جن پتھروں کو ہم نے عطا کی تھیں دھڑکنیں

ان کو زباں ملی تو ہمیں پر برس پڑے

دل کی مسجد میں کبھی پڑھ لے تہجد کی نماز

پھر سحر کے وقت ہونٹوں پر دعا بھی آئے گی

اپنی بلندیوں سے گروں بھی تو کس طرح

پھیلی ہوئی فضاؤں میں بکھرا ہوا ہوں میں

درد زنجیر کی صورت ہے دلوں میں موجود

اس سے پہلے تو کبھی اس کے یہ پیرائے نہ تھے

چاند میں کیسے نظر آئے تری صورت مجھے

آندھیوں سے آسماں کا رنگ میلا ہو گیا

اجلی اجلی خواہشوں پر نیند کی چادر نہ ڈال

یاد کے روزن سے کچھ تازہ ہوا بھی آئے گی

وہ دور اب کہاں کہ تمہاری ہو جستجو

اس دور میں تو ہم کو خود اپنی تلاش ہے

یہ بھی شاید زندگی کی اک ادا ہے دوستو

جس کو ساتھی مل گیا وہ اور تنہا ہو گیا

کیا فیصلہ دیا ہے عدالت نے چھوڑیئے

مجرم تو اپنے جرم کا اقبال کر گیا

انسان بے حسی سے ہے پتھر بنا ہوا

منہ میں زبان بھی ہے لہو بھی رگوں میں ہے

ایک ہی فن کار کے شہکار ہیں دنیا کے لوگ

کوئی برتر کس لیے ہے کوئی کم تر کس لیے

ہوا کے پھول مہکنے لگے مجھے پا کر

میں پہلی بار ہنسا زخم کو چھپائے ہوئے

زندگی کی ظلمتیں اپنے لہو میں رچ گئیں

تب کہیں جا کر ہمیں آنکھوں کی بینائی ملی

تجھ کو سکوں نہیں ہے تو مٹی میں ڈوب جا

آباد اک جہان زمیں کی تہوں میں ہے

بکھرے ہوئے ہیں دل میں مری خواہشوں کے رنگ

اب میں بھی اک سجا ہوا بازار ہو گیا

زندگی اتنی پریشاں ہے یہ سوچا بھی نہ تھا

اس کے اطراف میں شعلوں کا سمندر دیکھا

لوگ میری موت کے خواہاں ہیں افضلؔ کس لیے

چند غزلوں کے سوا کچھ بھی نہیں سامان میں

سطح دریا پر ابھرنے کی تمنا ہی نہیں

عرش پر پہنچے ہوئے ہیں جب سے گہرائی ملی

رستے میں کوئی پیڑ جو مل جائے تو بیٹھوں

وہ بار اٹھایا ہے کہ دکھنے لگے شانے

جانے یہ حدت چمن کو راس آئے یا نہیں

آگ جیسی کیفیت ہے خوشبوؤں کی لہر میں

اپنے ماحول سے کچھ یوں بھی تو گھبرائے نہ تھے

سنگ لپٹے ہوئے پھولوں میں نظر آئے نہ تھے

بکھرتے جسم لے کر تند طوفانوں میں بیٹھے ہیں

کوئی ذرے کی صورت ہے کوئی ٹیلے کی صورت ہے

گر پڑا تو آخری زینے کو چھو کر کس لیے

آ گیا پھر آسمانوں سے زمیں پر کس لیے