مسجد جامع کے ہم نے اب دکاں رکھ دی

خدا آباد رکھے میکدے کو

بہت سستے چھٹے دنیا و دیں سے

ریاضؔ توبہ نہ ٹوٹے نہ مے کدہ چھوٹے

زباں کا پاس رہے وضع کا نباہ رہے

سنا ہے ریاضؔ اپنی داڑھی بڑھا کر

بڑھاپے میں اللہ والے ہوئے ہیں

یہ مے کدہ ہے کہ مسجد یہ آب ہے کہ شراب

کوئی بھی ظرف برائے وضو نہیں باقی

بہار آتے ہی پھولوں نے چھاؤنی چھائی

کہ ڈھونڈھتا ہوں مجھے آشیاں نہیں ملتا

کہتی ہے اے ریاضؔ درازی یہ ریش کی

ٹٹی کی آڑ میں ہے مزا کچھ شکار کا

ذرا جو ہم نے انہیں آج مہرباں دیکھا

نہ ہم سے پوچھیے کیا رنگ آسماں دیکھا

اہل حرم سے کہہ دو کہ بگڑی نہیں ہے بات

سب رند جانتے ہیں ابھی پارسا مجھے

قدر مجھ رند کی تجھ کو نہیں اے پیر مغاں

توبہ کر لوں تو کبھی مے کدہ آباد نہ ہو

نہ آیا ہمیں عشق کرنا نہ آیا

مرے عمر بھر اور مرنا نہ آیا

کیوں نہ ٹوٹے مری توبہ جو کہے تو ساقی

پی لے پی لے ارے گھنگھور گھٹا چھائی ہے

اتنی پی ہے کہ بعد توبہ بھی

بے پیے بے خودی سی رہتی ہے

بھر بھر کے جام بزم میں چھلکائے جاتے ہیں

ہم ان میں ہیں جو دور سے ترسائے جاتے ہیں

خواب میں بھی تو نظر بھر کے نہ دیکھا ان کو

یہ بھی آداب محبت کو گوارا نہ ہوا

گھر میں دس ہوں تو یہ رونق نہیں ہوگی گھر میں

ایک دیوانے سے آباد ہے صحرا کیسا

یہ سر بہ مہر بوتلیں ہیں جو شراب کی

راتیں ہیں ان میں بند ہماری شباب کی

پی کے اے واعظ ندامت ہے مجھے

پانی پانی ہوں تری تقریر سے

کہہ کے میں دل کی کہانی کس قدر کھویا گیا

ہیں فسانوں پر فسانے میرے افسانے کے بعد

غرور بھی جو کروں میں تو عاجزی ہو جائے

خودی میں لطف وہ آئے کہ بے خودی ہو جائے

ایسی ہی انتظار میں لذت اگر نہ ہو

تو دو گھڑی فراق میں اپنی بسر نہ ہو

آگے کچھ بڑھ کر ملے گی مسجد جامع ریاضؔ

اک ذرا مڑ جائیے گا میکدے کے در سے آپ

ڈر ہے نہ دوپٹہ کہیں سینے سے سرک جائے

پنکھا بھی ہمیں پاس سے جھلنے نہیں دیتے