pyāsī bahut thiiñ hasrateñ lo aaj mar ga.iiñ

bārish kā intizār thā vo bhī nahīñ rahā

pyasi bahut thin hasraten lo aaj mar gain

barish ka intizar tha wo bhi nahin raha

kyoñ zulm kartī hai duniyā ham ishq vāloñ par

ham ishq karte haiñ koī ḳhatā nahīñ karte

kyon zulm karti hai duniya hum ishq walon par

hum ishq karte hain koi KHata nahin karte

saarī duniyā tirī hoñToñ kī hañsī meñ gum hai

kaun dekhegā mirī aañkh ke paanī kī taraf

sari duniya teri honTon ki hansi mein gum hai

kaun dekhega meri aankh ke pani ki taraf

āḳhir tire savāl kā maiñ kyā javāb duuñ

ai mere ham-ḳhayāl zarā sochne to de

aaKHir tere sawal ka main kya jawab dun

ai mere ham-KHayal zara sochne to de

pahle pahle ḳhuub mohabbat kī ham ne

phir ham donoñ ne ye rasta chhoḌ diyā

pahle pahle KHub mohabbat ki hum ne

phir hum donon ne ye rasta chhoD diya

zindagī zulf nahīñ thī jo sañvārī jaatī

zindagī aur ulajhtī ga.ī suljhāne meñ

zindagi zulf nahin thi jo sanwari jati

zindagi aur ulajhti gai suljhane mein

dūriyāñ tum ne hī baḌhā.ī thiiñ

ham to apnī jagah pe Thahre haiñ

duriyan tum ne hi baDhai thin

hum to apni jagah pe Thahre hain

us kī āñkhoñ se niiñd ġhā.eb hai

aur maiñ shak ke dā.ere meñ huuñ

us ki aankhon se nind ghaeb hai

aur main shak ke daere mein hun

maiñ ne dekhā to nahīñ 'mīr' kā dīvān magar

jāntā huuñ tirī āñkhoñ kī tarah hotā hai

main ne dekha to nahin 'mir' ka diwan magar

jaanta hun teri aankhon ki tarah hota hai

vo jis se maut nikālegī ek din aa kar

tumheñ ḳhabar hai usī zindagī kī qaid meñ huuñ

wo jis se maut nikalegi ek din aa kar

tumhein KHabar hai usi zindagi ki qaid mein hun

maiñ ne ukhāḌ pheñke haiñ baazū se aise par

jo bojh the kabhī mirī ūñchī uḌaan meñ

main ne ukhaD phenke hain bazu se aise par

jo bojh the kabhi meri unchi uDan mein

kam se kam itnā ishāra to karo jaate hue

tum kabhī yaad jo aao to kise yaad kareñ

kam se kam itna ishaara to karo jate hue

tum kabhi yaad jo aao to kise yaad karen