parinde sab nahīñ zindān meñ maare ga.e haiñ

qafas meñ kuchh to kuchh naql-e-makānī meñ mare haiñ

parinde sab nahin zindan mein mare gae hain

qafas mein kuchh to kuchh naql-e-makani mein mare hain

vahī ik qissa ab tak dhyān meñ raushan nahīñ hotā

tasalsul jis se vābasta hai pichhlī dāstānoñ kā

wahi ek qissa ab tak dhyan mein raushan nahin hota

tasalsul jis se wabasta hai pichhli dastanon ka

badan par is-qadar bārish mire hotī hai bosoñ kī

ki jab bāñheñ tirī mujh par khulī hoñ Dāliyāñ ban kar

badan par is-qadar barish mere hoti hai boson ki

ki jab banhen teri mujh par khuli hon Daliyan ban kar

tasavvur kī hadoñ se duur jā kar kaise dekheñge

agar tum se ta'alluq ġhā.ebāna bhī nahīñ hogā

tasawwur ki hadon se dur ja kar kaise dekhenge

agar tum se ta'alluq ghaebana bhi nahin hoga

vahī rusvā.ī kā merī sabab āḳhir bane maulā

vahī jo log kal shāmeñ suhānī karne vaale the

wahi ruswai ka meri sabab aaKHir bane maula

wahi jo log kal shamen suhani karne wale the

ulaT kar jab bhī dekhī hai kitāb-e-zindagī ham ne

to har ik lafz ke pīchhe koī ik hādisa niklā

ulaT kar jab bhi dekhi hai kitab-e-zindagi hum ne

to har ek lafz ke pichhe koi ek hadisa nikla

kuchh badan ke the taqāze kuchh sharārat dil kī thī

aaj lekin ishq apnā jāvedāñ hone ko thā

kuchh badan ke the taqaze kuchh shararat dil ki thi

aaj lekin ishq apna jawedan hone ko tha