koī na rasta naap sakā hai, ret pe chalne vāloñ kā

agle qadam par miT jā.egā pahlā naqsh hamārā bhī

koi na rasta nap saka hai, ret pe chalne walon ka

agle qadam par miT jaega pahla naqsh hamara bhi

itnā āsāñ nahīñ paanī se shabīheñ dhonā

ḳhud bhī ro.egā musavvir ye qayāmat kar ke

itna aasan nahin pani se shabihen dhona

KHud bhi roega musawwir ye qayamat kar ke

aadhe peḌ pe sabz parinde aadhā peḌ āsebī hai

kaise khule ye rām-kahānī kaun sā hissa merā hai

aadhe peD pe sabz parinde aadha peD aasebi hai

kaise khule ye ram-kahani kaun sa hissa mera hai

ġhubār-e-shahr meñ use na DhūñD jo ḳhizāñ kī shab

havā kī raah se milā, havā kī raah par gayā

ghubar-e-shahr mein use na DhunD jo KHizan ki shab

hawa ki rah se mila, hawa ki rah par gaya

muḳhtasar baat thii, phailī kyuuñ sabā kī mānind

dard-mandoñ kā fasāna thaa, uchhālā kis ne

muKHtasar baat thi, phaili kyun saba ki manind

dard-mandon ka fasana tha, uchhaala kis ne

bastiyoñ vaale to ḳhud oḌh ke patte, so.e

dil-e-āvāra tujhe raat sambhālā kis ne

bastiyon wale to KHud oDh ke patte, soe

dil-e-awara tujhe raat sambhaala kis ne

charāġh bāñTne vāloñ pa hairateñ na karo

ye āftāb haiñ, shab kī duā meñ shaad raheñ

charagh banTne walon pa hairaten na karo

ye aaftab hain, shab ki dua mein shad rahen

āsmāñ ke rauzanoñ se lauT aatā thā kabhī

vo kabūtar ik havelī ke chhajoñ meñ kho gayā

aasman ke rauzanon se lauT aata tha kabhi

wo kabutar ek haweli ke chhajon mein kho gaya

sard rātoñ kī havā meñ uḌte pattoñ ke masīl

kaun tere shab-navardoñ ko sambhāle shahr meñ

sard raaton ki hawa mein uDte patton ke masil

kaun tere shab-nawardon ko sambhaale shahr mein

zard phūloñ meñ basā ḳhvāb meñ rahne vaalā

dhund meñ uljhā rahā niiñd meñ chalne vaalā

zard phulon mein basa KHwab mein rahne wala

dhund mein uljha raha nind mein chalne wala

hijāb aa gayā thā mujh ko dil ke iztirāb par

yahī sabab hai tere dar pe lauT kar na aa sakā

hijab aa gaya tha mujh ko dil ke iztirab par

yahi sabab hai tere dar pe lauT kar na aa saka

kisī kā saaya rah gayā galī ke ain moḌ par

usī habīb saa.e se banī hamārī dāstāñ

kisi ka saya rah gaya gali ke ain moD par

usi habib sae se bani hamari dastan

vo shaḳhs amar hai, jo pīvegā do chāñdoñ ke nuur

us kī āñkheñ sadā gulābī jo dekhe ik laal

wo shaKHs amar hai, jo piwega do chandon ke nur

us ki aankhen sada gulabi jo dekhe ek lal

dhuup phailī to kahā dīvār ne jhuk kar mujhe

mil gale mere musāfir, mere saa.e ke habīb

dhup phaili to kaha diwar ne jhuk kar mujhe

mil gale mere musafir, mere sae ke habib

fāḳhtā.eñ boltī haiñ bajroñ ke des meñ

tū bhī sun le āsmāñ ye giit mere naam kā

faKHtaen bolti hain bajron ke des mein

tu bhi sun le aasman ye git mere nam ka