اے گردش ایام ہمیں رنج بہت ہے

کچھ خواب تھے ایسے کہ بکھرنے کے نہیں تھے

میں چپ رہا تو آنکھ سے آنسو ابل پڑے

جب بولنے لگا مری آواز پھٹ گئی

یہ محبت ہے اسے دیکھ تماشا نہ بنا

مجھ سے ملنا ہے تو مل حد ادب سے آگے

چھوڑ آیا ہوں پیچھے سب آوازوں کو

خاموشی میں داخل ہونے والا ہوں

آخر یہ ناکام محبت کام آئی

تجھ کو کھو کر میں نے خود کو پایا ہے

صرف ہم ہی تو نہیں ٹوٹے ہیں

راستوں پر بھی تھکن طاری ہے

ایک مدت میں خموشی سے رہا محو کلام

تب کہیں جا کے یہ لفظوں میں معانی آئے

اک جیسے ہیں دکھ سکھ سب کے اک جیسی امیدیں

ایک کہانی سب کی کیا عنوان کسی کا رکھیں

اس سے آگے جاؤ گے تب جانیں گے

منزل تک تو راستہ تم کو لایا ہے

کھڑکی تو شاذؔ بند میں کرتا ہوں بار بار

لیکن ہوائے شوق کہ ضد پر اڑی رہے

ان کو بھی اتارا ہے بڑے شوق سے ہم نے

جو نقش ابھی دل میں اترنے کے نہیں تھے

جانے کیا بات ہے پورے ہی نہیں ہوتے ہیں

جانے کیا دل میں خسارے لیے پھرتا ہوں میں

جب بھی گھر کے اندر دیکھنے لگتا ہوں

کھڑکی کھول کے باہر دیکھنے لگتا ہوں

یہ الگ بات کہ چلتے رہے سب سے آگے

ورنہ دیکھا ہی نہیں تیری طلب سے آگے

دکھ نہ سہنے کی سزاؤں میں گھرا رہتا ہے

شہر کا شہر دعاؤں میں گھرا رہتا ہے

اپنے ہی بس پیچھے بھاگتا رہتا ہوں

خود کو ہی بس آگے نظر کے رکھا ہے

تعلق ہی نہیں ہے جن سے میرا

میں ان خدشات میں رکھا ہوا ہوں

کچھ بھی دیکھا نہیں تھا میں نے جب

ہر نظارہ تھا میری آنکھوں میں

یہ کیسے موڑ پر میں آ گیا ہوں

کہ چلتا ہوں تو چلتا راستہ ہے

شاذؔ خود میں ہی گنوائے ہوئے خود کو رکھنا

ہاتھ جب تک نہ کوئی اپنی نشانی آئے

کس قیامت کی گھٹن طاری ہے

روح پر کب سے بدن طاری ہے

زمانے ہو گئے ہیں چلتے چلتے

کہاں جاتا یہ دل کا راستہ ہے

کیسے کہہ دوں بیچ اپنے دیوار ہے جب

چھوڑنے کوئی دروازے تک آیا ہے

پھاندنی پڑ گئی کانٹوں سے بھری باڑ ہمیں

جتنے پیغام تھے پھولوں کی زبانی آئے

اس کا خیال دل میں گھڑی دو گھڑی رہے

پھر اس کے بعد میز پہ چائے پڑی رہے