رات تھی جب تمہارا شہر آیا

پھر بھی کھڑکی تو میں نے کھول ہی لی

گھر میں خود کو قید تو میں نے آج کیا ہے

تب بھی تنہا تھا جب محفل محفل تھا میں

وہ بات سوچ کے میں جس کو مدتوں جیتا

بچھڑتے وقت بتانے کی کیا ضرورت تھی

اب مجھے کون جیت سکتا ہے

تو مرے دل کا آخری ڈر تھا

کون تھا وہ جس نے یہ حال کیا ہے میرا

کس کو اتنی آسانی سے حاصل تھا میں

کیسے ٹکڑوں میں اسے کر لوں قبول

جو مرا سارے کا سارا تھا کبھی

کون کہے معصوم ہمارا بچپن تھا

کھیل میں بھی تو آدھا آدھا آنگن تھا

ساری دنیا سے لڑے جس کے لیے

ایک دن اس سے بھی جھگڑا کر لیا

ہیں اب اس فکر میں ڈوبے ہوئے ہم

اسے کیسے لگے روتے ہوئے ہم

موت نے ساری رات ہماری نبض ٹٹولی

ایسا مرنے کا ماحول بنایا ہم نے

سب آسان ہوا جاتا ہے

مشکل وقت تو اب آیا ہے

کہاں سوچا تھا میں نے بزم آرائی سے پہلے

یہ میری آخری محفل ہے تنہائی سے پہلے

فاصلہ رکھ کے بھی کیا حاصل ہوا

آج بھی اس کا ہی کہلاتا ہوں میں

آؤ گلے مل کر یہ دیکھیں

اب ہم میں کتنی دوری ہے

جھوٹ پر اس کے بھروسا کر لیا

دھوپ اتنی تھی کہ سایا کر لیا

نیا یوں ہے کہ ان دیکھا ہے سب کچھ

یہاں تک روشنی آتی کہاں تھی

دنیا شاید بھول رہی ہے

چاہت کچھ اونچا سنتی ہے

جن پر میں تھوڑا سا بھی آسان ہوا ہوں

وہی بتا سکتے ہیں کتنا مشکل تھا میں

وہاں عید کیا وہاں دید کیا

جہاں چاند رات نہ آئی ہو

اچانک ہڑبڑا کر نیند سے میں جاگ اٹھا ہوں

پرانا واقعہ ہے جس پہ حیرت اب ہوئی ہے

ابھی تو اچھی لگے گی کچھ دن جدائی کی رت

ابھی ہمارے لیے یہ سب کچھ نیا نیا ہے

خواب ویسے تو اک عنایت ہے

آنکھ کھل جائے تو مصیبت ہے

میں کسی دوسرے پہلو سے اسے کیوں سوچوں

یوں بھی اچھا ہے وہ جیسا نظر آتا ہے مجھے

پتا نہیں یہ تمنائے قرب کب جاگی

مجھے تو صرف اسے سوچنے کی عادت تھی

بہت حسیں رات ہے مگر تم تو سو رہے ہو

نکل کے کمرے سے اک نظر چاندنی تو دیکھو

بہت بھٹکے تو ہم سمجھے ہیں یہ بات

برا ایسا نہیں اپنا مکاں بھی

ایک دن ہم اچانک بڑے ہو گئے

کھیل میں دوڑ کر اس کو چھوتے ہوئے

کم سے کم دنیا سے اتنا مرا رشتہ ہو جائے

کوئی میرا بھی برا چاہنے والا ہو جائے

پہلی بار وہ خط لکھا تھا

جس کا جواب بھی آ سکتا تھا

بہت گدلا تھا پانی اس ندی کا

مگر میں اپنا چہرہ دیکھ آیا

پتہ تھا مجھ کو ملاقات غیر ممکن ہے

سو تیرا دھیان کیا اور گلاب چوم لیا

لرزتے کانپتے ہاتھوں سے بوڑھا

چلم میں پھر کوئی دکھ بھر رہا تھا

بھیڑ میں جب تک رہتے ہیں جوشیلے ہیں

الگ الگ ہم لوگ بہت شرمیلے ہیں

کس طرح آئے ہیں اس پہلی ملاقات تلک

اور مکمل ہے جدا ہونے کی تیاری بھی

بہت ہمت کا ہے یہ کام شارقؔ

کہ شرماتے نہیں ڈرتے ہوئے ہم

یہی کمرہ تھا جس میں چین سے ہم جی رہے تھے

یہ تنہائی تو اتنی بے مروت اب ہوئی ہے

تسلی اب ہوئی کچھ دل کو میرے

تری گلیوں کو سونا دیکھ آیا

رکا محفل میں اتنی دیر تک میں

اجالوں کا بڑھاپا دیکھ آیا

بینائی بھی کیا کیا دھوکے دیتی ہے

دور سے دیکھو سارے دریا نیلے ہیں

گفتگو کر کے پریشاں ہوں کہ لہجے میں ترے

وہ کھلا پن ہے کہ دیوار ہوا جاتا ہے

عمر بھر کس نے بھلا غور سے دیکھا تھا مجھے

وقت کم ہو تو سجا دیتی ہے بیماری بھی

وہ بستی ناخداؤں کی تھی لیکن

ملے کچھ ڈوبنے والے وہاں بھی

خموشی بس خموشی تھی اجازت اب ہوئی ہے

اشاروں کو ترے پڑھنے کی جرأت اب ہوئی ہے

یہ سچ ہے دنیا بہت حسیں ہے

مگر مری عمر کی نہیں ہے

فیصلے اوروں کے کرتا ہوں

اپنی سزا کٹتی رہتی ہے

ہو سبب کچھ بھی مرے آنکھ بچانے کا مگر

صاف کر دوں کہ نظر کم نہیں آتا ہے مجھے

ایک مدت ہوئی گھر سے نکلے ہوئے

اپنے ماحول میں خود کو دیکھے ہوئے

عجب لہجے میں کرتے تھے در و دیوار باتیں

مرے گھر کو بھی شاید میری عادت اب ہوئی ہے

جیسے یہ میز مٹی کا ہاتھی یہ پھول

ایک کونے میں ہم بھی ہیں رکھے ہوئے

قرب کا اس کے اٹھا کر فائدہ

ہجر کا ساماں اکٹھا کر لیا