سب کو پہنچا کے ان کی منزل پر

آپ رستے میں رہ گیا ہوں میں

جیب خالی ہے عدمؔ مے قرض پر ملتی نہیں

ایک دو بوتل پہ دیواں بیچنے والا ہوں میں

جن سے انساں کو پہنچتی ہے ہمیشہ تکلیف

ان کا دعویٰ ہے کہ وہ اصل خدا والے ہیں

صرف اک قدم اٹھا تھا غلط راہ شوق میں

منزل تمام عمر مجھے ڈھونڈھتی رہی

اپنوں سے بھی اتنا تکلف

کتنے دنیا دار بنے ہو

کسی جانب سے کوئی مہ جبیں آنے ہی والا ہے

مجھے یاد آ رہی ہے آج متھرا اور کاشی کی

کس کو سمجھانے لگے آپ جناب ناصح

میں تو ناداں ہوں مگر آپ تو نادان نہیں

عدم بہت ہی اگر روٹھنے لگی امید

کسی کے وعدے پہ پھر اعتبار کر لوں گا

دل خوش ہوا ہے مسجد ویراں کو دیکھ کر

میری طرح خدا کا بھی خانہ خراب ہے

ہر دل فریب چیز نظر کا غبار ہے

آنکھیں حسین ہوں تو خزاں بھی بہار ہے

کچھ کچھ مری آنکھوں کا تصرف بھی ہے شامل

اتنا تو حسیں تو مرے گلفام نہیں ہے

دل ابھی پوری طرح ٹوٹا نہیں

دوستوں کی مہربانی چاہئے

میں بد نصیب ہوں مجھ کو نہ دے خوشی اتنی

کہ میں خوشی کو بھی لے کر خراب کر دوں گا

مے کدہ ہے یہاں سکوں سے بیٹھ

کوئی آفت ادھر نہیں آتی

کسی حسیں سے لپٹنا اشد ضروری ہے

ہلال عید تو کوئی ثبوت عید نہیں

ہم کو شاہوں کی عدالت سے توقع تو نہیں

آپ کہتے ہیں تو زنجیر ہلا دیتے ہیں

یہ روزمرہ کے کچھ واقعات شادیٔ و غم

مرے خدا یہی انساں کی زندگانی ہے

محشر میں اک سوال کیا تھا کریم نے

مجھ سے وہاں بھی آپ کی تعریف ہو گئی

میں یوں تلاش یار میں دیوانہ ہو گیا

کعبے میں پاؤں رکھا تو بت خانہ ہو گیا

میں مے کدے کی راہ سے ہو کر نکل گیا

ورنہ سفر حیات کا کافی طویل تھا

بارش شراب عرش ہے یہ سوچ کر عدمؔ

بارش کے سب حروف کو الٹا کے پی گیا

جی چاہتا ہے آج عدمؔ ان کو چھیڑئیے

ڈر ڈر کے پیار کرنے میں کوئی مزا نہیں

اجازت ہو تو میں تصدیق کر لوں تیری زلفوں سے

سنا ہے زندگی اک خوبصورت دام ہے ساقی

کاش میں تیری ملاقات کو خود ہی آتا

طور پر بھیج کے موسیٰ کو پشیماں ہوں میں

تخلیق کائنات کے دلچسپ جرم پر

ہنستا تو ہوگا آپ بھی یزداں کبھی کبھی

گلوں کو کھل کے مرجھانا پڑا ہے

تبسم کی سزا کتنی بڑی ہے

ہم نے تمہارے بعد نہ رکھی کسی سے آس

اک تجربہ بہت تھا بڑے کام آ گیا

لوگ کہتے ہیں کہ تم سے ہی محبت ہے مجھے

تم جو کہتے ہو کہ وحشت ہے تو وحشت ہوگی

موضوع گفتگو تو مری جاں کچھ اور تھا

دوران گفتگو میں تیری بات آ گئی

بڑھ کے طوفان کو آغوش میں لے لے اپنی

ڈوبنے والے ترے ہاتھ سے ساحل تو گیا

یہ الگ بات ہے ساقی کہ مجھے ہوش نہیں

ہوش اتنا ہے کہ میں تجھ سے فراموش نہیں

زندگی زور ہے روانی کا

کیا تھمے گا بہاؤ پانی کا

چلی ہے جب بھی دنیا کے مظالم کی شکایت سے

تو اکثر التفات دوستاں تک بات پہنچی ہے

آپ اک زحمت نظر تو کریں

کون بے ہوش ہو نہیں سکتا

ساقی مجھے شراب کی تہمت نہیں پسند

مجھ کو تری نگاہ کا الزام چاہیئے

مرنے والے تو خیر ہیں بے بس

جینے والے کمال کرتے ہیں

ہولے ہولے وصل ہوا

دھیرے دھیرے جان گئی

مدعا دور تک گیا لیکن

آرزو لوٹ کر نہیں آئی

کبھی تو دیر و حرم سے تو آئے گا واپس

میں مے کدے میں ترا انتظار کر لوں گا

ذرا اک تبسم کی تکلیف کرنا

کہ گلزار میں پھول مرجھا رہے ہیں

وہ حسیں بیٹھا تھا جب میرے قریب

لذت ہمسائیگی تھی میں نہ تھا

جنوں اب منزلیں طے کر رہا ہے

خرد رستہ دکھا کر رہ گئی ہے

مجھے توبہ کا پورا اجر ملتا ہے اسی ساعت

کوئی زہرہ جبیں پینے پہ جب مجبور کرتا ہے

اے دوست محبت کے صدمے تنہا ہی اٹھانے پڑتے ہیں

رہبر تو فقط اس رستے میں دو گام سہارا دیتے ہیں

نوجوانی میں پارسا ہونا

کیسا کار زبون ہے پیارے

سوال کر کے میں خود ہی بہت پشیماں ہوں

جواب دے کے مجھے اور شرمسار نہ کر

دیکھا ہے کس نگاہ سے تو نے ستم ظریف

محسوس ہو رہا ہے میں غرق شراب ہوں

میرے ہونے میں مرا اپنا نہیں تھا کچھ شریک

میری ہستی صرف تیرے اعتنا کی بات تھی

شکن نہ ڈال جبیں پر شراب دیتے ہوئے

یہ مسکراتی ہوئی چیز مسکرا کے پلا

تھوڑی سی عقل لائے تھے ہم بھی مگر عدمؔ

دنیا کے حادثات نے دیوانہ کر دیا